Powari Standard Project
पैदाइस 40
बन्दी गिनला सपना को अरथ सांगनो
येना घटना को काही बेरा मघानी मिसर देस को राजा को पिलानवारो, अना हान्डी राँधिया ना आपरो मालीक को बिरोध मा अपराध कियो होतो । तबा फराओ ना आपरो दुई अधिकारी पिवान वालो अखिन हान्डी रांधिया लक हिजड़ के, उनला यूसूफ राजा को जोन जेलमा होतो, वोच जेल मा उनला डाक दियो। तबा जेलर ना यूसूफ ला मुनीम बनाके उनको देखरेख करन को काम सोपयो। उ उनको सेवा करन लगयो का काही दिवस वय जेल मा रव्हे। एक दिवस मिसर देस को राजा को पिलावन वालो, अखिन हान्डी रांधिया, दूई ना रातमा सपना चोवयो। हरेक सपना को एक खास मतलब होतो। सक्कारी यूसूफ उनला मिलन आयो ता, उनको टोन्ड मा बारा बज्यो होतो। तबा यूसूफ ना फराओ को अधिकारी गीनला चोवके कह्यो काजक भयि गयो अज तुमरो टोन्ड मा कसो उदासी से? तबा दूई ना कहीन अमीना एक-एक सपना चोयो सेजन जोनको मतलब सांगन वारो कोनी नाहती। यूसूफ ना कह्यो, का यो खरो नाहती? का सपना को अरथ सांगनो परमेस्वर को काम सेत। अबा मोला सपना आयकाव, तबा राजा ला पिवान वालो को मुखिया ना यूसूफ ला कह्यो, मीना सपना मा चोयो का मोरो पूढा अंगूर को बेला से, वोमा तीन डगाली से। वोमा लवकर कली लगयो अना फुलन फरन लगयो, अना लवकर च अंगूर को झोक्का पिक गयो। राजा फराओ को कप मोरो हात मा होतो, मी ना अंगूर निचोड़ के राजा को हात मा दियो। तबा यूसूफ ना वोको लक कह्यो, “तोरो सपना को अरथ यो से आयक, वय तीन डगाली तीन दिवस से, तीन दिवस को मघानी फराओ राजा तोरो पद लवटा देहेत, अना तू पयलेच जसो, राजा को हात मा कप देवजोस। जब तोरो भला भयी जाहेत तबा मोरो हेत करजोस। चोव! मी तोरो लक बिनती करासेऊ का मोरो पर दया करके फराओ लक मोरो बारेमा सांगजोस, अना मोला बाहेर हेड़वा देजोस। काहेका इबरानी गिनको देस लक मोला चोरा के यहान लायो गयो सेऊ। मीना असो कोनी काम नही करीसेऊ का मोला जेलमा रव्हनो पड़ेत।” असो चोवके का मोरो संगी को सपना को अरथ साजरो लक सांगी से राजा को हान्डी रांधिया यूसूफ लक कह्यो, मीना भी एक सपना चोयो सेऊ। मोरो डोका मा पांढरो भाकर को तीन दौड़ी सेत। वरता को दौड़ी मा राजा फराओ को लाय सब परकार को रांधा सेत पक्सी उनला चूग रहयो सेत। यूसूफ ना कह्यो, “एको मतलब यो से, तीन दौड़ी तीन दिवस से। अबा लक तीन दिवस को भितर मा फराओ राजा तोरो डोस्का धड़ लक बेगरो करवा के, तोला एक झाड़ मा टँगवा देहेत, अना पक्सी तोरो मांस ला के खाहेत।” तीसरो दिवस फराओ राजा को जलम दिवस होतो। वोना हान्डी राँधिया को मुखिया अना पिवान वारो ला जेल लक बुलवायो, अना सब करमचारी गिनको जेवन करवायो। अखिन करमचारी गिनको पूढा पिवान वारो ला साजरा कह्यो, अना पिवान वारो को पद मा दुबारा राख लियो। अना उ मंग फराओ राजा ला कप देवन लगयो। पर जसो यूसूफ ना सांगयो होतो वसोच, हान्डी राँधिया को मुखिया ला राजा फराओ ना झाड़ मा टँगाव दियो। पर राजा को पिवान वारो ना यूसूफ ला हेत नही करयो वा वोला बिसर गयो।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.