Powari Standard Project
फिलिप्पियो 1:6
Verse 6 is marked below, with the whole chapter around it. Read from the start
भुमिका
मसीह यीसु को दास पौलुस अना तीमुथियुस को कन लक, सबच पवीतर लोगहुन को नाव जोन मसीह यीसु मा होयके कलिसीया को मुखिया अना दासगीन को सकट फिलिप्पी नगर मा रव्हसेत।
आमरो बाबूजी परमेस्वर अना पिरभु यीसु मसीह कन लक तुमला दया अना सान्ती मिलत रव्हे।
पौलुस को पिराथना अना धनवाद
मि जबा-जबा तुमला हेत करूसेऊ तबा-तबा आपरो परमेस्वर को धनवाद करासेऊ, अना जबा कभी तुमी सबच को लाई बिनती करूसेऊ, ता हमेसा खुसी को संगा पिराथना करसेऊ। एकोलाय की तुमी पयले दिवस लक आन के आज तकन साजरो बारता को फैलान मा मोरो संग रव्हसेव। मोला यो गोस्टी को भरोसा से की जेने तुमी मा साजरो काम सुरू करीसेस वाच ओला यीसु मसीह को दिवस तकन पूरो करेत। तुमी मोरो मन मा आय बसी सेव, एकोलाय का मि तुमी सब को लाई असोच बिचार करूसेऊ अना मोरी संग बंधन मा रव्हन मा अना साजरो बारता को लाई जवाब अना सबुती देवनो मा तुमी मोरो संगा धरमी अना दया मा संगी सेव। ऐमा परमेस्वर मोरो गवाह से का मि मसीह यीसु को जसी माया राखके तुमरो सबको मोठो लालसा करासेऊ।
मि यो पिराथना करासेऊ का तुमरो माया गियान अना सप्पा तरीका को अक्ल सकट अखीन भी बड़त जाय। यहान तकन का तुमी साजरो लक साजरो गोस्टीहुन ला चहेतो जाननो, अना मसीह को दिवस तकन खरो बनयो रव्हो अना परख नोको जावनो। ओना धरमिपन को फर लक जोन यीसु मसीह को कन लक होवासेत, भरपुर होवत जावो जोको काजी परमेस्वर को महिमा अना बड़ाई होवती रह।
पौलुस को बँदी रव्हन लक साजरो बारता को बड़ावा
अगा भाऊगीन मि चाव्हसेऊ का तुमी जानलेव का मोरो पर जोन बीतयो से, ओकोलक साजरो बारता को बड़ावा भयी से। यहान तकन का कैसर को राजभवन को सप्पा जनता अना बचयो सब लोकगीन मा यो दिसयो से। का मि मसीह मा बंधन मा सेव। मोरो बेड़ी मा होवन को काजी उन मा लक कई लोकगीन पिरभु मा जोन मोरा भाऊ सेत, भरोसा बांधके परमेस्वर को बचन बिन डर को आयकावान को अखीन भी हिम्मत करासेत।
काही ता छल अना झगड़ा को काजी मसीह को परचार करासेत अना काही भलो मरजी को काजी। कई एक गीन ता असो जानके का मि साजरो बारता को लाई जवाब देवन को लाई राखयो गयो सेव, माया लक परचार करासेत। अना कई एक ता सीधोपन लक नही पर बिरोध लक मसीह को कथा आयकोवासेत, असो सोचके का मोरो बंधन मा होवनो लक मोरो लाई संकट पैदा होहेत।
ता का भयो? चाव्ह यो का हर तरीको लक, चाव्ह बहान लक चाव्ह खरो रूप लक, मसीह को कथा आयकावायो जावसे, अखीन मि एकोलक खुस सेव अना खुस रहूँ भी।
जित्तो रव्हनो मसीह से
काहेका मि जानसेऊ का तुमरो पिराथना लक, अना यीसु मसीह को आतमा को दान कन लक एको फर मोरो सूटकारा होहे। मि यो खुल्लो दिल लक मनसा अना आसा राखासेऊ का मि कोनी गोस्टी मा नोको सरमाऊ, पर मोरो तन लक हमेसा मसीह को बड़ाई मोठो ताकत लक होत रव्हे, अबा मि चाव्ह जित्तो रव्हु या मर जाहुँ, पर वसोच बड़ाई होवतो रव्हे। काहेकि जित्तो रव्हनो मसीह से, अना मर जावनो फायदा से। पर अदी तन मा जित्तो रव्हनोच मोरो काम को लाई फायदामन्द से ता मि नही जानासेऊ का कोन ला बेचूँ। काहेकि मि दुही को बीच मा अथपर मा टँगीसेऊ; मरजी ता चलासे का हिटके मसीह को जवर जाऊ, काहेकि यो लगतच साजरो से। पर आँग मा रव्हनो तुमरो काजी अखीन जरूरी से। एकोलाय मोला असो भरोसा से ऐना रिती लक मि जानासेऊ की मि जित्तो रहुँ, अना तुमी सब को सँग रहुँ एना रिती लक तुमी भरोसा मा पक्को होता जाव अना ओमा खुसी रव्हो। अखीन तुमी मोरो बारे मा जोन घमन्ड करोसो, मंग उ मोरो तुमरो जवर आवन को मंघा मसीह यीसु मा लगत बड़ जाये।
एतरो करो का तुम्हारा चाल-चलन मसीह को साजरोबारता को काबिल होय का चाव्ह मि आयके तुमला चोऊ, चाव्ह नही आऊँ, तुमरो बारे मा योच आयकू का तुमी एकच आतमा मा पक्को सेव। अना एक चित्त भयके साजरो बारता को भरोसा को लाई मेहनत करत रव्हना। अना कोनी गोस्टी मा बिरोधिगीन लक भय नही खावासो। यो उनको लाई सत्यानास को खुल्लो हिदान से, पर तुमरो लाई मुकती को अना यो परमेस्वर कन लक से। काहेका मसीह काजी तुमी पर यो दया भयी का नाच ओको पर भरोसा करो पर ओको लाई दुख भी उचलो। तुमला वसोच मेहनत करनो से, जसो तुमी ना मोला करता चोयोसेव, अना अबा भी आयकासेव का मि वसोच करूसेऊ।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.