Pengo Bible
ନେହିମିୟା 6
ନିହିମିୟା ବିରୁଦ୍ତ କୁଟ୍
ଇଦାଂପାଚେ ଆନ୍ ଡାଣ୍ଡ୍କାତି ରଚ୍ଚାଙ୍ଗ୍ନା ଆରି ତା ବିତ୍ରେ ଆରେ ଡ୍ରିଙ୍ଗ୍ତିବାହା ହିଲୁତ୍, ଇ କାବୁର୍ ସନ୍ବଲ୍ଲଟ୍ ଆରି ଟବିୟ ଆରି ଆରବିୟ ଗେସମ୍ ଆରି ମା ବିନ୍ବିନ୍ ସାତ୍ରୁର୍ ପୁଚିସ୍; ଇ ସମୁତ ଆନ୍ ଗାଡ଼୍ଦୁୱେର୍ ସବୁତ କାପାଟ୍ ଲାଗାୟ୍ କିୱାଦାଂ ମାଚାଙ୍ଗ୍ । ହେପାଦ୍ନା ସନ୍ବଲ୍ଲଟ୍ ଆରି ଗେସମ୍ ନା ଲାଗାଂ ମାନାୟ୍ ପକ୍ଚି ଇଞ୍ଚାନ୍, “ୱାଡ, ଆସେଙ୍ଗ୍ ଓନ ପଦାବାର୍ତି ଇମ୍ଣି ର ନାସ୍ତ ରୁଣ୍ଡା ଆନାସ୍ ।” ମତର୍ ହେୱାର୍ ନାଙ୍ଗ୍ ନସ୍ଟ କିଦେଂ ବିଚାର୍ କିଜ଼ି ମାନ୍ଚାର୍ । ଇବେ ଆନ୍ ହେୱାର୍ ଲାଗାଂ ଦୁତ୍କୁ ପକ୍ଚି ଇଚାଙ୍ଗ୍, “ଆନ୍ ର ଗାଜା କାମାୟ୍ କିନାଙ୍ଗା, ଇଦାଂ କାଜିଂ ଜୁଜ଼ି ୱାଦେଂ ଆଡୁଙ୍ଗ୍; ମି ଲାଗାଂ ଜୁଜ଼ି ହାଲ୍ଜି ଇନେକିଦେଂ କାମାୟ୍ ବନ୍ଦ୍ କିନାଙ୍ଗ୍ ?” ଇ ବାନି ହେୱାର୍ ଚାର୍ ହଟ୍ ନା ଲାଗାଂ ମାନାୟ୍ ପକ୍ତାତାର୍; ମତର୍ ଆନ୍ ହେୱାରିଂ ହେ ବାନି ଉତର୍ ହିତାଂ । ଇଦାଂପାଚେ ସନ୍ବଲ୍ଲଟ୍ ଜାର୍ ଆଡ଼ିଏନ୍ କେଇଦ ଉଚୁକ୍ ମେଲା ଚିଟି ହିଜ଼ି ପାଞ୍ଚ୍ ହଟ୍ ହେ ବାନି ନା ଲାଗାଂ ପକ୍ତାତାନ୍ । ହେବେ ଇଦାଂ ଲେକାମାଚାତ୍, “କୁଟୁମ୍ ବିତ୍ରେ ଇ ମାନାୟାର୍ ୱେନାରା, ପା ଗସ୍ମୁ ଇଦାଂ ଇନାନା ଜେ, ଏପେଙ୍ଗ୍ ଆରି ଜିହୁଦିର୍ ରାଜା ବିରୁଦ୍ତ କାମାୟ୍ କିଦେଂ ବିଚାର୍ କିନାଦେରା; ହେଦାଂ କାଜିଂ ଏପେଙ୍ଗ୍ ଡାଣ୍ଡ୍କାତି ରଚ୍ନାଦେରା; ଇ ମାନାୟାର୍ ପୁଚି ଇସାବ୍ରେ ଏପେଙ୍ଗ୍ ହେୱାର୍ତି ରାଜା ଆଦେଂ ଇଚା କିନାଦେରା । ଆରେ ଜିହୁଦାତି ର ରାଜା ମାନାନ୍ ଇଞ୍ଜି ଜାର୍ ବିସ୍ରେ ଜିରୁସାଲମ୍ତ ସୁଣାୟ୍ କିନି କାଜିଂ ଏପେଙ୍ଗ୍ ବେଣ୍ବାକ୍ଣାୟ୍କିନାକାର୍ରିଂ ବାଚି କିତାର୍ଣ୍ଣା; ଇ ମାନାୟ୍ ଆଲି ରାଜା ଲାଗାଂ ଏକାନାତ୍ । ଇଦାଂ କାଜିଂ ନଙ୍ଗ୍ ୱାଡ, ଆସେଙ୍ଗ୍ ରବେ ବେଣ୍ କିନାସ୍ ।” ପାଚେ ଆନ୍ ତା ଲାଗାଂ ଇଞ୍ଜି ପକ୍ତାଙ୍ଗ୍, “ଏପେଙ୍ଗ୍ ଇନାକା ଇନାଦେରା, ହେ ଲାକେ ଇମ୍ଣି କାମାୟ୍ କିୟାଆଉତା; ଏପେଙ୍ଗ୍ କେବଲ୍ ଜାର୍ ମାନ୍ତାଙ୍ଗ୍ ହେଦାଂ ସବୁ ହାନ୍ଦାୟ୍ କିନାଦେରା ।” ଇ କାମାୟ୍ତ ହେୱାର୍ତି କେଇ ନାଦାର୍ ଆତିସ୍ ହେଦାଂ ୱିସୁତ୍ ଇଞ୍ଜି ହେୱିଜ଼ାର୍ ମାଙ୍ଗେଙ୍ଗ୍ ପାଣ୍ଡ୍ରା ଆଦେଂ ଇଚା କିତାର୍; ଲାଗିଂ ଏ ପର୍ମେସ୍ୱର୍, ନା କେଇ ବାଡ଼୍କାସ୍ କିଦା ।
ଇଦାଂ ପାଚେ ମହେଟବେଲନି ନାତି ଦଲାୟନି ମାଜ଼ି ଇମ୍ଣି ସମୟିୟ ଇଞ୍ଜ ମାଚାତ୍, ଆନ୍ ହେଦାଂ ଇଞ୍ଜ ହାଚାଙ୍ଗ୍, ପାଚେ ହେୱାନ୍ ଇଞ୍ଚାନ୍, “ଆସେଙ୍ଗ୍ ପର୍ମେସ୍ୱର୍ତି ଇଞ୍ଜ, ମନ୍ଦିର୍ ବିତ୍ରେ ରବେ ଆନାସ୍ ଆରି ମନ୍ଦିର୍ନି ଦୁୱେର୍ସବୁ ବନ୍ଦ୍ କିନାସ୍; ଇନେକିଦେଂକି ହେୱାର୍ ମିଙ୍ଗେଙ୍ଗ୍ ଅସ୍ତେଦେଂ ୱାନାର୍; ମ୍ଡିକାଲିଂ ହେୱାର୍ ମିଙ୍ଗେଙ୍ଗ୍ ଅସ୍ତେଦେଂ ୱାନାର୍ ।”
ପାଚେ ଆନେଙ୍ଗ୍ ଇଚାଙ୍ଗ୍, “ନା ଲାଗ୍ଦି ମାନାୟ୍ ଇନାକା ହନ୍ନାନ୍ ? ନା ଲାକେ ଆଜ଼ି ଜିବୁନ୍ ବାଚାୟ୍କିନି କାଜିଂ ଜେ ମନ୍ଦିର୍ ବିତ୍ରେ ହାନାନ୍, ଏଲେଙ୍ଗ୍ ଇନେର୍ ମାନାନ୍ ? ଆନ୍ ବିତ୍ରେ ହାଲୁଙ୍ଗ୍ ।”
ମତର୍ ଆନ୍ ଚିନ୍କିତାଙ୍ଗ୍, ଆରେ ହୁଡ଼ାଟ୍, ପର୍ମେସ୍ୱର୍ ତାଙ୍ଗେଙ୍ଗ୍ ପକ୍ୱାଦାଂ ମାଚାନ୍; ଆତିସ୍ପା ହେୱାନ୍ ନା ବିରୁଦ୍ତ ଇ ବେଣ୍ବାକ୍ଣାୟ୍କିନି ବଚନ୍ ପର୍ଚାର୍ କିତାନ୍; ଆରେ, ଟବିୟ ଆରି ସନ୍ବଲ୍ଲଟ୍ ତାଙ୍ଗେଙ୍ଗ୍ ବୁତି ହିଜ଼ି ମାଚାନ୍ । ଆନ୍ ଇନେସ୍ ପାଣ୍ଡ୍ରା ଆନାଙ୍ଗ୍ ଆରି ହେ କାମାୟ୍ କିଜ଼ି ପାପ୍ କିନାଙ୍ଗ୍, ଆରେ ହେୱାର୍ ଇନେସ୍ ନାଙ୍ଗେଙ୍ଗ୍ ହପ୍ତିନି କାଜିଂ ନା ବଦ୍ଲାମ୍ନି କାରଣ୍ ପାୟାନାର୍, ଇ ଉଦେସ୍ତ ତାଙ୍ଗେଙ୍ଗ୍ ଡାବୁଙ୍ଗ୍ ହିଜ଼ି ମାଚାର୍ ।
ଏ ନା ପର୍ମେସ୍ୱର୍, ଟବିୟ ଆରି ସନ୍ବଲ୍ଲଟ୍ନି ଇ ସବୁ କାମାୟ୍ ଇସାବ୍ରେ ହେୱାରିଂ, ଆରେ ନାଙ୍ଗେଙ୍ଗ୍ ପାଣ୍ଡ୍ରୁ କିଦେଂ ଇଚା କିତାର୍ ଜେ ନୟଦିୟା ବେଣ୍ବାକ୍ଣାୟ୍କିନାକାର୍ ଆରି ବିନ୍ବିନ୍ ବେଣ୍ବାକ୍ଣାୟ୍କିନାକାର୍, ହେୱାରିଂ ଏତୁ କିୟାଟ୍ ।
ଡାଣ୍ଡ୍କାତି କାମାୟ୍ ସେସ୍ ଆତାତ୍
ପାଚେ ବାବନ୍ ଦିନ୍ ବିତ୍ରେ ବଦ ଇଲୁଲ୍ ମାସ୍ନି ପଚିସ୍ତମ୍ ଦିନ୍ ଡାଣ୍ଡ୍କାତି କାମାୟ୍ ୱିଜ଼୍ତାତ୍ । ଆରେ, ମା ସାତ୍ରୁ ୱିଜ଼ାର୍ ଇଦାଂ ୱେଚିଲେ, ଏଲେଙ୍ଗ୍ ଆତାତ୍ ଜେ, ମା ଚାର୍ବେଣ୍ତାଂ ବିନ୍ ଦେସ୍ନି ୱିଜ଼ାର୍ ପାଣ୍ଡ୍ରା ଆତାର୍ ଆରି ଜାର୍ କାଣ୍କୁକାଂ ହାତ୍ପାନେ ଲାଜା ଆତାର୍, ଇନେକିଦେଂକି ଇ କାମାୟ୍ ଜେ ମା ପର୍ମେସ୍ୱର୍ତି ନିପଣ୍ଡାଂ ଆତାତ୍, ଇଦାଂ କୁଟୁମ୍ ବୁଜାଆତାର୍ ।
ଆରେ, ହେ ସମୁତ ଜିହୁଦାନି କୁଟୁମ୍ନିକାର୍ ଟବିୟ ଲାଗାଂ ବେସି ଆକି ଲେକି କିସି ପକ୍ତାତାର୍ ଆରି ଟବିୟନି ବିନେ ବିନେ ଆକି ମୁଣିକା ଲାଗାଂ ୱାତାର୍ । ଇନେକିଦେଂକି, ହାଉକାର୍ ଆରହନି ମାଜ଼ି ସକନିୟନି ଗାର୍ଜୁଆଁ ଆତିଲେ ଆରି ତା ମାଜ଼ି ଜିହହାନନ୍ ବେରିକିୟନି ମାଜ଼ି ମସୁଲ୍ଲମ୍ନି ଗାଡ଼୍ଚେଙ୍ଗ୍ ବିବା କିଜ଼ିମାଚିଲେ ଜିହୁଦା ବିତ୍ରେ ହେନି ତା ପାକ୍ୟାତ ପାର୍ମାଣ୍ କିଜ଼ି ମାଚାର୍ । ଆରେ, ହେୱାର୍ ତା ହାର୍ଦି କାମାୟ୍ନି କାତା ନାଙ୍ଗେଙ୍ଗ୍ ଇଞ୍ଚାର୍ ଆରି ନା କାତା ସବୁ ତାଙ୍ଗେଙ୍ଗ୍ ୱେଚ୍ଚାର୍ । ଆରେ, ନାଙ୍ଗ୍ ପାଣ୍ଡ୍ରୁ କିନି କାଜିଂ ଟବିୟ ବିନ୍ ବିନ୍ ଆକି ପକ୍ତାତାନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.