Powari Standard Project
पैदाइस 43
बिन्यामीन को मिसर देस जावनो
कनान देस मा भयानक गिरानी बढतो गयो। जब वा अनाज जोन वय मिसर लक लायो होतीन उ खत्म भयी गयो। तबा वोको अजी ना उन लक कह्यो मंग जायके जरा सो जेवन को चीज लेयके आव। तबा यहूदा ना वोला कह्यो, वोना मानूस ना अमीला चेताय के कह्यो, यदि तुम्हारो भाऊ तुमरो संग नही आहेत ता तुम मोरो समोर नही आय सका सेव। एकोलाय यदि तू आमरो भाऊ को संग मा धाड़ेत, तबा अमी जायके तोरो लाय जेवन को चीज आनबीन। बल्कि यदि तू वोला नही धाड़ेत ता अमी नही जाबीन। काहेका उ मानूस ना अमीला कह्यो होतो। यदी तुमरो भाऊ तुमरो संग नही आहेत ता तुम्ही मोरो पूढा नही आय सकत। तबा इसराइल ना कह्यो, “तुम्हि ना वोना मानूस ला असो काहे सागयो सेव का आमरो अखीन एक भाऊ से असो सांग के मोरो पर संकट काहे आनयो सेव?” तबा उन ना कह्यो, उ मानूस ना आमरो घराना ला जाना सेत असो परकार लक आमरो दसा पूसत होतो। का तुमरो अजी अबा तकन जिन्दो से? का तुमरो कोनी अखीन भाऊ से? तबा अमीना वोना जसो सवाल कियो होतो वसो अमीना जवाब दियो अमीला मालूम नही होतो का उ लहान भाऊ ला आनन को लाय कहेत। मंग यहूदा ना आपरो अजी इसराइल ला कह्यो, अपरो टूरा ला आमरो संग धाड़ तबा अमी जाबीन अना असो करनो मा सप्पा नही मरबीन पर आमरो लेकरा जिन्दो रहेत। मी वोको जुम्मेदारी लेवासू मोरोच हात लक तू वोला वापस लेवजोस। अदि मी वोला तोरो जवर आयके उभो नही करहीन ता मी हरामेसा को लाय दोसी बन जाहीन। यदि अमी लोक लक उसीर नही होतो ता अबा दोन बार आवनो जावनो भयी जातो। तबा उनको अजी इसराइल ना कह्यो, अदी सही मा असो गोस्टी से ता यो देस को कीमती-कीमती चीज गीनमा लक काही-काही अपरो बोरा मा वोना मानूस को लाय भेट बोरा मा भर के लेके जाव। जसो जरासो बलसान अखीन जरासो सहेद अना काही सुगन्ध वालो इतर अना पिस्ता बदाम अना मसाला। मंग आपरो संग दुगुनो सिक्का ले जाओ अना जोन सिक्का तुम्हारो बोरा को मुहडा मा राख के वापीस कर दियो गयो होतो। वोला भी धरके जाव कदी उनलक भूल भयी गयो होहेत। अपरो भाऊ बिन्यामीन ला भी संग लेके वोना मानूस को जवर जाव। अखीन सर्वसक्तीमान परमेस्वर वोना मानूस को कन लक तुमरो पर किरपा करहेत। जोन लक तुमरो भाऊ ला अना बिन्यामीन ला भी आवन देय अना मी बिना सन्तान को भयो ता कोनी गोस्टी नाहत। तबा वय मानूस गिन ना उ भेट अना दुगुनो सिक्का अखीन बिन्यामीन ला संग लेय के अना चल दियो अना मिसर मा जायके यूसूफ को पूढा उभो भयीन। उनको संग बिन्यामीन ला चोवके यूसूफ ना आपरो घर को अधिकारी लक कह्यो, इन मानूस गीनला घर मा पोहचा देव, अना जनावर मारके तैयार करो काहेका वय लोकगीन दुफारी मा मोरो संग जेवन करहेत। तबा उ अधिकारी ना यूसुफ को कव्हनो को अनुसार उनला यूसूफ को घर ले गयो। जब वय यूसूफ को घर मा पहुँचयो तबा वय आपस मा भेव खायके कव्हन लगीन जोन सिक्का पहलो बार मा आमरो बोरा मा आपीस गयो होतो। वोच कारन अमीला भीतर पहुँचायो गयो से। जोन कारन लक उ मानूस आमरो पर टूट पड़े। अखीन अमीला अधिन कर के अमीला दास बनायेत अना आमरो गढव ला भी हीसक लेहत। तबा वय यूसूफ को घर को अधिकारी को जवर जाय के घर को बेसकूड़ पर जायके असो परकार कव्हन लगयो। ओ आमरो मालीक! जब अमी पहेलो बार अनाज लेवन को लाय आयो होतो। तबा अमीना सराय में जाय के आपरो बोरा खोल्यो ता काजक चोयो का एक-एक मानूस को पूरो-पूरो सिक्का उनको बोरा को मोहडा मा धरयो से, एकोलाय अमीना वोला मंग आनयो सेजन। अना दूसरो सिक्का भी आमरो समान लेवन को काजी आनी सेजन। अमी ला मालूम नाहात का आमरो बोरा मा सिक्का कोन राखीसेस? वोना कह्यो तूम साजरो मानूस सेव नोको डराव। तुमरो परमेस्वर अना तुमरो अजी को परमेस्वर ना तुमरो बोरा मा धन दियो से। तुमरो सिक्का तो मोला मिल गयो होतो। मंग वोना सीमोन ला हेड़ के उनको संग कर दियो। तबा वोना मानूस ना वय मानूस गीनला यूसूफ को घर मा लेजाय के पानी दियो तबा उनना आपरो पाय धोयिन मंग गढव ला चारा दियो। तबा असो आयक के का अज अमीला यहान जेवन करनो पड़ेत, उनना यूसूफ को आवन को बेरा तक वोना भेट ला जमा करके राखीन। जब यूसूफ घरमा आयो तबा वय वोना भेट ला जोन उनको हात मा होतो जोन अपरो घर लक आनयो होतीन अना जमीन मा पड़ के वोको पूढा टोघरा टेक के परनाम करीन। वोना वोको कुसल पूसयो अना कह्यो का तुमरो बुड़गा अजी जोनको गोस्टी करत होतो का वो साजरो से? का उ अब तकन जिन्दो से? उनना कहीन हव तोरो सेवक आमरो अजी साजरो से। अना अब तकन जिन्दो से, तबा उनना वोला डोस्का नवा के मंग टोघरा टेक के परनाम करीन। तबा वोना डोरा उठा के अखीन अपरो सगो भाऊ बिन्यामीन ला चोवके, पूसयो, का तुमरो लहान भाऊ जोन को गोस्टी सांगत होतो योच से? मंग वोना कह्यो ओ मोरो टूरा परमेस्वर तोरो पर किरपा करे। तबा अपरो भाऊ को पिरेम लक दिल भरनो को कारन लक यूसूफ फटकन आपरो खोली मा गयो अना रोवन लगयो। मंग अपरो चेहेरा धोयके हिट के आयो अखीन आपरो आपला संभाल के कव्हन लगयो जेवन देव। तबा उनना वोको लाय अलग जेवन देयीन काहेका मिसरी इबरानी गीनको संग जेवन नही करत होतीन। काहेका असो करनो नीच काम समजत होतीन। तो यूसूफ को भाऊ वोको पूढा मोठो मंग लहान असो लाइन लक बस गयीन। असो चोवके वय अचरज लक एकमेक ला चोवन लगीन। तबा यूसूफ अपरो पूढा लक जेवन को चीज उचल-उचल के उनको जवर धाड़न लगयो। अना बिन्यामीन ला आपरो भाऊ गीन लक पाँच गुना जेवन को समान भेटयो अखीन उनना वोको संग लगत जेयीन।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.