Ezra

Shitabu sha

Ezra

Ulongoleru

Vitabu vya Ezra na Nehemia vitakulira ntambu Waisraeli pawajimilitwi kuwuya Israeli, shakapanu kutolwa wamanda aku Uajemi na Babeli. Ezra kayowelera nentu ntambu gaa yakunyawa kayi Numba Nkulu ya Mtuwa Mlungu aku Yerusalemu. Wabetula wavuwa wamjimira handa Ezra ndo yakalembiti shitabu sha mirandu ya shaka sha kwanja na sha pili na shitabu sha Ezra na Nehemiya. Handa ndiri Ezra, kwana muntu yumonga yakalembiti vitabu avi. Shitabu sha Ezra iwezakaniti shilembwa mushinja sha mia msheshi arubayini pamberi pa kwiwuka Kristu, kumbiti vipandi vimonga vya shitabu vilembwitwi vyaka vimonga.

Shitabu sha Ezra shilanguziya ntambu gaa Mlungu kamtenditi mfalumi Koreshi gwa Uajemi kuwajimilira Waisraeli kuwuya ukaya kwawu na kunyawa kayi Numba Nkulu ya Mtuwa Mlungu. Mlandu agu viraa guweriti gulanguziya umbuyi wa Yeremia utendekiti mshitabu sha Yeremiya, shipandi sha 29:10-14. Kuweriti muwamu mwa wankondu yawajeriti kulewelera kunyawa kayi Numba Nkulu ya Mlungu, hangu lihengu ali ligolokiti kwa shaka, Kumbiti Waisraeli waweziti kunyawa kayi Numba Nkulu ayi kwa kutangwa na Mlungu. Kwa ukolamlima wa Ezra viraavirii Waisraeli woyiti vidoda vyawu na kumgalambukira Mlungu. Mlandu agu guweriti mwanjiru gwa syayi gwa kulilaviya kwawu kwa kufata lagiru lya Mlungu.

Yagaweraamu mushitabu sha Ezra

Mfalumi koreshi kawajimiriti Waisraeli kuwuya ukaya kwawu na walanga ya kaya zyaziwuyiti. Shipandi sha kwanja na sha pili.

Numba Nkulu ya Mlungu yayiweriti Yerusalemu ntambu yayinyawitwi kayi. Shipandi sha tatu mpaka sha sita.

Ezra ntambu yakawuyiti Yerusalemu pakawera na kaya zimonga na Waisraeli. Shipandi sha saba na sha nani.

Ezra ntambu yakawalonguziyiti Waisraeli kutenda kayi lipatanu na Mlungu. Shipandi sha tisa mpaka kumi.