Nehemiya

Shitabu sha

Nehemiya

ULONGULERU

Shitabu sha Ezra na Nehemia shitakulira wantu wa Israeli ntambu yawajimiluwiti kuwuya Israeli, kwanja pawaweriti watolwa lopola kugenda kuuajemi na Babeli. Nehemia kaliholiti ntambu ya kunyawa kayi shibambaza kuguzyengeta mji gwa Yerusalamu. Wantu yawamana lagiru wavimaniti kuwera Ezra kalembiti na kujojonira ntambiru za shitabu sha 1 na 2 sha mirandu ya shaka na sha Ezra na Nehemia, handa ndiri Ezra mekaweri yumonga yakalembiti vitabu vya Nehemia, shiperiti kwanjira pakwegera na vinja miya msheshi na selasini pamberi pa kwiwuka kwa Yesu.

Nehemia kaweriti ntumintumi gwa kujega shakulanda sha Aritashasta mfalumi gwa uajemi, Nehemia kamluwiti Aritashasta kamjimiri kawuyi Yerusalemu kwa utanga toziya ya kunyawa kayi shibambaza sha mji gwa Yerusalemu. Aritashasta kamjimiliriti Nehemia kutenda hangu na kamsyaguliti Nehemia kaweli mkulu gwa Yuda na miji yaizyengeta Yerusalemu shipandi sha 5:14 tembera wantu wamonga wajeriti kumlewelera Nehemia nakanyawa kayi shibambaza sha Yerusalemu, kumbiti lihengu ali lipeliti mumashaka ga hamsini na mbili kwa utanga wa Mlungu. Kayi Ezra kamtangiti Nehemia kukolamlima wantu wa Israeli su kutenda kayi lipatanu lyawu na Mlungu.

Yagaweraamu ga Shitabu sha Nehemia

Nehemia ntambu yakanyawiti Yerusalemu na kulonguziya lihengu lya kunyawa kayi shibambaza sha Yerusalemu. Shipandi sha kwanja mpaka sha sita.

Waisraeli ntambu wanjiti kulikala Yerusalemu na kulikola lagiru lya Mlungu. Shipandi sha saba mpaka sha kumi na tatu.