Luti

Shitabu sha

LUTI

ULONGULERU

Shitabu sha Luti shiyowelera mauzauza ga malawiru yagaweriti shaka shipindi sha kaya za wana wa Israeli. Shipindi sha watoza wa Israeli. Mawu gwa kaya ayi Naomi, imlangalira kwa shiyasi shikulu sha mpalu gwakuyi na wana wakuyi wapalu wahowiti shaka pawaweriti isi ya shihenga aku Mowabu, kumbiti Naomi kankiti tekelera kwa nahonga gwakuyi, Luti, mweni kalawiriti muisi ya Mowabu wagenditi mwanja kuwuya Israeli na kalongiti hakamtangi. Woseri Luti na Naomi wankiti tekelera shaka kaya ya Bowazi ililolera weri na kujimira kumyuga Luti. Shipindi shilii sha watoza shiweriti shidoda na Waisraeli wavuwa wakaliti pota Lagiru, kumbiti Naomi, Luti na Bowazi waweriti mfanu guherepa kwa wana Waisraeli yawaweriti wagafata malagaliru ga Mlungu. Kwa hera yakavimana mlemba gwa Luti. Shaka sha shitabu pashilembitwi viraa shimanika ndiri, kumbiti su wamonga walihola handa shilembitwi pa Waisraeli kulawira toziya ya luga ya Shibraniya yawatendiritwi. Ayi alama ya Luti mweni waweriti ndiri Muisraeli, Dawudi viraa ina mana kiziti kuwera ntumintumi gwa Yesu ilangulira handa mafira ga Mlungu galola ndiri kaya yagulawira kumbiti galola kumoyu.

YAGAWERAAMU

Shipandi sha kwanja shiyowelera kaya ya Naomi na ntambu yawalikomangiti na wankondu na viraa Naomi na Luti ntambu yawawuyiti Israeli.

Shipandi sha pili hatubetuli kuwera ntambu gaa Luti pakaliwoniti na Bowazi na ntambu yakasoliti mabenangu gakuyi.

Shipandi sha tatu shiyowelera ntambu gaa Naomi pakamlagaliti Luti kumkosiya Bowazi ntambu ya kumyuga na kumlolera toziya yomberi mpalu na mdala waweri pamuhera mundowa. Bowazi kamjimira kutenda Hangu.

Shipandi sha msheshi shiyowelera ntambu gaa Bowazi kahemeriti nguwu ya mpalu gwa Naomi yakahowiti na kumyuga Luti.