Pjalm 59

1AI Kot, kom kotin dore ia la jan ai imwintiti kan, o kotin pera jan ia mon me palian ia.

2Dore ia la jan me morjued akan, o kotin jauaja ia jan me inon ion nta.

3Irail kin majamajan maur i, me kelail akan pokon pena on ia, a jota dip ai, o jota me jued kot, me i wiadar, Main leowa.

4Irail tan pena o kaonopada a jota dip ai. Kom kotin opada waja, o kotin ieian ia, o ireron mepukat.

5Main leowa, Kot Jepaot, Kot en Ijrael, kotin opada waja, o kotin kadeikada men liki kan karoj. Kom der maki on amen ir, me kin wia dip ni ar aklapalap.

6Nin jautik re kin puredo nunun dueta kidi kan, o re kin tanatan jili nan kanim o.

7Kom kotin mani, re kin lidelidu monin; kodlaj kan mi pan kilin au arail: Ij me pan ron?

8A komui, Main leowa, pan kotin kiparamat kin irail, o kom pan kotin kalij irail la.

9Kele pa i, i pan rukila re omui. Pwe Kot pere pa i.

10Kot kin kotin kajale on ia melel a kalanan; Kot kin kotin wiai on ia, i en peren kida ai imwintiti.

11Kom der kotin kame ir ala, pwe nai aramaj akan pan monokela, a kotin kamueit ir pajan ki omui mana, leowa pere pat, kajapoke ir ala.

12Dip eta lokaia en kilin au arail; i me re pan lokidi ni ar aklapalap; pwe re kin lokaia lalaue o likam eta.

13Kom kotin kawe ir ala o der maki on ir; kawe ir ala, pwe ren jolar meakot, ap aja, me Kot kotin kaunda kadaudok en Iakop o jap karoj.

14Nin jautik re kin puredo nunun dueta kidi kan, o re kin tanatan jili nan kanim o.

15Re kin tanatan jili rapaki kan ar mana, ap lipaned, ma re jota pan medila.

16A i pan kauleki duen omui manaman, o ni i manjan i pan kapina omui kalanan, pwe komui pere pa i o ai paip ni ran en ai apwal.

17I pan kauli on komui ai paip, pwe Kot pere pa i o ai Kot kalanan.