Pjalm 50

1KOT Ieowa manaman majanier o molipedo jappa jan ni tapin katipin lel ni a kiridi.

2Linan en Kot tapida jan Jion.

3Atail Kot kotido, o a jota kin kotin japaimokit. Kijiniai kelail kin tion mo a, o melimel laud kin mi impa.

4A kotin molipe lan o jappa, pwen kapunala japwilim a aramaj akan!

5Komail kapokon pena nai lelapok kan, me wiadar ar inau on ia ni anjau en mairon!

6Nanlan pan kajaleda a pun; pwe Kot kin kotin kadeikada.

7Komail nai aramaj akan ron, I pan padaki on komail. Ijrael, I pan kaparoki on komail: Nai Kot, om Kot.

8I jota pan kaloke uk pweki om mairon, pwe om mairon ijij kin wiaui on ia anjau karoj.

9Ari jo, I jota pan ale jan komail kau ol de kut o jip ol jan nan im omail.

10Pwe man en nan wei karoj me ai o pil man akan, me mimi pon nana kid pak toto.

11I aja manpir en nana karoj o jon en man karoj, me mi nan jap, kin mi re i.

12Ma I men manadar, I jota pan indan uk, pwe jappa me ai o audepa karoj.

13Da, koe lamelame, me I kin inon ion uduk en kau ol, de I men nim ntan kut ol?

14Maironki danke on Kot o kapunalan me Lapalap o om inau.

15Likwir don ia ni om injenjued, I ap pan dore uk ala, a koe pan kapina ia.

16A Kot kotin majani on me japun o: Da me koe kaparok duen ai kujoned akan, o lokaia kida au om duen ai inau,

17Pwe koe kin tateki tiak pun o mamaleki ai kujoned akan?

18Ma koe pan kilan lipirap amen, koe kin ian i, o koe kin waroki on me kamal akan.

19Au om kin lokaia kiwei me jued o lo om me likam.

20Koe kin wonon o lokaia likam duen ri om; o nain in om putak koe kin karaune mal.

21Koe wiada mepukat, a nai kin nenenla; koe ap kiki on, me nai dueta koe. A I pan kapun on uk o kajaleda mon maj om.

22Komail me mamaleki Kot, en aja, I pan kajor komail la o jota jauaj pamail pan mia.

23Me kin maironki danke, kin kapina ia; o i al o, me I pan kajale on i duen maur en Kot.