Powari Standard Project
परकासित वाक्य 2
इफिसुस ला खबर
“इफिसुस को कलीसिया को सरगदूत को नाव असो लिख, उ जो आपरो हात मा सात तारा धरीसेस।” अना उ जो सात सोन्नो को दियो दानी को बीच चलत फिरत रव्हसे। उ असो कव्हसे। “मि तोरो करयो गयो काम, मेहनत आना धीरज ला जानुसू।” का तू बुरो लोकईन ला, फूटयो डोरा नही भअवा सेत। अना जोन आपरो आपच ला पेरीत ठहरायो सेत। पर उ नहाय तुना उनला परख के खोटो पायो सेत। मोला मालूम सेत का तोरो मा धीरज से, अना मोरो नाव को कारन तु दुख उठात-उठात थकयो नही सेत। पर मोला तोरो विरोध मा असो कव्हन ला से। की तुना आपरो पहेलो जसो माया ला छोड़ देइसेस। एकोलाय तु हेत कर की तु कहान लक पड़ीसेस। अना पाप लक मन ला हटाव, अना पहेलो को जसो काम नही करसेस तो मि तोरो जवर आवसेऊ। अना मन नही फिरावजोस त तोरो दियोदानी ला तोरो हात लक छुड़ाय लेहुँ। पर ऐतरो भलो से की तु नीकुलीगीन को काम लक घिरना बैर करासेस जिनलक मि भी बैर करसू।
“जेनको कान सेत ता वा आयक लेव का आतमा कलीसिया लक काजक कव्हसे। जो जीत जाहे मी ओला परमेस्वर को सरग म लक जीवन को झाड़ को फर खान ला देहूं।”
स्मुरना को कलीसिया
स्मुरना को कलीसिया को सरगदूत ला असो लिख,
“उ जोन पहेलो अना आखीर से। जोन मर गयो होतो अबा जोन दुबारा जित्तो भयो से। उ असो कव्हसेत।” “मी तुमरो दुख अखिन तुमरो गरीबी को बारेमा जाना सेऊ।” मंग सहीमा तुम्ही धनवान सेव! जोन अपरो आपला यहूदी कव्हसेत। तुमरो जोन निन्दा करतत, वोला भी जाना सेऊ। मंग वय यहूदी नाहती। बल्कि वय तो सैतान को भगती करन वालो को एक जमघट सेत। उन दुख तकलीफ लक तू नोको डराय जोन तोला झेलनो सेत। आयको सैतान तुम लोक मा काही ला जेलमा डाखेत जोनलक तुमरो परिक्सा लेहेत। अना तुमला यो दुख दहा दिवस तकन भोगनो सेत। चाहे तोला मौत आ जाय, पर सच्चो बनेयो रव्जोस। अना मि तोला अमर जीवन को जीत को मुकुट देहिन।
“जोन आयक सका सेत वा आयके आतमा कलीसिया लक काजक कव्हसेत? जोनला जीत मिल्हेत वोला दुबारा मरन को हान नही होयेत।”
पिरगमुन को कलीसिया
“पेरगाम को कलीसिया को सरगदूत ला लिख।”
“यो वोना मानूस को खबर सेत जोन को जवर दुई धार वालो तरवार से। मी जाना सेऊ का तुम्ही कितानी रव्हअ सो? जितानी सैतान को सिघासन सेत। तुम मोरो लाय सच्चो सेव। अना तुमीना वोन बेरा भी बिस्वास नहि सोड़यो, जबा मोरो बिस्वासी गवाह अन्तापस मारयो गयो। जितानी सैतान रव्हत होतो। परा मोला तोरो विरोध मा काही कव्हनो सेत। तुमरो मा काही लोक सेत। जोन बिलाम को सिक्सा को पालन करा सेत। बिलाम ना सिक्सा दियो होतो। का इजरायली गिन मुरती पर चघायो जेवन जेये, अखिन छिनाला करन लाय राजी कियो जाय। असो परकार तोरो यहान काही असो लोक भी सेत। जोन नीकुली गिनको सिक्सा चलअ सेत। अपरो आप ला पाप लक दुहूर करो। अदी तुम्ही असो नही करासेव ता मी लवकर तुमरो जवर आहिन। अना उन लोक गिनलक मोरो तोन्ड लक हिटयो तरवार लक लड़ाई करबीन।”
“अगर तुमरो कान से, तो आयको, आतमा कलीसिया लक काजक कव्हसेत।”
“जोन लोक जीत जाहेत, मी उनला काही ला लुकायो मन्ना देहिन।” मी उनलक हरेक ला एक पांढरो गोटा देहुँ। जोनमा एक नवा नाव लिखयो गयो से। जोनला कोनी भी नहीं जाना सेत। जोनला यो भेटासेत।
थुआतीरा को कलीसिया
“ थुआतीरा को कलीसिया को सरगदूत ला लिख, परमेस्वर को टूरा, जेकी डोरा स्तो को धगाड़ी जसो अना जेनको पाय चमचमातो सुध्द काँसो जसो सेत, यो कव्हसेत”, मि तोरो काम अना माया भरोसा, तोरो सेवा अना धिरज लक सहनो ला जानूसेव, अना यो भी की तोरो अबा को काम मंघा को कामगीन लक बढ़के सेत। पर मोला तोरो विरोध मा मोला यो कव्हनो से, की तु ओनो आई-माई ईजबेल ला आपरो बीच रव्हन देसेस, जो आपरो आपच ला भविस्यवक्तनी कव्हसे, अना मोरो दास गीन ला छिनालापन काम करन अना मुरत गीन को पुड़ा चघायो हुयो मांस खान को लाई, सिखावसे अना भटकावसे। मीना ओला मौका दियो की पस्तावा करयेत, पर उ आपरो छिंडरापन लक पसतावा करनो नही चाहव्त होती। देख, मि ओला खाट पर डाक देसू, अना जो ओको जवर छिंडरापन करासेत, अदी वय ओको जसो कामगीन पस्तावा नही करयेत, ता उनला मोठो संकट मा डाखू। मि ओको महामारी लक वोको लेकरा गिनला मारुँह अना सप्पा कलीसिया ला मालूम भय जाहे का मन ला अखीन आतमा ला जाँचन वालो मि च सेव। अना मि तुमी मा लक हरेक ला ओको कामगीन को अनुसार फर देहबिन।
“अबा मि थुआतीरा को बचयो लोकगीन लक कव्हसू, जो एने सिक्सा ला नही मानासे अना जसो की वय कव्हसेत, की सैतान को गहरो गोस्टी गीन ला जानासे, मंग नही जानासे, मि तुमी पर अना लगत बोझ डाखनो नही चाव्हअ सेऊ। मंग जो भी काही तुमरो जवर सेत, ओला मोरो आवन तकन ताकत पुर्वक संभाल लेव। जो जीत पाहे अना जो मोरो कामगीन ला आखरी तकन करत रह, ओला मि देस-देस पर हक देहुं। उ उनको पर लोहा को छड़ी लक हुकूम चलाहे, जसो माती को भान्डो चकनाचुर होय जासे वसोच उनको हाल कर देहेत। मि ओला भुमसारे को तारा जसो दे देहूं। यो वोच हक सेत, जोनला मीना परमेस्वर दआजि लक पायोसेउ। मि ओना मानूस ला भुमसारे को तारा देहूं।”
“जेका कान होयेत, उ आयक लेहेत की आतमा कलीसिया लक काजक कव्हसे।”
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.