Pengo Bible
ଆଦି 41
ଜସେପ୍ ରାଜାତି କ୍ଡେଞ୍ଜ୍କଣ୍ନି ଅରତ୍ ୱେଚ୍ନାକା
ଇଦାଂପାଚେ ବାର୍ତି ଦୁଇ ବାର୍ହୁ ୱିସ୍ତିପାଚେ ପାର ଇ କ୍ଡେଞ୍ଜ୍କଣ୍ ହୁଡ଼୍ତାନ୍; ହୁଡ଼ା, ହେୱାନ୍ ନିଲ୍ୟା ନାଗୁଡ଼୍ ଗୁଟିତ ନିଲ୍ତାନ୍ନା । ଆରେ ହୁଡ଼ାଟ୍, ନିଲ୍ୟା ନାଗୁଡ଼୍ ବିତ୍ରେତାଂ ସାତ୍ଗଟା ଦୁମାଂ ହାର୍ଦି କଡିଂ ନିଂଜି ନାଡ଼ା-କାଚ୍ରା ବିତ୍ରେ ହାରାଦେଂ ଲାଗିତିକ୍ । ହେୱାଙ୍ଗ୍ ପାଚେ ହୁଡ଼ାଟ୍, ବିନ୍ ସାତ୍ଗଟା କକ୍ତିକିଂ ଆରି ବାନ୍ୟା କଡିଂ ନାଗୁଡ଼୍ତାଂ ନିଂଜି ନାଗୁଡ଼୍ ଗୁଟିତ ହେ କଡିଂ ଲାଗେ ନିଲ୍ତିକ୍ । ହେବେ ହେ ନାଦାର୍ ଆରି ବାନ୍ୟା କଡିଂ ହେ ସାତ୍ଗଟା ଦୁମାଂ ହଲ୍ନି କଡିକାଂ ଚିନ୍ଜି ତୁହିତିକ୍ । ଏଲେଙ୍ଗ୍ ୱେଡ଼ାଲିଂ ପାରତି ହୁଚ୍କାଣ୍କୁ ରିଂତିକ୍ । ତା ପାଚେ ହେୱାନ୍ ହୁନ୍ଜି ରିହା କ୍ଡେନ୍ଞ୍ଚାନ୍; ରଞ୍ଜେ ଚଚାତ ସାତ୍ଗଟା କ୍ଡେମାନିତାସ୍ ଆରି ହାର୍ଦି ଜିକି ହତାତ୍ । ହେୱାର୍ ପାଚେ ୱେଡ଼ାହନିନିପ୍ଣି ଦୁକାତ ୱାଚ୍ଚାକା ଆରେ ସାତ୍ଗଟା ହାରୁ ଜିକି ଉବ୍ଜାତାତ୍ । ଆରେ, ହେ ସାତ୍ଗଟା ୱାଚ୍ଚି ଜିକି ଇ ସାତ୍ଗଟା ହାର୍ଦାକା ଆରି ପୁରା ଜିକିତିଂ ଗୁସ୍ତାତ୍ । ଏଲେଂ ୱେଡ଼ାଲିଂ ପାରତି ହୁଚ୍କାଣ୍କୁ ରିଂତିଲେ, କ୍ଡେଞ୍ଜ୍କଣ୍ ମତର୍ ପୁନ୍ୟାତାତ୍ । ଆରେ, ନାଡ଼ିହିଂ ହେୱାନ୍ତି ମାନ୍ ବିପ୍ତି ଆତାତ୍, ପାଚେ, ହେୱାନ୍ ଲକୁ ପକ୍ଚି ମିସର୍ଦେସ୍ନି ଚୁଟ୍କିୟାର୍ ଆରି ପଣ୍ଡିତାର୍ ୱିଜ଼ାରିଂ କୁକିକିତାନ୍; ମତର୍ ପାର ହେୱାର୍ ଲାଗାୟ୍ ତା କ୍ଡେଞ୍ଜ୍କଣ୍ନି କାତା ଇଚିଲେ, ହେୱାର୍ତି ବିତ୍ରେ ଇନେର୍ ପା ପାରଙ୍ଗ୍ ହେବେନି ଅରତ୍ ଇଞ୍ଜେଙ୍ଗ୍ ଆଡ୍ୱାତାର୍ ।
ହେଏଚେକାଡ଼୍ଦ ମୁଡ଼୍ ଅଙ୍ଗୁର୍ରାସ୍ ଉଣାକାନ୍ ପାରତି ଲାଗେ ଗୱାରି କିତାନ୍, ନେଞ୍ଜେଙ୍ଗ୍ ଆନ୍ ନିଜେ ଦସ୍ନିକା ଏତୁ କିନାଙ୍ଗା । ପାର ତା ଆଡ଼ିଏନ୍ ନା ଅଙ୍ଗୁର୍ରାସ୍ ଆରି ମୁଡ଼୍ ରାନ୍ଦିୟା କାଜିଂ ରିସାଜ଼ି ମାଂ ରାକ୍ୟାକିନି ମେଲ୍ୟାନି ବନ୍ଦି ଇଞ୍ଜ ଗେସ୍ତି ଇଡ଼୍ଜି ମାଞ୍ଚାର୍ । ହେବେ ଆପ୍ ରିୟାପ୍ ର ନାଣା କ୍ଡେଞ୍ଜ୍ଚାପ୍; ଆରେ, ରିଆର୍ତି କ୍ଡେଞ୍ଜ୍କଣ୍ନି ରି ବାନି ଅରତ୍ ଆତାତ୍ । ହେବେ ମା ଲାହାଂ ରାକ୍ୟାକିନି ମୁଡ଼୍ମେଲ୍ୟାନି ଆଡ଼ିଏନ୍ ରୱାନ୍ ଏବ୍ରିୟ ଦାଂଣେନ୍ ମାଚାନ୍; ଆପେଙ୍ଗ୍ ତାଂ କ୍ଡେଞ୍ଜ୍କଣ୍ କାତା ୱେଚ୍ଚିଲେ, ହେୱାନ୍ ମାଂ ହେବେନି ଅରତ୍ ୱେଚ୍ଚାତାନ୍, ଜାଣ୍କେତି କ୍ଡେଞ୍ଜ୍କଣ୍ ଇସାବ୍ରେ ଅରତ୍ ୱେଚ୍ଚାତାନ୍ । ହେବେ ହେୱାନ୍ ମା ରିଆର୍ତି ଇନେସ୍ ଅରତ୍ ୱେଚ୍ଚି ମାନ୍ଚାନ୍, ହେଲାକେ ଗିଟାତାତ୍; ଆନ୍ ଆଗେନି ପାଦ୍ତ ବାଚିକିୟାତାଂ ଆରି ହେୱାନ୍ ପାସି ପାୟାତାନ୍ । ହେଏଚେକାଡ଼୍ଦ ପାର ଜସେପତିଂ କୁକିକିଦେଂ ପକ୍ତାନ୍, ମାନାୟାର୍ ବନ୍ଦିଇଞ୍ଜାଙ୍ଗ୍ ତା ବେଗି ତାହିୱାତାର୍; ହେୱାନ୍ ହେନ୍ୟାଜ଼ି ଆରି ହାର୍ଦି ହେନ୍ଦ୍ରା ଉସ୍ପିସ୍ ପାରତି ଲାଗେ ଏକାତାନ୍ । ପାଚେ ପାର ଜସେପତିଂ ଇଚାନ୍, “ଆପ୍ ର କ୍ଡେଞ୍ଜ୍କଣ୍ ହୁଡ଼୍ତାପ୍ନା, ଇନେର୍ ପା ତା ଅରତ୍ ଇଞ୍ଜେଙ୍ଗ୍ ଆଡୁରା; ମତର୍ ଆପ୍ ନି ବିସ୍ରେ ୱେଚାପ୍ନା, ଜେ ଏନ୍ କ୍ଡେଞ୍ଜ୍କଣ୍ ୱେଚିସ୍, ହେବେନି ଅରତ୍ ଇଞ୍ଜେଙ୍ଗ୍ ଆଡ୍ନାୟ୍ ।”
ହେବେ ଜସେପ୍ ଇଚାନ୍, “ହେଦାଂ ନା ଆଇତ୍ ଆକାୟ୍, ମତର୍ ଇସ୍ୱର୍ ପାରତି ହାର୍ ଉତର୍ ହିନାନ୍ ।”
ପାଚେ ପାର ଜସେପତିଂ ଇଚାନ୍, “ମା କ୍ଡେଞ୍ଜ୍କଣ୍ତ, ହୁଡ଼ା, ଆପ୍ ନାଗୁଡ଼୍ ଗୁଟିତ ନିଲ୍ଚି ମାଚାପ୍ ।” ହେବେ ନାଗୁଡ଼୍ ବିତ୍ରେତାଂ ସାତ୍ଗଟା ଦୁମାଂ ହଲ୍ନି କଡିଂ ନିଂଜି ନାଡ଼ା-କାଚ୍ରା ବିତ୍ରେ ହାରାଦେଂ ଲାଗିତିକ୍ । ଇଦାଂପାଚେ ହେୱାଙ୍ଗ୍ ପାଚେ ଆରେ ସାତ୍ଗଟା ନାଦାର୍ ବେସି ୱାଚ୍ଚି ଆରି ବାନ୍ୟାଙ୍ଗ୍ କଡିଂ ନିଙ୍ଗ୍ଜି ୱାତିକ୍; ଆପ୍ ହେୱାଙ୍ଗ୍ ଲାକେ ୱାଚ୍ଚି କଡିଂ ସବୁ ମିସର୍ ଦେସ୍ତ ଇନାୱାଡ଼ାଙ୍ଗ୍ପା ହୁଡ଼୍ୱାତାପ୍ନା । ଆରେ, ହେ ୱାଚ୍ଚି ବଟାୟ୍ କଡିଂ ଆଗେନି ଦୁମାଂ ହେ ସାତ୍ଗଟା କଡିକାଂ ଚିଚିକ୍ । ମତର୍ ଚିଚି ପାଚେ ହେୱେକାଂ ପଟ ଚିଚି ଲାକେ ଚଞ୍ଜିୱିତିକ୍; ହେୱେକ୍ ଆଗେ ଲାକେ ୱାଚ୍ଚିକିଂନେ ମାଚିକ୍ । ଏଲେଙ୍ଗ୍ ୱେଡ଼ାଲିଂ ମା ହୁଚ୍କାଣ୍କୁ ବାଙ୍ଗାତିକ୍ । ଇଦାଂପାଚେ ଆନ୍ କ୍ଡେଞ୍ଜ୍କଣ୍ତ ହୁଡ଼୍ତାଙ୍ଗ୍ ଜେ, ହୁଡ଼ାଟ୍, ର କେଡ଼୍ତ ସାତ୍ଗଟା ବାର୍ତି ଆରି ହାର୍ଦି କେଡ଼୍ ହତାତ୍ । ତାପାଚେ ୱେଡ଼ାହନି ନିପଣ୍ଡାଂ ଦୁକାତ ୱାଚ୍ଚାକା, ୱିସ୍ତାକା ଆରି ହନାକା ସାତ୍ଗଟା ଜିକି ଉବ୍ଜାତାତ୍ । ଆରେ, ହେ ୱାଚ୍ଚି କେନ୍ଦା, ହେ ହାର୍ଦି ସାତ୍ଗଟା ଜିକିତିଂ ଚିଚାତ୍ । ଇ କ୍ଡେଞ୍ଜ୍କଣ୍ ଆନ୍ ଚୁଟ୍କିୟାରିଂ ଇଚାଙ୍ଗ୍, ମତର୍ ଇନେନ୍ ଇବେନି ଅରତ୍ ମାଂ ୱେଚ୍ଚେଦେଂ ଆଡ୍ୱାତାର୍ ।
ତେବେ ଜସେପ୍ ପାରଙ୍ଗ୍ ଇଚାନ୍, “ପାରତି ହେ ରିଣ୍ଡାଂ କ୍ଡେଞ୍ଜ୍କଣ୍ ଅରତ୍ ରଞ୍ଜାଙ୍ଗ୍; ଇସ୍ୱର୍ ଇନାକା କିଦେଂ ଇଚା, ହେଦାଂ ପାରତି କାଜିଂ ହପ୍ତାନ୍ନା ।” ହେ ସାତ୍ଗଟା ହାର୍ଦି କଡିଂ ସାତ୍ ବାର୍ହୁ ଲାକେ, ଆରେ, ହେ ସାତ୍ଗଟା ହାର୍ଦି ଜିକି ପା ସାତ୍ ବାର୍ହୁ ଲାକେ, କ୍ଡେଞ୍ଜ୍କଣ୍ ରଞ୍ଜାଙ୍ଗ୍ ମତର୍ । ତା ପାଚେ ନିଂତି ହେ ସାତ୍ଗଟା ୱିସ୍ତି ୱାଚ୍ଚି କଡିଂ ଆରି ଆରେ ୱେଡ଼ାହନି ନିପଣ୍ଡାଂନି ଦୁକାତ ୱାଚ୍ଚି ସାତ୍ଗଟା ଜିକି ସାତ୍ ବାର୍ହୁ କାତାର୍ ଲାକେ । ଆନ୍ ପାରଙ୍ଗ୍ ଇଚାଙ୍ଗ୍ନା, ଇସ୍ୱର୍ ଇନାକା କିଦେଂ ଜାଲ୍ଦି, ହେଦାଂ ପାରଙ୍ଗ୍ ଚଚ୍ଚାତ୍ନା । ହୁଡ଼ା, ୱିଜ଼ୁ ମିସର୍ ଦେସ୍ତ ସାତ୍ ବାର୍ହୁ ବେସି ହାର୍ଦି ବାର୍ହୁ ୱାନାତା । ତା ପାଚେ ସାତ୍ ବାର୍ହୁ କାତାର୍ ଆର୍ଣ୍ଣାତ୍; ବାକି ସବୁ ହାର୍ଦି ବାର୍ହୁ ମାନାୟାର୍ ବାଣାନାର୍, ଆରେ ମିସର୍ ଦେସ୍ତ ମେଙ୍ଗ୍ନାତ୍; କାତାର୍ ଦେସ୍ତିଂ ବୁଡାୟ୍ କିନାତ୍ । ଆରେ, ପାଚେନି କାତାର୍ କାଜିଂ ଦେସ୍ତ ହାର୍ଦିବାର୍ହୁ ପୁନ୍ୟା ଆଉତ୍; ଇନେକିଦେଂକି ହେଦାଂ ବେସି କସ୍ଟ ଆନାତ୍ । ପାର ରିହା କ୍ଡେଞ୍ଜ୍ନାକା ବାବ୍ନା ଇଦାଂ ଜେ, ଇସ୍ୱର୍ ହୁଦାଂ ହେଦାଂ ହାତ୍ପା ଆତାତ୍ନା, ଆରେ, ଇସ୍ୱର୍ ହେଦାଂ ବେଗି ଗିଟାଆଦେଂ ହାନାତା ।
ଇଦାଂକାଜିଂ ନଂ ପାର ରୱାନ୍ ବୁଦିନି ଗିୟାନି ମାନାୟ୍ ହୁଡ଼୍ଜି ମିସର୍ ଦେସ୍ ଜପି ବାଚି କିଆ । ପାର ଇଦାଂ କିଏନ୍, ଆରେ ଦେସ୍ତ ମୁଣିକାରିଂ ବାଚି କିଜ଼ି ସାତ୍ ବାର୍ହୁ ହାର୍ଦିବାର୍ହୁ ୱେଡ଼ାଲିଂ ମିସର୍ ଦେସ୍ତାଂ ତାସ୍ନି ପାଞ୍ଚ୍ବାଗ୍ତାଂ ର ବାଗ୍ ଇଟାଟ୍ । ଇଚିସ୍, ହେୱାର୍ ହେ ୱାନି ହାର୍ଦି ବାର୍ହୁନି ସବୁ ଚିଞ୍ଜେଙ୍ଗ୍ ରୁଣ୍ଡାୟ୍ କିଏର୍, ଆରେ ପାତି ଗାଡ଼୍ଦ କାଦି କାଜିଂ ପାରତି କେଇତାରେନ୍ ତାସ୍ ରୁଣ୍ଡାୟ୍ କିଜ଼ି ଇଟେର୍ । ଇଲାକେ ମିସର୍ ଦେସ୍ତ ୱାନିଦିନ୍ତ କାତାର୍ନି ସାତ୍ ବାର୍ହୁ କାଜିଂ ଦେସ୍ନି ଜିଦେଂ ହେ କାଦି ମାଚିସ୍, କାତାର୍ ହୁକେ ଦେସ୍ ନସ୍ଟ ଆଉତ୍ ।
ମିସର୍ ଦେସ୍ନି ସାସନ୍କାର୍ୟା ଜସେପ୍
ହେଏଚେକାଡ଼୍ଦ ପାରତି ଆରି ତା ଆଡ଼୍ୟାର୍ତି ମୁମ୍ଦ ଇ କାତା ହାର୍ଦାକା ପୁଞ୍ଜେଙ୍ଗ୍ ଆତାତ୍ । ହେବେ ପାର ତା ଆଡ଼୍ୟାରିଙ୍ଗ୍ ଇଚାନ୍, “ଆସେଙ୍ଗ୍ କି ଇୱାନ୍ ଲାକେ ମାନାୟ୍ ଆରେ ଗାଟାଦେଂ ଆଡ୍ନାସ୍ ? ଇୱାନ୍ ତାକେ ପର୍ମେସ୍ୱର୍ତି ଜିବୁନ୍ ମାନାତ୍ ।” ପାଚେ ପାର ଜସେପତିଂ ଇଚାନ୍, “ଇସ୍ୱର୍ ନିଂ ଇୱିଜ଼ୁ ୱେଚ୍ଚାତାନ୍ନା, ଲାଗିଂ ନି ଲାକେ ବୁଦିନିକାନ୍ ଆରି ଗିୟାନି ଇନେର୍ ହିଲୁର୍; ଏନ୍ ମା ଦେସ୍ନିମୁଣିକା ଆ; ମା ୱିଜ଼ାର୍ ମାନାୟ୍ ନି ବଚନ୍ ଆସ୍ତାନାର୍, କେବଲ୍ ଗାଦିତ ଆପ୍ ନିତାଂ ଗାଜା ଆନାପ୍ ।” ପାର ଜସେପତିଂ ଆରେ ଇଚାନ୍, “ହୁଡ଼ା, ଆପ୍ ନିଂ ୱିଜ଼ୁ ମିସର୍ ଦେସ୍ ଜପି ସାସନ୍ କିଦେଂ ବାଚି କିତାପ୍ ।” ଇଦାଂପାଚେ ପାର ତା କେଇଦାଂ ଜାର୍ତି ୱାଚ୍କାତାଂ ରାଜାର୍ତି ଲେକାତି ୱାତୁସ୍ ଦାକ୍ଚି ଜସେପ୍ କେଇଦ ହିଜ଼ି ତାଂ କୱାଣ୍ ହେନ୍ଦ୍ରା ଉସ୍ପିକିଜ଼ି ତା ଗାଡେଲ୍ତ ହନା ହାସ୍କୁ ତୁସିକିତାନ୍ । ଆରେ, ତାଙ୍ଗେଙ୍ଗ୍ ତା ଦୁଇନି ହାଗାଡ଼୍ତ ଦୁପିକିତାନ୍; ଆରେ ମାନାୟାର୍ ତା ଆଗେ ଆଗେ ମେଣ୍ଡାଙ୍ଗ୍କୁନ୍ଦି କିୟାଟ୍, ମେଣ୍ଡାଙ୍ଗ୍କୁନ୍ଦି କିୟାଟ୍ ଇଞ୍ଜି ସୁଣାୟ୍ କିତାନ୍ । ଇ ବାନି ହେୱାନ୍ ତା ୱିଜ଼ୁ ମିସର୍ ଦେସ୍ ଜପି ବାଚି କିତାନ୍ । ଇଦାଂପାଚେ ପାର ଜସେପତିଂ ଇଚାନ୍, “ଆପ୍ ପାରରାଜା, ଇଦାଂକାଜିଂ ନି ବଲ୍ ପିସ୍ତି ୱିଜ଼ୁ ମିସର୍ ଦେସ୍ତ ଇମ୍ଣାକାନ୍ ପା କେଇଗାଲ୍ ନିକ୍ତେଂ ଆଡୁନ୍ ।”
ଆରେ, ପାର ଜସେପତି ତର୍ ସାପନତ୍-ପାନେହ ଇଡ଼୍ତାନ୍; ଆରେ, ଓନ୍ ଗାଡ଼୍ନି ଲକୁ ପଟିପେର୍ ତର୍ନି ମାପ୍ରୁହେବାକିନାକାନ୍ତି ଆସନତ୍ ତର୍ନି ଗାଡ଼୍ ଲାହାଂ ତାଦି ବିବା କିତାନ୍ । ଇଦାଂପାଚେ ଜସେପ୍ ସବୁ ମିସର୍ ଦେସ୍ତ ବୁଲାବୁଲି କିଦେଂ ଲାଗାତାନ୍ । ଜସେପ୍ ତିରିସ୍ ବାର୍ହୁ ବୟଁସ୍ ୱେଡ଼ାଲିଂ ମିସର୍ନି ରାଜା ପାରତି ମୁମ୍ଦ ନିଲ୍ଚି ମାଚାନ୍; ତା ପାଚେ ଜସେପ୍ ପାରତି ଲାଗାୟ୍ତାଂ ହାଲ୍ଜି ମିସର ଦେସ୍ନି ୱିଜ଼େନିପ ବୁଲାବୁଲି କିଜ଼ି ଇଟ୍କାଡ଼୍ କିତାନ୍ । ଇଦାଂପାଚେ ହେ ହାର୍ଦିବାର୍ହୁ ସାତ୍ ବାର୍ହୁ ମେଦ୍ନିତ ବେସି ବେସି ତାସ୍ ଉବ୍ଜାତାତ୍ । ଜସେପ୍ ହେ ସାତ୍ ବାର୍ହୁତ ମିସର୍ ଦେସ୍ତ ଉବ୍ଜାତି ସବୁ ତାସ୍ ରୁଣ୍ଡାୟ୍ କିଜ଼ି ପାତି ଗାଡ଼୍ଦ ରୁଣ୍ଡାୟ୍ କିତାନ୍; ଆରେ, ଇମ୍ଣି ଇମ୍ଣି ଗାଡ଼୍ନି ଚାର୍ବେଣ୍ତାଂ ମେଦ୍ନିତ ଏଚେକ୍ ତାସ୍ ଉବ୍ଜା ଆତାତ୍, ହେଦାଂ ସବୁ ହେ ଗାଡ଼୍ଦ ରୁଣ୍ଡାୟ୍ କିତାନ୍ । ଇ ବାନି ଜସେପ୍ ହାମ୍ଦୁର୍ନି ବାଲି ଲାକେ ଏଚେକ୍ ବେସି ତାସ୍ ରୁଣ୍ଡାୟ୍ କିତାନ୍ ଜେ, ହେଦାଂ ଆରେ ଲାଚ୍ୱାତାର୍; ଇନେକିଦେଂକି ହେଦାଂ ଇସାବ୍ହିଲ୍ୱାଦାଂ ମାଚାତ୍ ।
ଆରେ କାତାର୍ ବାର୍ହୁ ଆଗେ ଜସେପତି ରି ହିମ୍ଣାଙ୍ଗ୍ ଜଲମ୍ ଆଜ଼ି ମାଚାର୍, ଓନ୍ ଗାଡ଼୍ ନିକାର୍ ପଟିପେର୍ ମାପ୍ରୁହେବାକିନାକାନ୍ତି ଆସନତ୍ ତର୍ନି ଗାଡ଼୍ହି ହେୱାରିଙ୍ଗ୍ ଜଲମ୍ କିଜ଼ି ମାଚାତ୍ । ତାପାଚେ ଜସେପ୍ ପାଣ୍ୱା ତର୍ ମନଃସି1 ଇଡ଼୍ତାନ୍, ଇନେକିଦେଂକି ଜସେପ୍ ଇଚାନ୍, “ଇସ୍ୱର୍ ନା ୱିଜ଼ୁ ଦୁକ୍ନି ଆରି ଜାର୍ ଆବାଇଞ୍ଜ ପଚିକିଜ଼ି ଜଲମ୍କିୟ୍ କିତ୍ତାନ୍ନା ।” ଆରେ, ଜେତି ମାଜ଼ିତି ତର୍ ଇପ୍ରୟିମ୍2 ଇଡ଼୍ତାନ୍, ଇନେକିଦେଂକି ହେୱାନ୍ ଇଚାନ୍, “ନା ଦୁକ୍ବଗ୍ନି ଦେସ୍ତ ଇସ୍ୱର୍ ନାଂ ପାଡ଼୍ବାଡ଼୍କାସ୍ କିତ୍ତାନ୍ନା ।”
ଇଦାଂପାଚେ ମିସର୍ ଦେସ୍ତ ଗିଟାତି ହାର୍ଦିବାର୍ହୁନି ସାତ୍ ବାର୍ହୁ ୱିସ୍ତାତ୍ । ଆରେ ଜସେପତି କାତା ଇସାବ୍ରେ କାତାର୍ନି ସାତ୍ ବାର୍ହୁନି ଆରମ୍ ଆତାତ୍; ପାଚେ ବିନ୍ ୱିଜ଼ୁ ଦେସ୍ତ ପା କାତାର୍ ଆର୍ତାତ୍, ମତର୍ ସବୁ ମିସର୍ ଦେସ୍ତ କାଦି ମାଚାତ୍ । ଆରେ, ସବୁ ମିସର୍ ଦେସ୍ତ କାତାର୍ ଆର୍ତିଲେ, ମାନାୟାର୍ କାଦି କାଜିଂ ପାର ଲାଗାୟ୍ ଆଡ଼୍ବାତାର୍; ପାଚେ ପାର ୱିଜ଼ାର୍ ମିସର୍ନି ମାନାୟ୍ତିଂ ଇଚାନ୍, ଏପେଙ୍ଗ୍ ଜସେପ୍ ଲାଗାଂ ହାଲାଟ୍; ହେୱାନ୍ ଇନାକା ଇଞ୍ଜ୍ନାନ୍, ହେଦାଂ କିୟାଟ୍ । ହେଏଚେକାଡ଼୍ଦ ସବୁ ଦେସ୍ତ କାତାର୍ ଆତିଲେ, ଜସେପ୍ ସବୁ ବାହାତ ଗାଦିୟାଂ ରିକ୍ଚି ମିସରିୟାରିଂ ତାସ୍ ପ୍ରତେଂ ଲାଗାତାନ୍; ଇନେକିଦେଂକି ମିସର୍ ଦେସ୍ତ କାତାର୍ ବେସି ଆତାତ୍ । ଆରେ, ସବୁ ଦେସ୍ନି ଲକୁ ମିସର୍ତ ତାସ୍ କଡ଼୍ନି କାଜିଂ ଜସେପ୍ ଲାଗାୟ୍ ୱାତାର୍ । ଇନେକିଦେଂକି ସବୁ ଦେସ୍ତ କାତାର୍ ବେସି ମାଚାତ୍ ।
Source notes (2)
- Footnote ଇଚିସ୍ ବାଣାନାକା
- Footnote ପାଡ଼୍ହିଦ୍ନାକାନ୍
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.