Matayu

SHISOWERU SHIWAGIRA SHAKALEMBITI

MATAYU

ULONGOLERU

Shisoweru Shiwagira shakalembiti Matayu ndo muwamu mwa vitabu vyamsheshi Mulipatanu lyasyayi vyaviyowelera makaliru ga Yesu Kristu. Kila shimu shishemwa “Injili” mana yakuyi “Shisoweru Shiwagira.” Vitabu avi vilembitwi na Matayu na Mariku na Luka na Yohani. Wasomi wavimana ndiri tarehi ya kulembwa Shisoweru Shiwagira sha Matayu, pamonga shilembwa shinja sha sitini pakiwukiti Yesu. Na viraa wavimana ndiri koshi kwashilembitwi, kumbiti wavuwa walihola kuwera pamonga shilembwa Palestina ama mlushi lwa Yerusalemu.

Mlemba gwa shitabu ashi ndo Matayu yakaweriti mtola kodi pamberi pa Yesu kumshema kaweri mfundwa, viraa kamanikana kwa litawu lya Lawi. Matayu kaweriti yumu gwawu pakati pa wantumintumi walii kuminambili na kawalembiriti wasoma wa Shiyawudi. Ayi ilanguziya nakaka nentu mawuyiru sitini kwa malembu ga Shisoweru shigona. Kafiriti kulanguziya kuwera Yesu kaweriti Mlopola, Mlungu kamsyagula handa Mkombola na yomberi ndo yakatungitwi. Viraa Matayu kalembiti gavuwa kuusu ufalumi wa Mlungu. Wayawudi wamtumbira Mlopola hakizi kuwera mfalumi gwa ufalumi wa pasipanu. Matayu kaloliti weri kuusu njimiru ayi kwa kuyowelera ufalumi wa shirohu wa Mlungu.

Shisoweru Shiwagira shakalembiti Matayu ndo shitabu shiherepa kwanjira Lipatanu lya Syayi toziya ya mawuyiru gakuyi goseri ga Shisoweru Shiwagira shigona. Shitabu ashi shikolaniziya mapatanu mawili. Wasoma viraa wankutakula kuwera Matayu kajeriti kufata mfanu handa yaviwera vitabu vya Musa, vyeni ndo vitabu muhanu vya kwanja Mulipatanu ligona. Mabweru ga Yesu kulugongu, shipandi sha 5 mpaka sha 7 gaweza kulinganiziwa na Mlungu ntambu yakampananiti Musa malagaliru galii, Maholu 19:3-23:33.

Yagaweramu

Matayu kanja Shisoweru Shiwagira pakalonga kuusu kwiwuka kwa Yesu Kristu na kwanja kwa utenderu wakuyi, shipandi sha 1-4.

Shakapanu Matayu kalinginiziya utenderu wa Yesu na mafunda gakuyi gavuwa, shipandi sha 5-25.

Shipandi sha upeleru wa shitabu sha Matayu, Mlandu mkulu muutenderu wa Yesu gutakulira kuhowa kwakuyi na kuzyuka kwakuyi, shipandi sha 26-28.