Pengo Bible
ନେହିମିୟା 3
ଜିରୁସାଲମ୍ ପାର୍ତାନା ଇଲ୍ ଆରେରଚ୍ନାକା
ଇଦାଂ ପାଚେ ଇଲିୟାସିବ୍ ମୁଡ଼୍ ମାପ୍ରୁହେବାକିନାକାନ୍ ଆରି ତା ମାପ୍ରୁହେବାକିନାକାର୍ ଟଣ୍ଡାର୍ ନିଙ୍ଗ୍ଜି ମେଣ୍ଡାଙ୍ଗ୍ ଦୁୱେର୍ ରଚ୍ଚାର୍; ହେୱାର୍ ହେଦାଂ ପୁଇପୁୟା କିଜ଼ି ହେବେନି କାପାଟିଂସବୁ ରଚ୍ଚାର୍; ହମିୟ ଦୁୱେର୍ ଆରି ହନନେଲ୍ ଦୁୱେର୍ ପାତେକ୍ ହେୱାର୍ ପୁଇପୁୟା କିତାର୍ । ତା ଲାଗାଂ ଜିରିହନି ମାନାୟାର୍ ରଚ୍ଚାର୍, ଆରି ହେୱାର୍ ଲାଗାଂ ଇମ୍ରିନି ମାଜ଼ି ସକ୍କୁର ରଚ୍ଚାନ୍ । ହସନାୟାନି ମାଜ଼ିର୍ ମିନ୍କୁ ଦୁୱେର୍ ରଚ୍ଚାର୍; ହେୱାର୍ ହେବେନି ଦୁୱେର୍ବାନ୍ଦା ଦୁପ୍ତାର୍ ଆରି ହେବେନି କାପାଟ୍ ଆରି କିର୍ନି ଆରି ଗାଡ଼ା ସବୁ ରଚ୍ଚାର୍ । ଆରେ, ହେୱାର୍ ଲାଗାଂ ହକସନି ନାତି ଉରିୟନି ମାଜ଼ି ମରେମତ୍ ମାରାମତ୍ କିତାନ୍ । ଆରେ, ହେୱାର୍ ଲାଗାଂ ମସେସବେଲ୍ ୱାଡ଼ାଂନି ନାତି ବେରିକିୟନି ମାଜ଼ି ମସୁଲ୍ଲମ୍ ମାରାମତ୍ କିତାନ୍ । ଆରେ, ହେୱାର୍ ଲାଗାଂ ବାନାର ମାଜ଼ି ସାଦକ୍ ମାରାମତ୍ କିତାନ୍ ।
ଆରେ ହେୱାର୍ ଲାଗାଂ ତକୟିୟ ମାନାୟାର୍ ମାରାମତ୍ କିତାର୍; ମତର୍ ହେୱାର୍ତି କୁଦାନିକାର୍ ତା ନେତାରିଂ କାମାୟ୍ କିଦେଂ ରାଜି ଆୱାତାର୍ । ଆରେ, ପାସେହନି ମାଜ଼ି ଜିହୟାଦା ଆରି ବସଦିୟାନି ମାଜ଼ି ମସୁଲ୍ଲମ୍ ପ୍ଡାନି ଦୁୱେର୍ନି ମାରାମତ୍ କିତାନ୍; ହେୱାର୍ ହେବେନି ଦୁୱେରବାନ୍ଦା କୁଚିକିତାନ୍, ଆରେ ହେବେନି କାପାଟ୍, କୁଚି ଆରି ଗାଡ଼ା ସବୁ ଲାଗାୟ୍କିତାନ୍ । ଆରେ, ହେୱାର୍ ଲାଗାଂ ଗିବିୟନିୟ ମଲାଟିୟ ଆରି ମରଣତିୟ ଜାଦନ୍ ମାନାୟାର୍ ମାରାମତ୍ କିତାର୍, ହେୱାର୍ ଗିବିୟନିୟ ଆରି ମିସ୍ପାନି ମୁକ୍ୟା ମାଚାନ୍, ନାଗୁଡ଼୍ ଆଣ୍ଟିପାଡ଼୍କା ମିସ୍ପା ଦେସ୍ ଆଦିକାରି ଗାଦି ବାହା ମାଚାତ୍ । ତା ଲାଗାଂ ହନାରି, ହର୍ହୟନି ମାଜ଼ି ଉସିୟେଲ୍ ମାରାମତ୍ କିତାନ୍ । ଆରେ, ତା ଲାଗାଂ ଗାନ୍ଦାସମାଜ୍ନିକାର୍ ବିତ୍ରେତାଂ ହନାନିୟ ମାରାମତ୍ କିତାନ୍, ଆରେ ହେୱାର୍ ଅହାର୍ ଡାଣ୍ଡ୍କାତି ପାତେକ୍ ଜିରୁସାଲମ୍ ଆଟ୍ୱା କିତାନ୍ ।
ହେୱାର୍ ଲାଗେତାଂ ଜିରୁସାଲମ୍ ପାତେକ୍ ପଦେସ୍ନି ଅଦାବାଗ୍ନି ଆଦିକାରି ହୁରନି ମାଜ଼ି ରପାୟ ମାରାମତ୍ କିତାନ୍ ।
ଆରେ, ହେୱାର୍ ଲାଗାଂ ହରୁମପନି ମାଜ଼ି ଜିଦାୟ ଜାର୍ ଇଲ୍ ମୁମ୍ଦ ମାରାମତ୍ କିତାନ୍ । ତା ଲାଗାଂ ହସବନିୟନି ମାଜ଼ି ହଟୁସ୍ ମାରାମତ୍ କିତାନ୍ ।
ହାରିମନି ମାଜ଼ି ମଲ୍କିୟ ଆରି ପହତ୍ ମୟାବନି ମାଜ଼ି ହସୁବ୍ ବିନ୍ ର ବାଗ୍ ଆରି ହଲି ଦୁୱେର୍ ମାରାମତ୍ କିତାନ୍ ।
ତା ଲାଗାଂ ଜିରୁସାଲମ୍ ପଦେସ୍ନି ଅଦାବାଗ୍ନି ଆଦିକାରି ହଲହେସନି ମାଜ଼ି ସଲ୍ଲୁମ୍ ଆରି ତା ଗାଚ୍କୁ ମାରାମତ୍ କିତିକ୍ ।
ହାନୁନ୍ ଆରି ସାନହ ନିକାର୍ ଆଟାଡ଼୍ ଦୁୱେର୍ ମାରାମତ୍ କିତାର୍; ହେୱାର୍ ହେଦାଂ ରଚ୍ଚାର୍ ଆରି ହେବେନି କାପାଟ୍, ହିକ୍ଡ଼ିଂ ଆରି ଗାଡ଼ାଂ ସବୁ ରଚ୍ଚାର୍, ଆରେ ଗାତ୍ ଦୁୱେର୍ ପାତେକ୍ ଡାଣ୍ଡ୍କାତି ଏକ୍ ହାଜାର୍ ଆତ୍ ଡାଟ୍ କିତାର୍ ।
ଆରେ, ବୈତ୍ ହକ୍କେରମ୍ ପଦେସ୍ନି ଆଦିକାରି ରେକବର ମାଜ଼ି ମଲ୍କିୟ ଗାତ୍ ଦୁୱେର୍ନି ମାରାମତ୍ କିତାନ୍; ହେୱାନ୍ ହେଦାଂ ରଚ୍ଚାନ୍ ଆରି ହେବେନି କାପାଟ୍, ହିକ୍ଡ଼ିଂ ଆରି ଗାଡ଼ାଂ ସବୁ ରଚ୍ଚାନ୍ ।
ଆରେ, ମିସ୍ପା ପଦେସ୍ନି ଆଦିକାରି କଲ୍ହସିନି ମାଜ଼ି ସଲ୍ଲୁନ୍ ଏସୁଙ୍ଗ୍ହୱି ଜାରାଣ୍ ଦୁୱେର୍ ମାରାମତ୍ କିତାନ୍; ହେୱାନ୍ ହେଦାଂ ରଚ୍ଚି ହାର୍ କିତାନ୍ ଆରି ହେବେନି କାପାଟ୍, ହିକ୍ଡ଼ିଂ ଆରି ଗାଡ଼ାଂ ଲାଗାୟ୍କିତାନ୍, ଆରେ ଦାଉଦ୍ ଗାଡ଼୍ତାଂ ତାରେତିଂ ହାନି ପାଉଜ୍ ପାତେକ୍ ରାଜାତି ବାଡ଼୍ଦ ଲାଗାଂ ସେଲା ବାନ୍ଦ୍ ଡାଣ୍ଡ୍କାତି ମାରାମତ୍ କିତାନ୍ ।
ହେଦାଂ ଲାଗାଂ ବୈତ୍ସୁର ପଦେସ୍ନି ଅଦାବାଗ୍ତ ଆଦିକାରି ଅସ୍ବୁକନି ମାଜ଼ି ନିହିମିୟା ଦାଉଦ୍ତି ଦୁଗେର୍ ମୁମ୍ ପାତେକ୍ ଆରି ରଚ୍ଚି ବାନ୍ଦ୍ ପାତେକ୍ ଆରି ବିରର୍ତି ଇଲ୍କୁ ପାତେକ୍ ମାରାମତ୍ କିତାର୍ ।
ଡାଣ୍ଡ୍କାତି ରଚ୍ନି କାମାୟ୍ କିଜ଼ିମାନି ଲେବିୟର୍
ତା ଲାଗାଂ ଲେବିୟର୍, ଇଚିସ୍ ବାନିନି ମାଜ଼ି ରହୁମ୍ ମାରାମତ୍ କିତାନ୍ । ତା ଲାଗାଂ କିୟିଲା ପଦେସ୍ନି ଅଦାବାଗ୍ତ ଆଦିକାରି ହସବିୟ ଜାର୍ ଦେସ୍ ପାକ୍ୟାତ ମାରାମତ୍ କିତାନ୍ । ତା ଲାଗାଂ ହେୱାର୍ତି ଟଣ୍ଡାର୍, ଇଚିସ୍, କିୟିଲା ପଦେସ୍ନି ଅଦାବାଗ୍ତ ଆଦିକାରି ହେନାଦଦନି ମାଜ଼ି ବବୟ ମାରାମତ୍ କିତାନ୍ । ତା ଲାଗାଂ ମିସ୍ପାନି ଆଦିକାରି ଜେସୁୟନି ମାଜ଼ି ଆତ୍ଆତିୟାର୍ ଡାଣ୍ଡ୍କାତିନି ବାଙ୍ଗ୍ଟା ତାକେଣ୍ଡାଂ ଉଟାଣି ହାଜ଼ି ମୁମ୍ଦ ବିନ୍ ର ବାଗ୍ନି ମାରାମତ୍ କିତାନ୍ । ତା ଲାଗାଂ ସକ୍କୟନି ମାଜ଼ି ବାରୁକ୍ ଜାତୁନ୍ କିଜ଼ି ଡାଣ୍ଡ୍କାତିନି ବାଙ୍ଗ୍ଟାତାଂ ଇଲିୟାସିବ୍ ମୁଡ଼୍ ମାପ୍ରୁହେବାକିନାକାନ୍ ଇଲ୍ଦୁୱେର୍ ପାତେକ୍ ବିନ୍ ର ବାଗ୍ନି ମାରାମତ୍ କିତାନ୍ । ତାପାଚେ ହକସନି ନାତି ଉରିୟନି ମାଜ଼ି ମରେମତ୍ ଇଲିୟାସିବ୍ନି ଇଲ୍ ଦୁୱେର୍ତାଂ ଇଲିୟାସିବ୍ନି ଇଲ୍କନା ପାତେକ୍ ବିନ୍ ର ବାଗ୍ନି ମାରାମତ୍ କିତାନ୍ ।
ଡାଣ୍ଡ୍କାତି ରଚି କିଜ଼ିମାନି ମାପ୍ରୁହେବାକିନାକାର୍
ଆରେ, ଜିରୁସାଲମ୍ ଲାଗାଂ ମାନି ମାପ୍ରୁହେବାକିନାକାର୍ ମାରାମତ୍ କିତାର୍ ।
ହେୱାର୍ ପାଚେ ବିନ୍ୟାମିନ୍ ଆରି ହସୁବ୍ ଜାର୍ତି ଇଲ୍କୁ ମୁମ୍ଦ ଜାତ୍ନାୟ୍ କିତାର୍ । ହେୱାର୍ତି ପାଚେ ଅନନିୟାନି ନାତି ମାସେୟନି ମାଜ଼ି ଅସରିୟ ଜାର୍ ଇଲ୍ ଲାଗାଂ ଜାତ୍ନାୟ୍ କିତାନ୍ ।
ହେନାଦଦ୍ତି ମାଜ଼ି ବିନ୍ନୁୟି ଅସରିୟନି ଇଲ୍ତାଂ ଡାଣ୍ଡ୍କାତିନି ବାଙ୍ଗ୍ଟା ଆରି କନା ପାତେକ୍ ବିନ୍ ର ବାଗ୍ନି ଜାତ୍ନାୟ୍ କିତାନ୍ ।
ଉସୟତି ମାଜ଼ି ପାଲାଲ୍ ଡାଣ୍ଡ୍କାତି ବାଙ୍ଗ୍ଟା ମୁମ୍ଦ କାନିବାହାନି ଲାଗାଂ ପାନ୍ତି ରାଜାଇଲ୍ ଲାଗାଂ ବାର୍ତି ଦୁୱେର୍ ଲାଗାଂ ଜାତ୍ନାୟ୍ କିତାନ୍ । ତା ପାଚେ ପରିୟସନି ମାଜ଼ି ପଦାୟ ଜାତ୍ନାୟ୍ କିତାନ୍ । ଇ ସମୁତ ଓପଲତ ବାହା କିଜ଼ିମାନି ହେବା କାରିୟାର୍ ଏଜ଼ୁଙ୍ଗ୍ ଦୁୱେର୍ନି ୱେଡ଼ାହତ୍ନି ଦିଗ୍ନି ମୁମ୍ଦ ପାତେକ୍ ଆରି ବାର୍ତି ଦୁୱେର୍ ପାତେକ୍ ଜାତ୍ନାୟ୍ କିତାର୍ ।
ବିନ୍ ରଚ୍ନାକାର୍
ତା ପାଚେ ତକୟିୟର୍ ବାର୍ତି ଗାଜା ପାନ୍ତିମାଚା ମୁମ୍ଦାଂ ଓପଲନି ଡାଣ୍ଡ୍କାତି ପାତେକ୍ ବିନ୍ନି ର ବାଗ୍ ଜାତ୍ନାୟ୍ କିତାର୍ । ମାପ୍ରୁହେବାକିନାକାର୍ ୱିଜ଼ାର୍ ଜାର୍ ଜାର୍ ଇଲ୍ ମୁମ୍ଦ ଗଡ଼ା ଦୁୱେର୍ନି ଜପ୍ଣି ବାଗ୍ତ ମାରାମତ୍ କିତାର୍ । ହେୱାର୍ ପାଚେ ଇମ୍ମେରନି ମାଜ଼ି ସାଦକ୍ ଜାର୍ ଇଲ୍ ମୁମ୍ଦ ଜାତ୍ନାୟ୍ କିତାନ୍ । ଆରେ, ତା ପାଚେ ଆଗେ ଦୁୱେର୍ ସକନିୟତି ମାଜ଼ି ସମୟିୟ ମାରାମତ୍ କିତାନ୍ ।
ତା ପାଚେ ସେଲିମିୟତି ମାଜ଼ି ହନାନିୟ ଆରି ସାଲପରତି ଚଅ ଜାଣ୍ ମାଜ଼ି ହାନୁନ୍ ବିନ୍ ର ବାଗ୍ନି ଜାତ୍ନାୟ୍ କିତାର୍ । ତା ପାଚେ ବେରିକିୟତି ମାଜ଼ି ମସୁଲ୍ଲମ୍ ଜାର୍ ବାକ୍ରା ମୁମ୍ଦ ମାରାମତ୍ କିତାନ୍ ।
ତା ପାଚେ ମଲକିୟ ତର୍ନି ଆଡ଼ିୟା ହନାରି ହମିପ୍କଦ୍ ଦୁୱେର୍ ମୁମ୍ଦ ନତିନିୟରତି ଆରି ବେପ୍ରିୟାର୍ତି ଇଲ୍ ପାତେକ୍, ଆରେ କନାନି ଉଟାଣି ପାତେକ୍ ମାରାମତ୍ କିତାନ୍ ।
ଆରେ, କନାନି ଉଟାଣି ଆରି ମେଣ୍ଡା ଦୁୱେର୍ ବିତ୍ରେ ହନାରି ଆରି ବେପ୍ରିୟାର୍ ମାରାମତ୍ କିତାର୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.