पेरीत 22

1पौलुस ना कहयो, “अगो भाउगीन अना बाप को बरौबर को नेक मानूस! मोरो बचाव मा अब मोला जोन कव्हनो से, ओला आयको।” 2वय असो आयके का, उ हमरो लक इबरानी बोली मा सांगासे अना उगो-मुगो भय गयो। तबा पौलुस ना कहीस। 3मी यहुदि मानूस सेउ। किलकिया को तरसुस मा पैदा हुयो सेउ। अना ऐना सहर मा पलियो अना मोठो भयि सेउ। गमलीएल को पाय को जवर बसके आमरो पुरखा को विधान को अनुसार कड़ाई को संगा मोरी दिक्सा भयी से। परमेस्वर को पुढ़ा मि बड़ो धुन लगायो समरपित होतो। वसोच जसो तुमी आज सेव। 4ऐना मारग को लोकगीन ला मिना लगत सतायो। मी ना मरदमाना अखीन आई-माई दुई ला बंदी बनायके जेलमा डाकके राखो होतो। 5मुखिया याजक अना बुजरुक लोक को सभा खुदच यो गोस्टी को सबूत से सकासेत। का मी दमिस्क नगर जावन लाय मी इनको लक चिठ्ठी ले के यो मारग को लोकगिन ला बन्दी बनाय के येरुसलेम आनन गयो होतो।

पौलुस आपरो बदलाव ला सांगासे

(पेरीत 9:1-19; 26:12-18)

6जबा मी चलता-चलता दमिस्क को कठा पहुचयो। त असो भयो का दुफारी को बेरा होतो। बादल लक एकाएक एक मोठी उजाड़ो मोरो चारी कन चमकी। 7अना मी धरती पर पड़ गयो। तबच मी एक असी आवाज आयकू आयो। अरे साऊल! अरे साऊल! तु मोला कायलाई सातवसेस? 8तबा मी न जवाब दियो ओ पिरभू तु कोन आस? वोना मोरो लक कहीस “मी यीसु नासरी सेव जेनला तु सतावसेस?” 9मोरा संगी गीन न उजाडो त चोवयो मंग जोन मोरो लक सांगत होतो। वोकी आवाज नही आयकयो। 10तबा मी न कहेयो, “अरे पिरभू मी का करु?” पिरभू न मोरो लक कहीस “उभो होयके दमिसक मा जाय अना जोन काही तोरो करन को लाई राखीसेऊ उ तोला ला सब सांग दियो जाहे।” 11वोनो उजाडो को तेज को मारे मोला काही चोयो। ता मोरो संगी गीन हात धरके दमिस्क नगर ले गईन।

12यो सहेर मा तबा हनन्याह नाव को एक मानूस होतो। उ मोसे को नियम ला माननवालो एक नेक मानूस होतो। उ मोरो जवर आयो। 13अना उभो होयके मोरो लक कहीस, अरे भाऊ साऊल मंग चोवन लग, वोनच बेरा मोरा डोरा उघड गईन अना मी न वोला देखयो। 14तबा वोना कहीस, “आमरो आजा-पुरखागीन को परमेस्वर न तोला एकोलाय बेचीसेस का तु वोकी इक्सा ला जान, अना वोनच न्यायी यीसु ला चोव, अना वोको टोन्ड लक गोस्टी आयको। 15काहेकी तु ना जोन चोइसेस अना आयकिसेस। वोको लाय सब मानूसगिन को पुड़ा तु वोको गवाह होवजोस। 16अबा का देर करासेस? उभो होय अना बप्तिस्मा ले अखीन वोको नाव ला अपना अना अपरो पाप ला धोय डाक।”

गैर यहुदीगिन ला सन्देस आयकावन लाय पौलुस ला हाकलनो

17जबा मी मंग येरुसलेम नगर मा आयके मंदिर मा पिराथना कर रहयो होतो त बेसुध भय गयो। अना मी दरसन चोवयो। 18“का पिरभू यीसु मोरो लक कव्हसेस, येरुसलेम नगर लक फटाकने हिटी जाय।” काहेकी उ मोरो बारे मा तोरी गवाही नही मानेत। 19मी न कहेयो “हे पिरभू उ त आपच जानासे, का मी तोरो पर बिस्वास करनवारा ला जेल मा डाकसेत, अना जघा-जघा यहुदी सभाघर मा पीटावत होतो।” 20जबा तोरो गवाह स्तिफनुस को खून बोवायो जाय रहेयो होतो। तबा मी भी वहान उभो होतो। अखीन एना गोस्टी मा हिस्सेदार होतो। लोक वोला मारत होतिन, अना मी उनको कपरा की देख-रेख करत होतो। 21अना वोना मोरो लक कहीस चली जाय काहेकी मी तोला गैर यहुदी को जवर दुहुर-दुहुर तकन।

पौलुस की रोम देस मा नागरिकता

22वय ओको एना बयान तकन ता आयकत रहीन। तबा जोर लक चिल्लाय के कव्हन लगीन, “असो मानूस को धरती पर लक नास कर देव, काहेका वोकी जित्तो होवनो बेस नाहती।” 23जबा वय चिल्लावत अना कपरा फेकके अना बादल मा धुल उडात होतीन। 24त सेना को अधिकारी न कहीस “एला किला मा लीजावो, अना कोडा मारके जाचो। का मी जानु का लोक कोनतो कारन लक वोको बिरोध मा असो चिल्लावत होतिन।” 25पर जबा उनना वोला कोड़ा, लगावन काजी बारती लक बांधीन, तबा उभो सौ सेना को अधिकारि लक पौलुस न कहयो, “कोनी रोमी नागरिक जोन बेकसूर सेत कोड़ा लगवानो का सही सेत।”

26यो आयक के वा अधिकारी सौ सेना को मुखिया को जवर जायके कहीस “तु यो का करासेस? यो त रोमी मानूस से।”

27तबा सेना को मुखिया न पौलुस जवर आयके कहीस, मोला सांग का तु रोमी सेस? वोना कहीस “हव।”

28असो आयक के सेना को मुखिया न कहीस मी न लगत रुपया देके पाइसेस।

“पौलुस न कहीस मी त जन्म लक रोमी सेव।”

29तबा जोन लोक वोला जाचन पर होतीन। वय गदने वोको जवर लक सरक गयो। अना सेना को मुखिया भी असो जानके का योच रोमी से अना मी न वोला बांधी सेव उ डराय गयो।

धरम की मोठी सभा को पुढ़ा पौलुस

30सेना को मुखिया यो गोस्टी को बारेमा सही-सही जानन की मनसा लक, का यहूदी वोको पर कायलाई दोस लगावसेस वोको बन्धन खोल दियो। मंग वोना मुखिया याजक अना सबरी मोठी सभा ला इकक्ठा होवन की हुकूम देईस। अखीन पौलुस ला खाल्या लीजायके वोको पुड़ा उभो कर देईस।