Powari Standard Project
साजरो गीत 5
अवो मोरी लगत चहेती, मोरी चहेती,
मी अपरी बाड़ी मा आयो सेऊ,
मीना अपरो गन्धरस अना बलसान
जमा कर लियो से;
मीना छत्ता लक टपकतो सहेद खायो से,
मीना दुध अना अंगूर को रस पी लियो से।
सखी
ओ संगीहुन,तुम्हि भी खाव
ओ चहेतो, पियो मनमाने पिवो!
चवथो गाना
नवरी
मी जपमा होती पर मोरो मन जाग चेतो होतो।
आयक! मोरो चहेतो किवाड़ खटखटावा से,
अना कसे, “होय मोरी चहेती, मोरी जियान, मोरी परेवा,
होय मोरी निरमल, मोरी लायी किवाड़ खोल;
काहेका मोरी डोई ओस लक ओदो से,
रात की पड़ी बूंद लक मोरो लटा तर से।”
मी अपरा कपरा उतार दियो होतो
मंग मी वोला कसी पेहरु?
मी ता अपरा पाय धोय लियो होतो
अता उनला कसो मयलो करु?
मोरो चहेतो ना अपरो हात किवाड़ को छेद
लक अपरो हात भीतर डाक दियो से,
तबा मोरो हिरदा वोको लायी बेचेन भयो।
मी अपरो चहेतो लायी किवाड़ खोलन उठी,
अना मोरो हात लक गन्धरस पड़यो,
अना टपकतो हुयो बेड़ागिन को मूठ मा पड़यो।
मीना अपरो चहेतो लायी किवाड़ ता खोल्यो
पर मोरो पिरेमी पहेले च लक चली गयो होतो,
तबा मी वोला आयकनो चाव्हत होती।
मीना वोला ढुंडयो पर नही मिलयो।
मीना वोला बुलायो पर,
वोको जवाब नही मिलयो।
पहरेदार जोन नगर मा घूमत होतिन,
मोला मिलिन, वय गिनना मोला मारिन
अना घायल कर दियो; परकोट का
पहरेदार गिनना मोरी चद्दर
मोरो लक सोड़ाय लियो।
सखी
अवो येरूसलेम की टुरीगिन,
मी तुमला कसम देके कव्हासु,
अदि मोरो चहेतो तुमला मिल जाय,
ता वोको लक कव्हनात का
मी पिरेम मा दीवानी भय गयी सेंऊ।
नवरी
अवो बायको गिनमा तोरो पिरेमी बाकीगिन लक का बेगरो से जोन,वोमा असो का अदभूत से का तू कसम देवासेत?
वधू
मोरो पिरेमी सुंदर अना ताकतवर से,
ऊ दहा हजार मा एक च साजरो से।
वोको डोसका चोखो सोन्नो को जसो से,
वोकी लटकती लटा कावरा जसी कारी सेत।
वोका डोरा वोना परेवा जसा सेत,
जोन दूध मा बुड़के अपरो झुंड संगा
नद्दी को किनारी मा आपरो एक पंगत मा बसया सेत।
वोका गाल असो खोपसुरत जसी पूरो भरयो महेक वालो जड़ी बूटी अना गंधरस को बगीचा जसो से।
वोको ओठ सोसन की फूल अना पिघलो हुयो गधरस जसी टपकासेत।
जिनको लक गन्धरस टपकासे।
वोका हात फीरोजा मनी जड़यो सोन्नो की छड़ी को जसी से,
वोको बदन मानलो हत्ती को दांत लक बनयो से,
अना वोमा किमती गोटा गिन लक जड़यो गयो से।
वोका पाय सोन्नो मा जड़यो संगमरमर का खम्बा जसो सेत,
वय चोवन मा लबानोन पहाड़ अना सुन्दरता मा
देवदार का झाड़ जसा मन ला लुभान वारो सेत।
वोकी बानी लगत मिठ्ठो से,
हव वा बेझा सुन्दर से,
अवो येरूसलेम की टूरीगिन योच मरो चहेतो
अना संगी से।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.