1 Mirandu

Shitabu sha

Mirandu ya shaka

ULONGULERU

Shitabu sha 1 na sha 2 sha Mirandu ya shaka shiweriti shimuhera na shikulu. Shanjiti kubagulwa kuwera vitabu viwili palii Biblia ya shiebrania payanjiti kulembwa kwa Shiyunani na kushemwa Septuanta. Mana ya Mirandu ya shaka Shiebrania ndo, “Mirandu yayilawiriti mumashaka aga.” Wabetula wavuwa wajimira handa Ezra ndo yakalembiti na kujojonira shitabu sha 1 na sha 2 sha Mirandu ya shaka viraa vitabu vya Ezra na Nehemiya. Mlemba katendera vyanjiru vivuwa nentu muvitabu vya Samueli na Wafalumi, kulemba vitabu avi. Wabetula wavuwa wavimana handa vilembitwi shinja sha mhanu na nusu pamberi pa kwiwuka kwa Kristu, iwezekana kuwera shaka Ezra pakaweriti mkomu.

Shitabu sha 1 na sha 2 sha Mirandu ya shaka shibagula vipinga vya wazewi kwanjira Adamu mpaka Ibrahimu na ntambu ya yanjiti isi ya wantu wa Israeli mpaka Waisraeli pawawuyiti kulawa muuhamisiwu kwawatolitwi kuwera wamanda. Kwanjira shaka ashi Mirandu ya shaka shitakulira historia ya wantu wa Israeli kulawa kumalilira mirandu ya mfalumi Sauli mpaka mji gwa Yerusalemu paguhalibisiwitwi na wantu wa Babeli. Muvitabu avi vyoseri vya Mirandu ya shaka, mlemba katakulira nentu kuusu mirandu ya numba nkulu ya Mlungu aku Yerusalemu. Dawudi katanditi vintu vivuwa toziya ya kunyawa numba nkulu ya Mlungu (1 Mirandu ya shaka 28-29) Na kulawa panu Selemani mwana gwa Dawudi ndo yakanyawiti (2 Mirandu ya shaka 2-7). Mlemba gwa Vitabu vya Mirandu ya shaka katakulira ntambu yayihalibisitwi numba nkulu ya Mlungu na vyombu vyakuyi ntambu yavitolitwi (2 Mirandu ya shaka 36:15-21). Upeleru wa msitari gwa shitabu sha 2 Mirandu ya shaka (36: 23) ilanguziya pota kufifa numba nkulu ya Mlungu ntambu hayinyawiwi kayi.

Yagaweraamu mushitabu sha 1 sha Mirandu ya shaka:

Shitabu ashi shitakulira matawu goseri ga wantu kwanjira Adamu mpaka Waisraeli ntambu yawawuyiti kwawatolitwi umanda. Shipandi sha 1-9

Shitabu ashi shitakulira kuusu kulikali kwa Dawudi na ntambu yakakolitimlima aku Israeli. Shipandi sha 10-29