Powari Standard Project
इफिसियो 3
गैरयहुदीगीन मा पौलुस को सेवा को काम
एकोलाई मि, पौलुस तुमी गैरयहुदीहुन लाई मसीह यीसु को काजी बन्दी सेव, तुमिलक एक बिनती करनो चाव्हसु। तुमरो कल्यान काजी बढ़ावा देवन को लाई परमेस्वर ना दया को संग जो काम मोला सोपीसेस, ओको बारे मा तुमीना जरुरच आयकयो होहे। का उ यो भेदभरी योजना दरसन को कन लक मोला दिसायी गयी होती, जसो की मि तुमला सार रूप मा लिख चुकी सेउ। अना अदि तुमी ओला वाचन करोह ता मसीह को बारे मा भेद भरयो सत्य मा मोरी बारिक नजर को समझ तुमला भय जाहेत। यो भेद बखान पयलो को पीढ़ी को लोकहून ला वसो नही दिसायो गयो होतो जसो अबा ओको आपरो पवितर पेरीत हुन अना भविस्यवक्ता हुन को आत्मा को कन लक दिसायो जाय चुकी से। यो भेद से का यहुदीहुन को संगा गैरयहुदी भी संग वारिस सेत, एकच देह को आंग सेत अना मसीह यीसु मा जोन बचन आमला दियो गयी से, ओमा संग हिस्सादार सेत।
साजरो बारता को काजी मि ओनो साजरो बारता को पिरचार करन वारा एक सेवक बन गयो, जोन ओको ताकत को जसो परमेस्वर को दया परमेस्वर को दियो दान को रूप मोला सोपयो गयो होतो। अदि अखिन सभच संतहुन मा मि नहानो लक भी नहानो सेउ पर मसीह को अमर धन रुपी साजरो बारता को गैरयहुदी मा पिरचार करन को यो दया मोला दियो गयो। अखीन मि सबच मानूसगिन पर उ भेद खोलन की कोसिस करुँह, जोन जुग-जुग लक सप्पा संसार को बनावनवालो परमेस्वर मा छुपयो रही से। एकोलाय अबा कलीसिया लक परमेस्वर को कई तरीका को गियान ओना मुखिया अना अधिकारी पर जोन सरगीय जघा मा सेति, प्रकट कियो जाहेत। ओना जूनो जमाना मनसा को जसो पुरो भयो जोन ओना आमरो पिरभु मसीह यीसु मा पुरो कियो होतो। मसीह पर बिस्वास को काजी आमी परमेस्वर तकन भरोसा अना निडरपन को संगा पहुच राखासेजन। एकोलाय मि बिनती करुसेव की जोन दुख तुमरो लाई मोला होई रही सेत, उनको लाई हिम्मत ठेवने, कायसेकि ओमा तुमरो महिमा सेत।
इफिसि लोकगीन को लाई मसीह को माया
मि योच लाई ओना मोठोबाबूजी को पुड़ा टोंगरा टेकसेऊ। ओकोच लक सरगमा अना धरती पर, हर एक घराना को नाव राखियो जावसे, मि पिराथना करुसेउ की उ आपरी महिमा को आपरो धन लक आपरी आतमा को कनलक तुमरो भीतरी मानुसपन ला ताकत रूप लक सक्ती देहे। अना भरोसा लक मसीह तुमरो दिल मा निवास करेत, तुमी जड़ अना पाया माया टिकेहेत। जेकोलक तुम्ही सबच पवीतर लोकगीन को सँगा यो समझन को सक्ति मिल जाहे का मसीह को माया केतरो फैलो, सबच जघा, मोठो अना गम्भीर से। अना तुमी मसीह को ओना माया ला जान लेव जोन सबच पिरकार लक गियान लक हटके से जेकोलक का तुमी परमेस्वर को सबच भरपुरी लक भरपुर होय जाहो।
अबा ओनो परमेस्वर को लाई जोन असो ताकतवर से, ओना ताकत कन लक जोन हमि मा काम करासे, की आमरी बिनती अना मन लक कहीं लगत बढ़के काम कर सकसे, ओको महिमा कलीसिया मा अना मसीह यीसु मा पीढ़ी लक पीढ़ी तकन जुग-जुग होवत रव्ह। आमीन।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.