Kadede Kap Psam Akan
Psalm 116
I KIN pok ong Ieowa, pwe a kotin ereki ngil ai o ai ngidingid.
Pwe a kotin kapaike dong ia karong a, i me i pan likwir wong i arain maur i.
Sal en mela sali ia dier, o kamasak en pased lel ong ia, i lel onger kalokolok o mamauk.
I ap likwir wong mar en Ieowa: Maing Ieowa, kom kotin dorela maur i!
Ieowa me dir en mak o pung, o atail Kot me dir en kalangan.
Ieowa kin kotin apapwali me opampap akan; ngai luetalar, i ap kotin dore ia lar.
Ngen i pur ong om moleilei, pwe Ieowa kotin sauasa uk mau.
Pwe kom me kotin dorelar maur i sang nan mela, o por en mas ai sang sangesang, o nä i sang a pan krisedi.
I pan weweid mon Ieowa nan sap en me maur akan.
I liki, o i karepen ai padapadak; a i kin kalokolok laud.
I indinda ni ai insensued: Aramas karos me likam!
Iaduen i pan kak depuk ong Ieowa a kapai ia kan?
I pan ale dal en kamaur, o likwir ong mar en Ieowa.
I pan kapwai ong Ieowa ai inau sansal mon sapwilim a aramas akan karos.
Meid kasampwal ren Ieowa melan sapwilim a lelapok kan.
O Maing Ieowa, ngai sapwilim omui ladu men, ngai sapwilim omui ladu, nain omui lidu; kom kotin kamueit pasang ai sal akan.
I pan mairongki ong komui danke, o likwir ong mar en Ieowa.
I pan kapwai ong Ieowa ai inau sansal mon sapwilim a aramas akan karos,
Mon pera en tanpas omui im saraui, nan warong en Ierusalem. Aleluia!
Kadede Kap Psam Akan. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.