Pengo Bible
ତିତସ୍ 3
କ୍ରିସ୍ଟିୟାନ୍ ଚିନ୍ତା
ଆଦିକାରି ଆରି ଆଦିକାର୍ ପାୟାତି ମୁଣିକାରିଂ ତଲ୍ୟାର୍ ଆରି ବଲତ୍କାର୍ ଆଦେଂ ଆରେ, ସବୁ ବାନିନି ହାର୍ଦି କାମାୟ୍ କିନାକାର୍ କାଜିଂ ଜାଲ୍ଦି ଆଦେଂ, ଇନେରିଂ ନିନ୍ଦା କିୱାଦାଂ, ଇନେରିଂ ବେରୁ ଆୱାଦାଂ, ହୁଦାର୍ ଆଦେଂ, ଆରେ ୱିଜ଼ାର୍ ଲକୁ କାଜିଂ ସବୁ ବାନି କୱାଣ୍କାତା ଚଚ୍ଚେଙ୍ଗ୍ ହେୱାରିଂ ଏତ୍ କିଇକିୟାଟ୍ । ଇନାକିଦେଂକି ଆଗେ ଆପେଂ ପା ବୁଜାୱାଦାଂ, ଅମାନ୍ୟା, ବାମ୍ଣ୍ଡାନାର୍ ଆରେ ବାର ବିନି ବାନ୍ୟାଲାବ୍ଡ଼ି ଆରି ସୁକ୍ବଗ୍ନି ଆଡ଼ିଏନ୍ ମାଚାସ୍, ଡାରା ଆରି ଆକାର୍ତ ଦିନ୍ ହାଚ୍ଚି ମାଚାସ୍, ଆରେ ଗିଣ୍କିନାକାର୍ ଆଜ଼ି ହାରି ଗିଣ୍ କିଜ଼ି ମାଚାସ୍ । ମତର୍ ଏଚେକାଡ଼୍ଦ ମା ମୁକ୍ତିକିନାକାନ୍ ଇସ୍ୱର୍ତି ଦୟା ଆରି ମାନାୟ୍ ଜାତି କାଜିଂ ହେୱାନ୍ତି ଜିଉନନାକା ହତ୍ତାତ୍, ହେ ପାଦ୍ନା ହେୱାନ୍ ମା କିତି ଦାର୍ମିକାରୁମ୍ କାଜିଂ ଆକାୟ୍, ମତର୍ ଜାର୍ତି ଦୟା ଇସାପ୍ତାଂ ଆରେଜଲମ୍ନି ନୁଜ଼୍ୟାତାକା ଆରି ପୁଇପୁୟା ଜିବୁନ୍ତି ପୁନାକା ହୁଦାଂ ମାଦାଂ ମୁକ୍ତି କିତ୍ତାନ୍ନା; ହେ ପୁଇପୁୟା ଜିବୁନ୍ତିଂ ହେୱାନ୍ ମା ମୁକ୍ତି କାରିୟା ଜିସୁ କ୍ରିସ୍ଟତି ହୁଦାଂ ବେସିଲାକେ ମା ଜପି ୱାକ୍ତାତାନ୍, ଇନେସ୍ ଆସେଙ୍ଗ୍ ତା ଉପ୍କାର୍ତାଂ ଦାର୍ମିନିକାନ୍ ଇନ୍ୟା ଆଜ଼ି ବାର୍ସିତାଂ ୱିଜ଼୍ୱି ଜିବୁନ୍ନି ଆଦିକାରି ଆନାପ୍ । ଇ କାତା ହାତ୍ପାପାର୍ତି, ଆରେ ଇନେସ୍ ଇସ୍ୱର୍ତାକେ ପାର୍ତି କିୱାକାର୍ ୱିଜ଼ାର୍ ସତ୍କାମାୟ୍ତ ଲାଗିସ୍ ମାଞ୍ଜେଙ୍ଗ୍ ମାନ୍ଦ୍ୟାନ୍ ଆନାର୍ ।
ଇଦାଂ କାଜିଂ ଇ ସବୁ ବିସ୍ରେ ଡାଟ୍ କିଜ଼ି ହିକ୍ୟା ହିୟାଟ୍ ଇଞ୍ଜି ନା ଇଚା । ଇ ସବୁ ବିସ୍ରେ ମାନାୟାର୍ତି ପାକ୍ୟାତାଙ୍ଗ୍ ନେକ୍ରାକା ଆରି ଉପ୍କାର୍ନିକା । ମତର୍ ପଲ୍ୟା ଇନ୍ବାଆନାକା, ବିରୁତ୍ ଆରି ମସାତି ବିଦି ବିସ୍ରେ ଜିକାଟାଣାତାଂ ବିନେ ଆଡୁ, ଇନାକିଦେଂକି ହେ ସବୁ ବୁଡାନାକା ଆରି ଆହାର୍ । ଇମ୍ଣି ମାନାୟ୍ ବାମ୍ଣ୍ଡାୟ୍କିନାକାର୍, ତାଙ୍ଗେଙ୍ଗ୍ ରଗ, ରିହା ଲେତ୍ତି ପାଚେ ତା ତାକେଣ୍ଡାଂ ବିନେ ମାନାଟ୍; ଏପେଙ୍ଗ୍ ପୁଚାଦେର୍ଣ୍ଣା ଏଲେଙ୍ଗ୍ ମାନାୟ୍ ଜେ ହାଜ଼ି ବାଣାତାର୍ଣ୍ଣା ଆରି ପାପ୍ କିଜ଼ି ଜାର୍ତିଂ ନିଜେ ଦସ୍ କିନାନ୍, ଇଦାଂତ ଏପେଙ୍ଗ୍ ପୁନାଦେର୍ ।
ହାରିହାରାନି କାତା
ଏଚେକାଡ଼୍ଦ ଆନ୍ ମି ତାକେ ଆର୍ତେମାଙ୍ଗ୍ କି ତୁକିକତିଙ୍ଗ୍ ପକ୍ତାନାଂ, ହେ ପାଦ୍ନା ନିକପଲିତିଙ୍ଗ୍ ନା ତାକେ ୱାନି କାଜିଂ ଜାତୁନ୍ କିୟାଟ୍, ଇନାକିଦେଂକି ହେବେ ପିନି ମାସ୍ତ ମାଞ୍ଜେଙ୍ଗ୍ ଆନ୍ ତିର୍ କିତାଂନ୍ନା । 1ମସାତି ବିଦିନି ସାସ୍ତର୍ତ ଗୁରୁ ଜିନା ଆରି ଆପଲ୍ଲଙ୍ଗ୍ ଜାତୁନ୍ତାଂ ହାଜ଼ି ଚଚାଟ୍, ଇନେସ୍ ହେୱାର୍ତି ଇମ୍ଣି ଅକେଟ୍ ଆଉତ୍ । ମା ଲକୁ ପା ଲଡ଼ା ଉପ୍କାର୍ କାଜିଂ ମା ମାନାୟାର୍ ସତ୍ କାମାୟ୍ତ ମାଞ୍ଜେଙ୍ଗ୍ ସମାନ୍ ଆଡ ଇନେସ୍ ଅଲ୍ଗା ମାନ୍ ଆମେର୍ ।
ନା ଲାହାଙ୍ଗ୍ ମାନି ୱିଜ଼ାର୍ ମିଙ୍ଗେଙ୍ଗ୍ ଜୱାର୍ ଜାଣାୟ୍କିଦ୍ନାରା । ପାର୍ତି ବିସ୍ରେ ଇନେର୍ ମାଙ୍ଗେଙ୍ଗ୍ ଜିଉ ନଦ୍ନାର୍, ହେୱାରିଂ ଜୱାର୍ ଜାଣାୟ୍କିୟାଟ୍ । ମି ୱିଜ଼ାକାଦେର୍ କାଜିଂ,
ଇସ୍ୱର୍ତି ଦୟା ଆଦେତ୍ ।
Source notes (1)
- Cross-reference ପକ୍ୟାତାକା ୧୮:୨୪; ୧ କରନ୍ତିୟ ୧୬:୧୨.
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.