सत मारग पर चलन वारो किताब
रोमियो 6
पाप को लाय मरनो अना मसिहा को लाय जिवनो
मसीह मा अमी काजक कव्हबीन? का आमी पाप करत रहबीन, का किरपा गजब होहेत?1 पक्को रूप लक नहीं! अमी पाप करन लाय मरयो सेत। मंग अमी योमा कसो रव्हबीन?2 तुमी, पक्को जाना सेव का, जब अमी मसीह यीसु को संग बपतिस्मा ले रहयो होतो। तो अमीला वोको संग मरनो को बपतिस्मा दियो गयो होतो। मंग आमरो बपतिस्मा लक अमी वोको संग दफनायो गयो अना वोको मौत मा साझा करयो, असो परकार लक जसो मसीह को दआजी, को सानदार ताकत लक मरनो लक जित्तो भयो। वसोच अमिला भि नवा जिंदगी भेटेत।
जब लक अमी मरनो को संग, वोको संग एक भयी गयो सेत। ता जसो उ जित्तो से, वसोच अमी भी वोको संग जित्तो रव्हबीन। अमी यो जाना सेजन का, आमरो मा जोन जूनो मानूस होतो, उ यीसु को संगच मा सूली मा चघा दियो होतो जोनलक आमरो पाप वालो देह नास भयी जाय। अना अमी पाप को गुलामि लक सोड़ाया गयो मनूससेजन। काहेका जोन मर गई सेत, उ पाप लक सूट गयो अना निरदोस ठहरो सेत। एकोलाय यदी आमी यीसु मसीह को संग मर गयो। तो आमरो भरोसा यो से, का आमी वोको संग जीवबीन भी। काहेका यो जाना सेजन का यीसु मसीह मरो हुवो मा लक जित्तो भई के दुबारा नही मरन को। अना वोको पर मंग मिरतु को राज नही होवन को। काहेका जोन मर गयो से तो उ एकच बार पाप को काजी मर गयो सेत। अना जोन जित्तो से उ तो उ परमेस्वर को काजी जित्तो से। असोच तूमी स्वता पाप को काजी मरो, अना परमेस्वर को काजी यीसु मसीह मा जित्तो समझो।
एकोलाय पाप तुमारो नासमान तन मा, राज नोको करे। का तुमी वोको मुताबिक चलन लगो। या वोको लालच को लक जीवन करो। अना आपरो आँग ला बदी को हथियार होवन को लाय पाप ला नोको सोपो। तुमी अपरो आप ला मरो हुया मा लक जित्तो समझके अपरो आप ला परमेस्वर ला दे देव। अना आपरो देह ला धरमिपन को हतियार बनन काजी परमेस्वर ला सोप देव। तबा तुमरो पर पाप को राज नही होयेति। काहेका तुमी मोसे को नियम को दास नही पर किरपा को आधीन सेव।
नेकपन को दास
मंग काजक, अमी दुबारा पाप करबीन? काहे का अबा अमी कानून को नही पर परमेस्वर को किरपा को अधिन सेजन। अमी कोनी परकार लक पाप नहि कर सकत। जबा तुमिला मालुम सेत, का कोनी को मानन लाय जबा तुम्ही तैयार होवा सेव। ता दास को रूपमा आपरो-आपला देवा सेव। तो वो तुमरो मालिक अना तुमी गुलाम भयी जासो। जोन पाप करा सेत वा पाप को गुलाम सेत जोनको फर मिरतू सेत। चाहे हुकूम माननो जोनको फर नेकी सेत। पर परमेस्वर को लाय धन्यवाद! तुमी एक बेरा पाप करन को लाय पाप को गुलाम होतो। पर अबा आपरो दिल लक भेटयो सिक्सा को माननवारा भई गयो, जेन को साँचा मा ढालो गयो सेत। अना पाप को कब्जा लक छुडायो जाके नेकपन को दास बन गयो सेत। मी तुमारो आँग को निरबलता को कारन मानूस को रीत लक कव्हसू। जसो तुमरो देह ला कुकरम को लाय बुराई अना खोटो करम को दास बनाके सोपो होतो। वसोच अबा आपरो देह ला धरमी होवन को कजि, वोको दास बनाके सोपो।
जबा तुमी पाप को दास होतो। तो धरम को कन लक सूट होति। अबा जोन बात मा तूमी लज्जित होवा सो, उनमा वोना बेरा तुमीला काजक भेटत होतो। काय का वोको अन्त तो मरनो सेत। पर अबा पाप को कब्जा लक सूटकारा पायके अना परमेस्वर को दास बनके तुमला फर मिल्यो से, जेनको लक तूमी पवीतर भई जावासो। अना वोको अन्त अमर जीवन सेत। काहेका पाप को बनी तो मरनो से, पर परमेस्वर को बरदान आमरो पिरभू यीसु मसीह मा अमर जीवन सेत।
Source notes (2)
- Cross-reference रोमियो 3:5-8
- Cross-reference गलातियो 2:19; 1 पतरस 2:24
सत मारग पर चलन वारो किताब. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.