Powari Standard Project
1 तीमुथियुस 1
अभिवादन
पौलुस ला अखिन जोन हमरो पाप मोचक परमेस्वर अना हमारो आस को अधार मसीह यीसु को हुकूम लक मसीह यीसु को पेरीत से। तीमुथियुस को नाव जोन बिस्वास मा सच्चो टूरा से परमेस्वर अजी अना हमरो पिरभु मसीह यीसु को कन लक तोला आसीरवाद अना दया अखीन सान्ती मिल रहीसे।
झुठो सिक्सागीन को बिरोध मा चेतावनी
जसो मीना मकीदुनिया जतो बेरा तुमला समझयो होतो का इफिसुस मा रहेके कोनी लोक गीन ला हुकूम देवजोस का खोटो सिक्सा नोको देवजोस। अना वय कहानी गीन अना कबच न खतम होवन वारो खानदान पर मन नोको लगावना जेनको लक झगड़ा राड होवासे अना परमेस्वर को वोनो इन्तेजाम को जसो नही जोन बिस्वास पर बनायो हुयो से वसोच मी कव्हसू। हुकूम को सार यो से का सुध्द अना सच्चो दिल, अना साजरो सच्चो अक्कल अखीन बीना कपट को बिस्वास लक पिरेम चोवाइस। इनला छोड़के केतरा लोकगीन बकवास को कना भटक गईन, अना मोसे को नियम को गुरु होवन चाव्हत होतीन, पर जोन गोस्टी कव्हत अना जिनको पिक्को रूप लक साँगत होतीन, उनला समझत भी नही।
पर आमी जानत होता की अदि कोनी मोसे को नियम को साजरो रिति लक काम मा आनत होतीन ता उ भलो से। यो जानके की मोसे को नियम न्यायी जन को साठी नाहती पर अधरमी गीन, बेलगाम महुन, बिन भक्तिवारा, पापी गीन, अपवितर गिन अना असूध्द मानूसगिन, माय बाबुजीगीन ला मारन वालो, जान लक मारनवालो, छिनरा करनवालो, मरद सँगा खोटो काम करन वालो, मानूस ला बिकनवालो, झुठो बोलनवालो ना झुठी किरया खानवालो, अना ऐको अलावा खरो उपदेस को सब विरोध करनवारा को साठी ठहरायो गई से। योच महान धन्य परमेस्वर को महिमा को ओना साजरो बारता को जसो से जोन बिस्वास मोला सौपयो गयो से।
किरपा को साठी धनवाद करनो
मि आपरो पिरभु यीसु मसीह को जोन ना मोला ताकत देईसेस, बिनती करुसेऊ की ओना मोला बिस्वास लायक समझ के आपरो सेवा को साठी ठहराईसेस। मि ता पुढ़ा बिरोध करनवालो अना सतावन वालो अना अँधेर करनवालो होतो; एको पर भी मोरो पर किरपा भयी, काहेकि मीना अबिस्वासी को दसा मा बिन समझे बुझयो यो काम कियो होतो। अना आमरो पिरभु को किरपा ओना भरोसा अना पिरेम को सँगा जोन मसीह यीसु मा से, लगत रिती लक भयो। यो गोस्टी खरो अना सब रीती लक बिस्वास को काबिल से की मसीह यीसु पापी गीन को सुटकारा देवन काजी दुनिया मा आयो, जोन मा सब लक मोठो मि सेऊ। पर मोरो पर एकोलाई दया भई का मोला सबच लक मोठो पापी मा यीसु मसीह अपरो पूरी धीरज लक देखो का जोन लोक वोनो अमर जीवन को लाई बिस्वास करो मी उनको लाई मी एक नमुना बनू। अबा अमर सनातन राजा अना कबच नास नही होवन वालो, जेनला चोवनो मा नही आयो, एकच परमेस्वर को मान अखिन महिमा जुग-जुग होवती रव्हे। आमेन।
अरे टूरा तीमुथियुस उन भविस्यवक्ता गीन को जसो जोन पहेल तोरो बिसय मा करी गई होती मी यो हुकूम सोपसेऊ का तु उनको जसो साजरी लडाई ला लडता हुया बुराई को सामना कर। अना बिस्वास अखिन वोना साजरो अक्कल ला थामो रहवो जोनला दुहुर करन को कारन केतरो गीन को बिस्वास रूपी जहाज डुबू गयो। उनको मा लक हुमिनयुस अना सिकन्दर राजा से जेनला मीना सैतान ला सोप दिया सेजन का उ परमेस्वर की निन्दा-बदी करन को नही सीके।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.