Samueli

Shitabu sha pili sha

Samueli

ULONGULERU

Pa kwanja vitabu avi 1 Samueli na vya 2 Samueli shiweriti ndo shitabu shimu hera shikulu shimanikiti handa shitabu sha Samueli, kwa mala ya kwanja shitabu ashi shibagulitwi na kuwera vitabu viwili mu mulilaviwu lya Biblia lyawalishemiti, (Septuaginta). Ali liweriti lipatanu ligona muutakulu wa Shiebrania lyalilembitwi kwa Shiyunani. Shisoweru ashi Septuaginta shilanguziya lipatanu ali ligona Mushiyunani shilembitwi na wabetula sabini ama sabini na mbili Washiyawudi. Mumalembu ga Shiyunani, 1 Samueli na 2 Samueli vishemitwi 1 ufalumi na 2 ufalumi shakapanu mulilaviwu lya Biblia muutakulu wa Shilatini vishemitwi 1 Wafalumi na 2 Wafalumi aku vitabu vya ufalumi vyeni vishemwa 3 Wafalumi na 4 Wafalumi. Vitabu vya Samueli gwa kwanja na Samueli gwa pili vipapa malawiru ga historia ya kulikala kwa Samueli yakaweriti mbuyi gwa Mlungu na mfalumi Sauli na mfalumi Dawudi, Samueli kaweriti ndo mlonguziya gwa upeleru, shaka isi ya Israeli payigalambukiti kulawa kukolwamlima na walonguziya na kukolamlima na Wafalumi. Samueli ndo yakawamiminiliti lipaki Sauli na Dawudi kuwera wafalumi wawili wa kwanja wa Israeli. Vitabu avi 1 Samueli na 2 Samueli vitakulira kwa mngati histoliya ya Israeli kwa shaka ashi.

Kwahera yakavimaniti gaa ndo yakavilembiti vitabu vya Samueli gwa kwanja na gwa pili. Muntu yakalembiti kalikanda ndiri muvitabu avi kumbiti iranguziya kaweriti mkomu mushipindi sha upeleru sha mfalumi Dawudi ama nentu ya panu, viraa kaweriti na uwezu wa kuwona na kusoma vitabu vimonga vya matakuliru ga sauli na samueli. Toziya ya bada yayiweriti kwa walemba wa vitabu avi viraa vimanikana ndiri vilembitwi ndii.

Yagawera amu

Dawudi kawera mfalumi gwa Yuda na shakapanu kawera mfalumi yakawatenditi wantu wa Israeli woyeri, mushipandi 1 mpaka 5

Mfalumi Dawudi kankukola mlima na kuwakanka wankondu wakuyi wavuwa, mushipandi 6 mpaka 10

Mfalumi Dawudi kankutenda uhumba na kulaga shakapanu kakalipilwa na mbuyi gwa Mlungu Natani, mushipindi sha 11 na 12

Dawudi kankugalambukwa kwa vipindi viwili gwekagweka, mushipandi sha 13 mpaka 20

Kumalilira kwa zyuma za ukolamlima wa Dawudi handa mfalumi, shipandi sha 22 mpaka 24