Powari Standard Project
याकूब 1
नमस्कार
परमेस्वर को अना पिरभू यीसु मसीह को दास याकूब को कन लक वोना बारा गोत को लोकगीन जोन तितिर-बितिर होयके रव्हसेत नमस्कार भेटेत।
भरोसा अना अक्लवरी
मोरो चहेतो भाऊगीन, जब तुमी लगत परकार को परिक्सा को सामना करसेव, त एला निरो खुसी को बात समझो। काहेका तुमी जानसो का तुमारो भरोसा ला परखो लक धीरज जलम लेवसेत। धीरज ला अपरो काम पूरो करन देव। जोनलक तुमी निरदोस अना सिद्ध भई जाओ; अना तुमरो मा कोनी परकार को कमी न रव्ह जाएत। अदी तुम मा कोनी ला गियान को कमी सेत, ता उ परमेस्वर लक बिनती करेत, जोन बिन तिरस्कार को सबा लोकगीन ला भी को दरिया दिल लक देवसेत, अर वोला जरूर भेटेत। पर भरोसा लक माँगे अना काही संका नही करेहे काहेकी संका करन वारा समुंदर लहर को जसो से, जोन वारा बोह से कुदासेती। मानूस असो नोको समझा का मोला पिरभू लक काही नही मिलेत। असो मानूस जोन को मन दुविधा लक घेरीयो हुयो सेत, अना उ आपरो सब सुभाव मा अटल नाहती।
गरीबी अना धनी
गरीब भाऊगीन आपरो वरता पद मा गरब करे। अना धनी आपरो गरीबी दसा मा गरब करे काहेका वोको जिंदगानी; जंगल को फूल अना गवथ जसो बीत जाहेती। दिवस को ऊन मा गवथ मुरझा जावा सेत। अना वोका खिलो फूल झड़ जावा सेत। वोको खुबसुरती नास हो जावा सेत असो च धनी मानूस आपरो धनको संग-संग धूरो मा मिल जाहेती।
लोभ अना परिक्सा
धन्य सेत उ मानूस, जोन परिक्सा मा उभो रव्हसेत। काहेका परिक्सा मा खरा साबीत होवासे उ जीवन को मुकुट पावन को काबील सेत। असो परमेस्वर ना उनको लाय वायदा करीसेस जोन वोको लक माया राखासेत। परिक्सा मा पड़न मा कोनी असो ना सांगेत; “का परमेस्वर मोला परिक्सा मा डाखी सेत।” काहेका परमेस्वर कोनी ला परिक्सा मा नही डाखा सेत अना कोनी परमेस्वर को परिक्सा ले सकसेत। हरेक मानूस खुदच आपरो मरजी लक अभिलासा मा पड़के अना फँसके परिक्सा मा पड़सेत। मंग अभिलासा गरभ धरासेत, अना पाप ला जलम देवा सेत। मंग पाप बड़ सेत अना मिरतु ला आना सेत।
एकोलाय मोरो चहेतो भाऊगीन, धोका मा नोको रव्हो। हरेक साजरो अना भरयो पुरयो दान-वरदान वरता लक भेटासेत। अना वय उजाड़ को मोठयो दआजी कन लक जेने सरग को उजाड़ ला जलम दियोसेस, खाल्या आनीयो जासे। जोनमा कोनी फेरबदल नाहती। खराई को साजरो बारता को कन लक आपरी औलाद बनावन को साठी ओने आमला निवड़ीसेस। मनजे आमी सबच जीवधारी हुन को बीच ओकी फसल को पुढ़ा फर सिध्द होय।
आयकनो अखीन करनो
अगो मोरो चहेतो भाऊगीन, हेत रखो, हर कोनी सजग रूप को संग आयकनो चाहिसे, कव्हन मा जल्दीच नोको करोह, गुस्सा करनो मा लाहकी नोको बरतेव। काहेका मानूस को गुस्सा लक परमेस्वर को धरमिपन नहीं मिल सकसेत। एकोलाय सप्पा खोटो सुभाव अखीन बैर ला तजके, नरमताई लक तुमरो दिल मा डाकयो गयो परमेस्वर को गोस्टी ला अपनावनो। जोन तुमरो सूटकारा लाय बेहद ताकतवर सेत।
परमेस्वर को सिक्सा मा चलनवारो बनो, केवल आयकन वालो नही, अदि तुमी केवल ओला आयकन वारो सेव तो खुद ला धोका देय रव्हसेव। यदि कोनी परमेस्वर को बचन ला आयकन वारो सेत पर वोको पर नही चलासेत, उ असो मानूस जसो सेत जोन आपरो रूप ला आरसा मा चोवासेत। उ खुदच ला साजरो तरीका लक चोवासे, पर जब वहान लक चलो जअसे ता गदने भूल जासे का उ कसो चोव रही होतो। पर जोनना निरदोस पवीतर गिरंथ ला साजरो लक बाच लेय सेत। जोन असल मा सूटकारा को करार सेत, अना वोच मा अटल रव्हसेत। उ आयक के बिसरनवालो नही, पर हेत रखके वोको हुकूम ला मानन वालो सेत, असो मानूस आपरो हरेक काम मा आसीस पावन वालो होहेत।
अदि कोनी मानूस अपरो आप ला भविस्यवक्ता समझ सेत। मंग अपरो जुबान मा लगाम नहीं लगावसेत, उ अपरो मन ला धोखा मा राखयो हुया सेत, अखीन वोको भगती बेकार सेत। आमरो परमेस्वर अना अजी को नजर मा बिलकुल सफा अना निरदोस भगती यो से; मुसीबत मा पड़यो अनाथगिन अना बेवागिन को सुधि लेवनो, अना खुदच ला कोनी संसारिक बुराई लक बेदाग राखनो।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.