Powari Standard Project
पैदाइस 16
हाजिरा अना इस्माएल
अबराम की बायको सारै की कोनी सन्तान नहीं होती, अना ओको जवर हाजीरा नाव की एक मिसरी दासी होती। सारै ना अबराम लक कह्यो, “चोव, परमेस्वर ना ता मोरी कोख बंद करयो से, एकोलाय मी तोरो लक बिनती करूसू, का तू मोरी दासी को जवर जाय अना साईद मोरो घर ओको लक बस जाये।” सारय की यो गोस्टी अबराम ना मान लियो। एकोलाय जब अबराम ला कनान देस मा रह्यतो हुयो, दहा साल बीत गयो। तबा ओकी बायको सारै ना अपरो मिसरी दासी हाजीरा ला लेयके अपरो नवरा अबराम ना वोला दियो, का वा ओकी बायको होय। तबा अबराम हाजीरा को जवर गयो। अना वा पोट लक भयी, जब हाजीरा ना जान्यो का मी पोटलक सेऊ, तबा वा अपरी मालकीन ला अपरी नजर मा बेकार समजन लगीन। तबा सारै ना अबराम लक कह्यो, “जोन चोट मोला लगयो से ओको कारन तूच से। मीना तो अपरी दासी ला तोरी बायको कर दियो। पर जब ओना जान्यो का वा पोटलक से तबा लक वा मोला बेकार समजन लगी। एको लाय परमेस्वर मोरो अना तोरो बीच मा न्याय करे।” अबराम ना सारै लक कह्यो, “चोव तोरी दासी तोरो बस मा से, जसो तोला साजरो लगे वसोच ओको संग करो।” तबा सारै हाजीरा ला दुख देवन लगयो, अना वोको पूढा लक पराय गयो।
तबा परमेस्वर को दूत ना हाजीरा ला जंगल मा सूर को रस्ता मा पानी को एक पिझरा को जवर पाय के कह्यो, ओ सारै को दासी हाजीरा तू किता लक आयोसे अना किता कन जावासे? ओना कह्यो, “ मी अपरो मालकीन सारै को पूढा लक पराय के आई सेऊ।” परमेस्वर को दूत ना ओको लक कह्यो अपरो मालकीन को जवर लवट जाय अना ओको बस मा रव्ह। अना परमेस्वर को दूत ना वोको लक कह्यो, “मी तोरो खानदान ला लगत बढ़ाऊ यहान तकन की लगत होनको कारन कोनी वोको गिनती नही होय सका सेत। अना परमेस्वर को दूत ना वोको लक कह्यो, चोव तू पोट लक से अना टूरा पयदा करजो, तू वोको नाव इस्माएल रखजोस, एकोलाय परमेस्वर ना तोरो दुख को हाल आयक लियो से। अना तोरो टूरा जंगली गढव को जसो, होयेत, वोको हात सब मानूस को विरोध मा उठेत अना उ अपरो सब को हात ओको विरोध उठेत, अना उ अपरो सब भाऊ - बन्धु को विरोध मा निवास करेत।” तबा हाजीरा ना परमेस्वर को नाव जेन ओको लक गोस्टी करी होती, ओको नाव “चोवन वालो परमेस्वर” राख्यो काहेका वा कव्हत होती, “का मी ना सचमुच परमेस्वर ला चोवयो अना ओला चोवन को मघानी भी जीन्दी रही?” यो कारन लक उ बेहेर को नाव “जीन्दो मानूस को बेहेर जोन मोला चोवासे नाव पड़यो” ऊ ता कादेस अना बेरेद को बीच मा से।
हाजीरा1 ला अबराम को लक एक टूरा भयो, अना अबराम ना अपरो टूरा को नाव इस्माएल रख्यो। जब हाजीरा ना अबराम लक इस्माएल ला जलम दियो तबा वो बेरा अबराम छियासी साल को होतो।
Source notes (1)
- Cross-reference गलातियो 4:22
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.