Amosi 1

Toza kwa isi zimonga zya Israeli

1Avi ndo visoweru vya Amosi yumu gwa wachungaji wa wakanyama wa mji gwa Tekoa. Mlungu kamlanguziyiti Amosi mirandu yoseri ayi kuusu Israeli muvinja viwili pamberi pa lilendemeru lya isi, kayi shaka ashi Uziya kaweriti mfalumi gwa Yuda, Yereboamu mwana gwa Yoashi kaweriti mfalumi gwa Israeli. 2Amosi kalongiti hangu,

“Mtuwa Mlungu kankuguguma kulawa lugongu lwa Sayuni,

kaguguma kulawa Yerusalemu,

mpaka maliwuziwu ga washungaji gayuma,

ntundu kulugongu Karimeli zyanguyuma.”

Mlungu kankuyitoza Siriya

3Mtuwa Mlungu kalonga hangu, “Wantu wa Damesku watenda kayi vidoda, hangu, hapeninoyi kuwakomanga yawawatendera wantu wa Gileadi mirandu midoda. 4Su, hanilisulusiliri motu liboma lya mfalumi Hazaeli na hagulunguziyi nakamu maboma ga mfalumi Beni Hadadi. 5Hanigamegangi magomi ga Damesku na kuwatupula wenikaya wa lulalanda lya Aweni, pamuhera na mkolamlima gwa Beti Edeni. Wantu wa Aramu hawajegwi kuwuhamisiwu Kiri. Neni Mtuwa Mlungu ntakula.”

Mlungu kankuwatoza wantu wa Wafilisti

6Mtuwa Mlungu kalonga hangu, “Wantu wa Gaza watenda kayi vidoda na hapanindeki kuwakomanga. Wawatola wamanda wantu wa likabila loseri, wawawuziti waweri wamanda kwa wantu wa Edomu.” 7Hangu hanivisulusiliri motu vibambaza vya mji gwa Gaza gweni hagulunguziwi nakamu maboma gakuyi. 8“Wenikaya wa Ashidodi haniwagamiziyi pamuhera na wakolamlima wa Ashikeloni. Haniwakomangi wa Ekroni na Wafilisti woseri yawasigaliti hawalaguwi. Neni Mtuwa Mlungu ntakula hangu.

Mlungu kankuwatoza wantu wa Tiru

9Mtuwa Mlungu kalonga hangu, wantu wa Tiru wawera kayi na vidoda hangu hapeninoyi kuwakomanga. Toziya wawatoliti wantu waneni wa Israeli na kuwajegera Edomu, Waligalambuka lipatanu lya ugaja lyawaweriti walitenda.” 10Hanivijegeri motu vibambaza vya mji gwa Tiro, na kugalunguziya nakamu maboma gakuyi.

Mlungu kankuwatoza wantu wa Edomu

11Mtuwa Mlungu kalonga hangu, “Wantu wa Edomu watenda kayi vidoda, hangu hapeninoyi kuwakomanga. Toziya wawawinga walongu wawu Waisraeli kwa magumba, pota lusungu na walekandiri kuwakomanga mala kwa mala na maya gawu gaweriti mashaka goseri.” 12Hangu hanigujegeri motu mji gwa Temani na kugalunguziya nakamu maboma ga Bosira.

Mlungu kankuwatoza wantu wa Amoni

13Mtuwa Mlungu kalonga hangu, “Wantu wa Amoni watenda kayi makontola, hangu hapeninoyi kuwakomanga, toziya wawatumbuliti wadala yawana zinda muisi ya Gileadi, su kongera mbaka zawu.” 14Su, hanivijegeri motu vibambaza vya mji gwa Raba na kulunguziya nakamu maboma gakuyi. Shakapanu lishaka ali lya nkondu hapaweri na umatu mkulu na makomangu hagaweri makalipa handa lipuga. 15“Mfalumi gwawu na walonguziya wakuyi, woseri hawagendi kulikala muuhamisiwu. Neni Mtuwa Mlungu ntakula.”