1 कुरिन्थियो 10

मुरतीपुजा को खिलाफ चेतोनी

1मी तुम्हिला हेत करानो चाव्हा सेऊ। मोरो संगीहुन, मोसे को मघा चलनवारो आमरो आजा पुरखा हुन को संग काजक भयो होतो? वय सबा बादर को भीतर सुरक्सित होतिन, अना लाल सागर को वोनागन गयीन। 2अना सबा ना सागर अना बादर को बीच मा मोसे को बप्तिस्मा लेइन। 3अना सबा ना एकच आतमिक जेवन करियो। 4अना सकडिया एकच आतमिक पानी पियीन। काहेका वय वा चट्टान लक पियिन जोन उनको संग-संग चलत होतो अना उ चट्टान मसीह होतो। 5पर परमेस्वर उनमा लक लगत लक हिजड़ गयो। एकोलाय वय जंगल मा मर मीट गईन।

6यो घटना उदाहरन को रुपमा सेत। अना हमला यो सिक्सा देसेत, की आमीला उनको जसो बुरो चीजगीन को लोभ नही करनो से। 7उनमा लक कही लोकगीन को जसो तुमी मुरत पुजा करनवारा नोको बनने, जोन को बारे मा यो लिखी से, “वय खावन-पीवन को साठी बसीन, अना आँनद मनान को लाई उठीन।” 8अमी नोको करहीन छिनालापन, जसो की उन मा लक काही लोकगीन ना करीन। अना एकच दिवस मा तेईस हजार मर गईन। 9अमी मसीह को परीक्सा नही करबिन, जसो की उनमा लक काही लोकगीन ना करीन अना सरप गीन ना उनला नास कर देईन। 10तुमी लोक नही कुड़कुड़ायत, जसो की उनमा लक काही कुड़कुड़ाईन अना नास करन वालो ना उनला नास कर देईन।

11यो सब उदाहरन रुप लक उन पर बितयो अना अमिला चेतावनी देवन साठी लिखी गई से, जोन जुग को आखरी मा पायो जावसे।

12एको लाई जोन यो समझसे से की मि बिस्वास मा मजबुत सेव, उ सतरक रव्हने। कहीं असो न होयहेत की उ भटक जाहे। 13तुमी अबा असो कोनी परिक्सा मा नही पड़यो सेव, जोन मानूस को ताकत लक बाहेर होय। परमेस्वर भरोसा लायक अना सतको से, उ तुमला असो लोभ लालच मा पड़न नही देहे, जोन तुमरी ताकत लक बाहेर होय। उ लोभ लालच को बेरा तुमला ओको लक हिटन को रास्ता चोवाहे, जेनला तुमी सह नही सको।

14मोरो माया को भाउ अना बहिनगीन। तुमी मुरत पुजा लक दुर रव्हो। 15मि तुमी लोकगीन ला समझदार जानके यो कव्ह रही सेऊ। तुमच खुद मोरी गोस्टी पर बिचार करके तय करहो। 16संगती मा उ धन्य वाद को बटकी जोन पर आमी धनवाद करासेत, का मसीह को खून को हिस्सादार नही। उ भाकर जोन ला आमी तोड़के जेवेसेजन का उ मसिहा को देह को हिस्सादार नाहती। 17एकोलाय एकच भाकर सेत अना आमी भी लगत मानूस सेत। एकच देह से, काहेका आमी सबा वोच भाकर को हिस्सादार सेजन।

18जोन देह को हिसाब लक इसरायल सेत उनला चोवो। का बली चघान को वेदी मा लक जेवनवारा हिस्सादार नाहती। 19मंग मी का कव्हसू? का मुरत गीन को पुड़ा चघायो हुयो जेवन काही सेत? का मुरती काही सेत? 20नही पर गैर बिस्वासी लोकगीन जोन बली करासेत, उ परमेस्वर काजी नही पर बुरो आतमा काजी करासेत? अना मी नही चव्हासू का तुमी बूरो आतमा को हिस्सादार बनो। 21तुमी पिरभू को बटकी अना बुरो आतमा को बटकी दुई मा लक नही पीव सकसो। तुम परभू को पवीतर जेवन अना बुरो आतमा को जेवन दुई को हिस्सादार नही बन सका सो। 22का आमी पिरभू ला हिजडावा सेजन। क आमी वोको लक जादा ताकतवर सेजन?

इसरायल को इतिहास लक समजानो

23सब चीज मोरो काजी साजरो से पर सबा फायदा को लाय साजरो नाहती? 24कोनी आपरो फायदा नही पर दुसरो को बारे मा सोचो। 25जो काही खटिक को घर मा बिका सेत उ सब बिना जाँच को जेवन करो। अना मन मा सक नोको करो? 26काहेका धरती अना जोन काही सेत सबा पिरभू को सेत? 27अदी कोनी गैर मसीही को घरमा कोनी निवता देवे अना तुमी जावो तो जोन काही तुमला परोसे मन मा बिचार कियो बगेर, उ सबा जेवन करो नोको परख करो 28पर यदी कोनी तुमला कहे, यो तो मुरती पर चघायो गयो सेति, तो वोको मन लक कव्हनो को लक नोको जेवन करो? 29पर मोरो मतलब तुमरो तय करन लक नही सेत। पर दुसरो मानूस को आपरो मन मा काजक तय कर सेत?

“काहेका मोरो सूटकारा दुसरो को दिल दुखन को कारन नोको बने।” 30अदी मी धनवाद को पिराथना करके जेवन करासू तो जोन जेवन काजी मी परमेस्वर ला धनवाद देवसू वोको कारन कोनीला मोरो निन्दा करन को अधिकार नाहती।

31एकोलाय तुमी चाहे जोन जेवन करो पिवो, जोन काही भी करो वा मा परमेस्वर को महिमा होवनो जरुरी सेत। 32तुमी ना तो यहूदी हुन अना यूनानी गीन को लाय ना परमेस्वर को कलीसिया को लोकगीन काजी पड़न को कारन बनो? 33जसो मी सब गोस्टी लक सबला खूस राखासू अना आपरो नही पर लगत मानुसगिन को भलो चव्हासू, का लगत मानूसगिन को सूटकारा भई जाये।