Walonguziya

SHITABU SHA

WALONGUZIYA

ULONGOLERU

Shitabu sha Walonguziya ndo tambiru ya shaka sha isitoliya shashifatiti pa Waisraeli kuikankala na kuyikolamlima isi ya Kanani. Shiweriti ndo shaka sha makontola shashigenderana na vipindi vya madoda na ntabiku na kuyonelwa na shakapanu kukombuluwa. Waisraeli kwa ntambu yawu mewayanji kuguwira wamlungu wa shinyagu, shakapanu Mlungu kagajega maisi gamonga gizi na kuwayonera. Kulawa panu wantu mewalili na kumwuyira Mlungu, na panu Mlungu mekasyaguli walonguziya yawashemitwi “Walonguziya”, su kuwakombola wantu na kuwawusiya muumanda na kuwoneluwa.

Kwahera yakaweriti na unakaka wa gaa ndo yakashilembiti shitabu sha Walonguziya. Wantu wa makashu wajimiriti handa Samueli mbuyi gwa Mlungu ndo yakalembiti, kumbiti tuweza kuwera na unakaka nakamu handa shilembitwi mushaka sheni Israeli waweriti kala na mfalumi. Toziya shitabu shilola kumbeli na kulonga galii ga vyaka vya Walonguziya handa shaka shilii Israeli waweriti ndiri na mfalumi (shipandi 17:6; 18:1; 19:1; na 21:25). Handa Waisraeli walawiti kuumanda Misli pakati 1400 K.K (ayi ilanguziya malawiru yagaweriti mushitabu ashi gawera mushinja), 1300 mpaka 1050 K.K shaka Sauli pawamupiti utuwa kuwera mfalumi gwa Israeli.

Yagaweraamu

Shitabu ashi shankutambira visoweru vya nkondu za upeleru pakati pa Waisraeli na Wakanaani pa kuhowa kwa Yoshua. Viraa vipandi avi vivugula njira ya kumaniziya shaka sha Walonguziya palii Mlungu pakawasyaguliti walonguziya yawalonguziyiti na kuwalopola Israeli kulawa mumakakala ga wankondu wawu. Shipandi 1 mpaka 3:6

Viraa virii shitabu shitakula visoweru vya Walonguziya gwekagweka yawasyagulitwi na Mlungu kuwatanga Israeli. Shipandi 3:7 mpaka 16:31

Shakapanu shitakulira Waisraeli ntambu yawamleti Mlungu Shipandi 17 mpaka 21.

Upeleru ulanguziya Waisraeli ntambu yawamfiri mfalumi mguwira Mlungu su kawalonguziyi kutenda yagafiruwa kulongolu kwa Mlungu. Kuliku kuwera na walonguziya yawatenditi galii gawawona kuwera gaherepa walaweni.