Powari Standard Project
1 थिस्सलुनीकियो 4
परमेस्वर ला खुस करन वालो जिता जिंदगी
अखट्ट मा अगा भाऊ हुन हमी तुमी लक पिरभू यीसु मा बिनती करके तुमला समझाव सेजन का, जसो तुमीना आमिलक काबिल चाल चलनो अना परमेस्वर ला खुस करन की सिक्सा पायासेव। अना जसो का तुमी सचमुच चला सेव। वसोच अखीन लगत बढत जावो। काहेकि तुमी जानासेव का हमी न पिरभू यीसु को कन लक तुमला कोन-कोन सो हुकूम देईसेजन। परमेस्वर की मरजी से का तुमी पवीतर बनो अना खोटो करम लक बचया रव्हो। का तुमी मा लक हर एक मानूस अपरी बायको को ईज्जत राखे अना पवीतर को संग पायो जानोसे। परजात गीन को जसो कामुक होयके नही जोन परमेस्वर ला नही जानासेत। का एना गोस्टी मा कोनी भी अपरो भाऊ को दोस नही करेहेत अना नही वोला ठगाहेत। काहेकी पिरभू एना सबरी गोस्टी गीन ला बदला लेवन वारा सेत जसो का हमीना पुड़ा च तुमला सांगीसेजन अना साजरी अक्ल लक चेताय भी सेजन। काहेकि परमेस्वर न हमला नीच काम को लाई नही पर पवीतर होवन लाई हाकलिसेस। एको कारन जसो जोन एला बेकार जानासे, उ मानूस ला नही पर परमेस्वर ला बेकार जानासे, जोन तुमला अपरी पवीतर आतमा देवासे।
अगा भाऊ पिरेम को बिसय मा यो जरूरी नही का मि तुमरो लाई काही लिखुह। काहेकी एक दुसरो लक पिरेम करनो तुमीना अपरो परमेस्वर कन लक सिकासो। काहेका तुम सचमुच पूरी मकीदुनिया को भाऊहुन को संग असोच बरताव करत होता पर भाऊ हून तुमरो लक बिनती करासेजन का अखीन बढता जावो। अखीन जसो हुकूम हमीना तुमला देई सेजन तुमी सान्ती लक जिंदगी की आस राखो, अपरो काम लक काम राखो अना अपरो हात गीन लक महेनत करो। जोको लक बाहेर वारा लक मान मिल सकेह अना तुमला कोनी चीज की आस नही रह।
पिरभु को दुबारा आवनो
पर अगा भाऊ हुन हमी नही चाव्हसेजन, का तुमी उनको बिसय मा अनजान रहवो। जोन सोय गईसेत अना काही लोक गीन को जसो सोकित होय जावो, जिनला आसा नाहती। हमी भरोसा करासेजन का यीसु मारयो गयो अना जितो भयो। एकोलाय परमेस्वर उनला भी जोन यीसु मा सोय गईसेत वोको संग मा आनहेत।
एना कारन हमी पिरभू को गोस्टी को लक तुमरो लक कव्हवसू का हमी जोन जित्तो सेजन अना पिरभू को आवन तकन बचया रहबोन अना सोया हुया लक कबच नही पुड़ा बढबोन। काहेकी पिरभू खुदच ललकार अना मुखिया सरगदुत ला हाकलके अखीन परमेस्वर की तुर्रा की आवाज को संग मा सरग लक उतरेत अखीन जोन मसीह मा मर गई सेत, वय पुड़ा जित्तो होयेती। तबा हमी जोन जित्तो सेजन अना बचयो रहेति उनको संग मा वारा मा पिरभू लक मिलन को लाई बादर पर उचाल लियो जावबिन। एना रिती लक हमी सदा पिरभू को संग रहबिन। एकोलाय एना गोस्टी गीन लक एक दुसरो ला सान्ती देवो।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.