Powari Standard Project
1 तीमुथियुस 5
दुसरो को लाय करतब
कोनी बुजुरुग ला नोको डाटजोस, पर वोला अजी समझ के आदर समेत समझाजोस, वसोच जुवान गीनला भाऊ समझके समझाजोस। सयानो आई-माई की माय समझके अना जुवान आई-माई गीन ला पवितर नजर लक बहिन समझके समझाय देवो।
वय बेवा गीन ला जोन सहि मा बेवा सेत वोकी मान-समान करो। अदि कोनी बेवा का लेकरा अना नाती पोता होयेत त पहेल वय अपरोच खानदान को संग मा भक्ति को व्यवहार करना अखिन अपरो माय-बाप अदि ला उनको हक देवनो सिकेत काहेकि यो परमेस्वर ला साजरो लगासे। जोन सहि मा बेवा से अना वोको कोनी नही उ परमेस्वर पर आस राखीसेस अना रात-दिवस बिनती अखिन पिराथना मा मगन रहवसे। पर जोन अइयासी मा पड गई वा जित्तो रव्हनो मा मरो जसो सेत। एना गोस्टी गीन ला भी हुकूम दियेके ताकी निरदोस रहेत। पर अदि कोनी अपरो की अना निज करके अपरो परिवार की चिन्ता नही करे त उ बिस्वास लक मुकर गईसे अना अबिस्वासी लक बुरो बन गयो।
वोना बेवा को नाव लिखो जाहे जोन साठ बरस लक कम की नही होहे अना एकच नवरा की बायको रही रव्हे। अना साजरो काम मा नामी रही रव्हे जेना न लेकरा गीन को लालन-पालन करी रहेस पावना गीन की सेवा करी रहेस पवीतर लोक गीन का पाय धोई सेस दुखी गीन मदद करीसेस अखिन हर एक को साजरो काम मा मन लगाई सेस।
पर जुवान बेवा गीन को नाव नोको लिखना काहेकी जबा वय मसीह को बिरोध करके सुख-विलास मा पड जासेत त बिहा करनो चाहवसेत। अना दोसी तय करासेत काहेकि उनना अपरो पहेल बिस्वास ला छोड़ देईसेत। एको संग-संग वय घर-घर हिंडके आलसी होवनो सिकासेत अना बल्की आलसी नही पर बक-बक करात ब्यस्त रव्हसेती अखिन दुसरो को काम मा हात भी डाकासेत अना अन्याई गोस्टी बोलासेत। एको लाई मी यो चाहवासेऊ का जुवान बेबा गीन बिहा करेत अना लेकरा ला पैदा करेत अना घर बार संभालेत अखिन कोनी बिरोधी ला बदनाम करनो को अवसर नही देहेत। काहेकी कई एक त बहेक के सैतान को मंघा भय गईन। अदी कोनी बिसवासीनि गीन को घर मा बेवा गीन सेत त वाच वोकी मदद करे का कलीसिया पर भार नही होय ताकी उ वोकी मदद कर सकासे जोन सही मा बेवा गीन से।
जोन सयानो साजरो इंतेजाम करासेत खास करके वय जोन बचन आयकावनो अना सिकावन मा महेनत करासेत दुई गुना मान-समान को कबील समझयो जाहे। काहेकी परमेस्वर को बचन मा लिखयो सेत “दावन को बईल को टोन्ड नही बांधना काहेकी महेनका अपरो हक महेनकाई से।” कोनी दोस कोनी सयानो पर लगायो जाहे त बिना दुई-तीन गवाह गीन को नही आयको। पाप करन वालो ला सब को पुढा समझाय देव ताकी अखिन लोक भी डराय हेत।
परमेस्वर अना मसीह यीसु अना बेचो हुया सरगदूत गीन ला हाजीर जानके मी तोला चेताय देसउ का तु मन उघाड़ के एना गोस्टी ला मानायके अना कोनी काम भेद-भाव लक नही करेहे। कोनी पर गदने हात नही राखनो अना दुसरो गीन को पाप मा सामिल नोको होवनो अपरो आप ला पवीतर बनाया राखेत।
भबिस्य मा बल्कि पानी को पीवन वालो नोको रव्ह पर अपरो पेट ला अना अपरो बार-बार बीमार होवन को कारन जरा-जरा अंगूर को रस भी काम मा आनके।
कोनी मानूस गीन को पाप परगट होय जासेत अना नियाव को लाई पहेल लक पहुच जासेत पर कोनी को मंघा लक आवासेत। वसोच कोनी साजरो काम भी परगट होवासेत अना जोन असा नही होवत वय भी लुकाय नही सकत।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.