Daniyeli

Shitabu sha

Daniyeli

ULONGULERU

Shitabu ashi sha Daniyeli shitakulira makaliru na malola ga mbuyi gwa Mlungu Daniyeli shaka shilii wantu wa Israeli pawaweriti wamanda Babeli. Shitakulira Daniyeli na waganja wakuyi ntambu yawaweriti waminika kwa Mlungu, viraa shijega umbuyi kuwusu wantu wa maisi gamonga na pasipanu. Shitabu ashi shitakulila mirandu yayilawiriti mu shinja sha mia sita na mhanu mpaka mia tanu selasini na tanu K.K. Shaka Daniyeli pakaweriti kankatendera falumi gwekagweka za Babeli. Wasomi wa makashu wajimira kuwera Daniyeli ndo yakalembiti shitabu ashi pakaweriti Babeli, kumbiti wasomi wa vinu walonga shitabu ashi shilembitwi shakapanu mu Israeli, mkalini ya pili pamberi pa kwiwuka Yesu. Wamonga wajimira seemu ya shitabu ashi shilembitwi mshaka sha gwekagweka.

Shitabu sha Daniyeli shilembitwi toziya ya kujega litumbiru kwa wantu wa Israeli weni walikaliti muwuhamisiwu, viraavirii kwa wiwuka yawiza yawafira kulikala shaka sha ntabiku. Mlungu kalanguziya makakala gakuyi kwa wafalumi na wantu wa isi zimonga, kupitira mirandu yoseri yayilawiriti mumakaliru ga Daniyeli na muumbiyi wa mirandu yayiza. Kwa kulola biblia, shitabu ashi shitutanga kuvimana mirandu ya ufalumi wa Mlungu mlipatanu lya syayi. Kwa mfanu Masihi katakulitwi kala mushitabu sha Daniyeli shipandi 7:13-14. Daniyeli kawoniti malola shaka sha upeleru, geni gatakulilwa na Yesu (Matayu 24:15 Mariku 13:14) Viraa galifana na gakalembiti Yohana musihitabu sha ugubutulu. Daniyeli viraa kafananaziya na umbuyi wa Yeremiya (Daniyeli 9:1-3).

Yagawera amu

Shitabu ashi shitakulira Daniyeli na waganja wakuyi walikaliti Babeli shaka sha ukolamlima, Nebukaneza shipandi sha kwanja mpaka sha msheshi.

Shitabu ashi kayi Daniyeli kankutakulira malola gakuyi mfalumi Balishaza shipandi sha mhanu.

Shakapanu shitabu shitakulira Daniyeli mulilindi lya simba shaka sha ukolamlima wa mfalumi Daliusi shipandi sha sita.

Viraavirii shitabu ashi shitakulira Mlungu ntambu yakampanana Daniyeli ugubutulu gwekagweka wa malawiru yagiza. Daniyeli kankugatula pamuhera malola mawili ga shaka shashiza na mana zakuyi mshipandi sha saba mpaka sha nani, viraa Daniyeli kankawaluwira wantu wakuyi na malaika Gabulieli kamwankula mshipandi sha tisa viraa Malaika Gabulieli kagubutula mirandu ya kulikangasha kwa mfanu upeleru wa pasi panu.