Samueli

Shitabu sha kwanja sha

1 Samueli

ULONGULERU

Pa kwanja vitabu avi 1 Samueli na vya 2 Samueli shiweriti ndo shitabu shimu hera shikulu shimanikiti handa shitabu sha Samueli, kwa mala ya kwanja shitabu ashi shibagulitwi na kuwera vitabu viwili mulitolewu lya Biblia lyawalishemiti, (Septuaginta). Ali liweriti lipatanu ligona muutakulu wa Shiebrania lyalilembitwi kwa Shiyunani. Shisoweru ashi Septuaginta shilanguziya lipatanu ali ligona Mushiyunani shilembitwi na wasomi sabini ama sabini na mbili Washiyawudi. Mumalembu ga Shiyunani, 1 Samueli na 2 Samueli vishemitwi 1 ufalumi na 2 ufalumi shakapanu mulitolewu lya Biblia muutakulu wa Shilatini vishemitwi 1 Wafalumi na 2 Wafalumi aku vitabu vya ufalumi vyeni vishemwa 3 Wafalumi na 4 Wafalumi. Vitabu vya Samueli gwa kwanja na Samueli gwa pili vipapa malawiru ga historia ya makaliru ga Samueli yakaweriti mbuyi gwa Mlungu na mfalumi Sauli na mfalumi Dawudi, Samueli kaweriti ndo mlonguziya gwa upeleru, shaka isi ya Israeli payigalambukiti kulawa kukolwamlima na Watoza na kukolamlima na Wafalumi. Samueli ndo yakawaswagiti lipaki Sauli na Dawudi kuwera wafalumi wawili wa kwanja wa Israeli. Vitabu avi 1 Samueli na 2 Samueli vitakulira kwa mngati historia ya Israeli kwa shaka ashi.

Kwahera yakavimaniti gaa ndo yakavilembiti vitabu vya Samueli gwa kwanja na gwa pili. Muntu yakalembiti kalikanda ndiri muvitabu avi kumbiti iranguziya kaweriti mkomu mushipindi sha upeleru wa mfalumi Dawudi ama nentu ya panu, viraa kaweriti na uwezu wa kuwona na kusoma vitabu vimonga vya matakuliru ga sauli na samueli. Toziya ya bada yayiweriti kwa walemba wa vitabu avi viravi vimanikana ndiri vilembitwi ndii ama koshi.

Yagawera amu

Kwiwuka na kushemuwa kwa Samueli yakaweriti ntumintumi gwa Mlungu. Mushipandi sha 1 mpaka sha 3

Mushitabu ashi ilanguziya Lisandiku lya Lipatanu lya Mtuwa Mlungu litolwa na Wafilisti na kutenda isi ya Wafilisti kwagamira. Mushipandi sha 4 mpaka sha 7

Waisraeli wafira mfalumi na Samueli kamlumika Sauli kaweri mfalumi gwa kwanja kumbiti shakapanu Mlungu kamlema Sauli. Mushipandi sha 8 mpaka sha 15

Shakapanu tumwona Samueli kankumlumika Dawudi kuwera mfalumi badala ya Sauli mushipandi sha 16 mpaka sha 31