Pengo Bible
ଆଦି 38
ଜିହୁଦା ଆରି ତାମର୍
ହେ ସମୁତ ଜିହୁଦା ଜାର୍ ଟଣ୍ଡାର୍ ଲାଗାୟ୍ତାଂ ଅଦୁଲ୍ଲମିୟ ହିରା ତର୍ନି ରୱାନ୍ ମାନାୟ୍ ଲାଗେ ହାଚାନ୍ । ହେବେ ସୁୟ ତର୍ଦ ଇନାକାପା କିଣାନିୟ ମାନାୟ୍ତି ର ଗାଡ଼ିଙ୍ଗ୍ ହୁଡ଼୍ଜି ତାଂ ବିବା କିଜ଼ି ତା ଲାହାଂ ହୁଞ୍ଚାନ୍ । ଲାଗି ହେଦେଲ୍ ଏସ୍ପିସ୍ତି ହିମ୍ଣା ଗାଟାତିଲେ, ହେଦେଲ୍ ତା ତର୍ ଏର ହିତାତ୍ । ଇଦାଂପାଚେ ଆରେରଗ ତାଦାଂ ଏସ୍ପିସ୍ତିଲେ, ହେଦେଲ୍ ମାଜ଼ି ଗାଟାଜ଼ି ତା ତର୍ ଓନନ୍ ହିତାତ୍ । ଆରେରଗ ତାଦେଲ୍ ଏସ୍ପିସ୍ତିଲେ, ହେଦେଲ୍ ହିମ୍ଣା ଗାଟାଜ଼ି ତା ତର୍ ସେଲା ହିତାତ୍ । ଏୱାନ୍ତି ଜଲମ୍ ୱେଡ଼ାଲିଂ ଜିହୁଦା କସିବତ ମାଚାନ୍ ।
ଇଦାଂପାଚେ ଜିହୁଦା ତାମର୍ ତର୍ନି ର ଗାଡ଼୍ ତାସି ତା ପାଣ୍ୱା ମାଜ଼ି ଏର ଲାହାଂ ତାଂ ବିବା ହିତାତ୍ । ମତର୍ ଜିହୁଦାତି ପାଣ୍ୱା ମାଜ଼ି ଏର ନିତ୍ରେମାପ୍ରୁତି ମୁମ୍ଦ ଉତ୍ପାତିଆ ମାଚାନ୍; ଲାଗିଂ ନିତ୍ରେମାପ୍ରୁ ତାଂ ନାସ୍ କିତାନ୍ । ହେବେ ଜିହୁଦା ଓନନ୍ତିଂ ଇଚାନ୍, “ଏନ୍ ନି ଟଣ୍ଡେନ୍ଡକ୍ରିଂ ହୁଞ୍ଜା ଆରି ତା କାଜିଂ ଦେବରତି କିନି କାମାୟ୍ କିଜ଼ି ଟଣ୍ଡେନ୍ ବଁସ୍ ଉବ୍ଜାୟ୍ କିୟା ।” ମତର୍ ହେ ବଁସ୍ ଜାର୍ ଆଉତ୍, ଇଦାଂ ବୁଜାଜ଼ି ଓନନ୍ ଟଣ୍ଡେନ୍ଡକ୍ରିତି ମେହାନାକା ଏଚେକାଡ଼୍ଦ ଟଣ୍ଡେନ୍ବଁସ୍ ଉବ୍ଜାୟ୍ କିଦେଂ ଇଚା କିୱାଦାଂ ମେଦ୍ନିତ ବିରିଜ୍ ୱିତ୍ତାନ୍ । ତାଦି ଇଲାକେ କାମାୟ୍ ନିତ୍ରେମାପ୍ରୁତି କାଣ୍କୁତ ବାନ୍ୟା ମାଚାତ୍; ଲାଗିଂ ହେୱାନ୍ ତାଂ ପା ନାସ୍ କିତାନ୍ । ହେଏଚେକାଡ଼୍ଦ ଜିହୁଦା ତା ମାଜ଼ିକଡ଼ିୟା ତାମରତିଂ ଇଚାତ୍, “ନା ମାଜ଼ି ସେଲା ଗାଜାୱି ପାତେକ୍ ଏନ୍ ରାଣ୍ଡି ଆଜ଼ି ମିଞ୍ଜି ଆବାଇଞ୍ଜ ହାଲ୍ଜି ମାନା; ଇନେକିଦେଂକି ହେଦେଲ୍ ବାବିକିତାତ୍, ଇନେସ୍କି ଟଣ୍ଡାର୍ ଲାକେ ସେଲା” ପା ହାନାନ୍ । ଇଦାଂକାଜିଂ ତାମର୍ ଲାତ୍ରାହି ଇଞ୍ଜ ହାଲ୍ଜି ବାହା କିତାତ୍ ।
ଆରେ ବେସି ଦିନ୍ ହାଚି ପାଚେ, ସୁୟତି ଗାଡ଼୍ହି ଜିହୁଦାତି ଡକ୍ରି ହାତାତ୍; ତା ପାଚେ ଜିହୁଦା ସାରିମେହାଜ଼ି ଅଦୁଲ୍ଲମିୟ ହିରା ତର୍ନି ବନ୍ଦୁ ଲାହାଂ ତିମ୍ନାତ ତା ମେଣ୍ଡାତି ତେମୁଲ୍ ରାଜ଼୍ନାକାର୍ ଲାଗାୟ୍ ହାଚାନ୍ । ହେଏଚେକାଡ଼୍ଦ ଇନେନ୍ ରୱାନ୍ ତାମରତିଂ କାବୁର୍ ହିଜ଼ି ଇଚାନ୍, “ହୁଡ଼ା, ନି ପତ୍ଲେନ୍ ତା ମେଣ୍ଡାନି ତେମୁଲ୍ ରାଜ଼୍ଦେଂ କାଜିଂ ତିମ୍ନାତ ହାନାନା ।” ହେବେ ତାମର୍ ରାଣ୍ଡି-ହେନ୍ଦ୍ରା ପିସ୍ସି ପ୍ଡାକ୍ୟାନି ହେନ୍ଦ୍ରା ଉସ୍ପିସ୍ ଜାର୍ତିଂ ପ୍ଡାକ୍ୟାଜ଼ି ତିମ୍ନାତନି ହାଜ଼ିଗୁଟିତ ଐନମନି ହଣି-ବାହାତ କୁଚ୍ଚି ମାଚାତ୍; ଇନେକିଦେଂକି ହେଦେଲ୍ ହୁଡ଼୍ତାତ୍, ସେଲା ଗାଜା ଆତିସ୍ ପା ତା ଲାହାଂ ତାଦି ବିବା ହିୱାତାତ୍ ।
ହେପାଦ୍ନା ଜିହୁଦା ତାଂ ହୁଡ଼୍ଜି ଦାରି ଇଞ୍ଜି ଗିଆଣ୍ କିତାନ୍, ଇନେକିଦେଂକି ହେଦେଲ୍ ମୁମ୍ ପ୍ଡାକ୍ୟାଜ଼ି ମାଚାତ୍ । ଇଦାଂକାଜିଂ ହେଦେଲ୍ ହାଜ଼ିଗୁଟିତ ତା ଲାଗେ ହାଲ୍ଜି ମାଜ଼ିକଡ଼ିୟାତିଂ ଚିନ୍କିଦେଂ ଆଡ୍ୱାଦାଂ ଇଚାତ୍, “ଗୱାରି କିଦ୍ନାଙ୍ଗା, ନି ଲାଗାୟ୍ ନାଂ ହାଞ୍ଜେଙ୍ଗ୍ ହିଦା ।” ହେବେ ତାମର୍ ଇଚାତ୍, “ଏନ୍ ନା ଲାଗାୟ୍ ୱାନି କାଜିଂ ଇନାକା ହିଦ୍ନାୟ୍ ?” ହେୱାନ୍ ଇଚାନ୍, “ମାନ୍ଦାତାଂ ର ଅଡାହିମ୍ଣା ପକ୍ତାନାଙ୍ଗ୍ ।” ତାମର୍ ଇଚାତ୍, “ହେଦାଂ ପକ୍ତିନି ପାତେକ୍ ନାଂ କି ଇନେସ୍ପା ବାନ୍ଦା ହିଦ୍ନାୟ୍ ?” ଜିହୁଦା ଇଚାନ୍, “ଇନାକା ବାନ୍ଦା ହିଦ୍ନାଙ୍ଗ୍ ?” ତାମର୍ ଇଚାତ୍, “ନିଦାଂ ଇ ୱାତୁସ୍ ଆରି ଡରି, ଆରେ କେଇବାଡ୍ଗା ।” ହେବେ ଜିହୁଦା ତାଂ ହେ ସବୁ ହିଜ଼ି ତା ଲାଗେ ହାଚାନ୍, ହେବେଣ୍ଡାଂ ହେଦେଲ୍ ତା ହୁଦାଂ ଏସ୍ପିସ୍ତାତ୍ । ଇଦାଂପାଚେ ତାମର୍ ନିଂଜି ହାଚାନ୍, ଆରେ, ପ୍ଡାକ୍ୟାନି ହେନ୍ଦ୍ରା ପାଲ୍ଟାୟ୍ କିଜ଼ି ରାଣ୍ଡି ହେନ୍ଦ୍ରା ଉସ୍ପାତାତ୍ ।
ଇଦାଂପାଚେ ଜିହୁଦା ହେ କଗ୍ଲେତାଂ ବାନ୍ଦା ଜିନିସ୍ ଅନି କାଜିଂ ତା ଅଦୁଲ୍ଲମିୟ ହିରା ହୁକେ ଅଡାହିମ୍ଣା ପକ୍ତାନ୍, ମତର୍ ହେୱାନ୍ ତାଙ୍ଗେଙ୍ଗ୍ ଚଞ୍ଜ୍ୟାୱାତାନ୍ । ଲାଗିଂ ହେଦେଲ୍ ହେବେନି ମାନାୟ୍ତିଂ ୱେନ୍ବାତାତ୍, ଐନମ ହାଜ଼ିଗୁଟିତ ଇମ୍ଣି ଦାରି ମାଚାତ୍, ହେୱାନ୍ ଇମେକ୍ ? ହେୱାର୍ ଇଚାର୍, “ଇବେ ଇଦେଂକ୍ପା ଦାରିକ୍ ହିଲୁକ୍ ।” ଇଦାଂପାଚେ ଜିହୁଦା ଲାଗାୟ୍ ମାସ୍ଦି ହାଲ୍ଜି ଇଚାତ୍, “ଆନ୍ ତାଙ୍ଗେଙ୍ଗ୍ ହୁଡ଼୍ଦେଂ ଆଡ୍ୱାତାଂ; ଆରେ ହେବେନି ଲକୁ ପା ଇଚାର୍, ଇ ବାହାତ ଇମ୍ଣାକାପା ମାହାରି ମାନ୍ଗୁକ୍ ।” ତେବେ ଜିହୁଦା ଇଚାନ୍, “ତାବେ ଇନାକା ମାନାତ୍, ହେୱାନ୍ ହେଦାଂ ଇଟେନ୍, ଆସେଙ୍ଗ୍ ଇନେକିଦେଂ ଲାଜ୍ପାଦ୍ ଆନାସ୍ ? ହୁଡ଼ା, ଆନ୍ ଇ ଅଡାହିମ୍ଣା ପକ୍ତାତାଂ, ମତର୍ ଏନ୍ ତାଂ ଚଜ୍ୟା ଆୱାତାୟ୍ ।” ଆରେ ଆନ୍ମାନ୍ତ ତିନ୍ ମାସ୍ ପାଚେ ଇନେର୍ ଜିହୁଦାଂ ଇଚାନ୍, “ନି ମାଜ଼ିକଡ଼ିୟା ତାମର୍ ଦାରି ଆତାତ୍ନା; ଆରେ ଦାରି କାଜିଂ ହେଦେଲ୍ ଏସ୍ପିସ୍ତାତ୍ନା ।” ହେବେ ଜିହୁଦା ଇଚାନ୍, “ତାଂ ବାର୍ତ ତାସି ନାଣିତ ହୁଜ଼ାଟ୍ ।” ଇଦାଂପାଚେ ହେଦେଲ୍ ବାର୍ତ ତାହିୱାୟାତିଲେ, ତା ପତ୍ଲେହି ତାକେ ଇଞ୍ଜି ପକ୍ତାତ୍, ଇ ୱିଜ଼ୁ ଗାତ୍ରା ଇନେର୍ତି, ହେ ଆଣ୍ଡ୍ରେନ୍ ହୁକେ ଆନ୍ ପଟ ଆତାତ୍ନା । ଆରେ ଇଚାନ୍, “ଇ ୱାତୁସ୍ ଆରି ନୁଲ୍ ଆରେ ବାଡ଼୍ଗେ ଇନେର୍ତି ? ହେଦାଂ ଚିନ୍ କିଜ଼ି ହୁଡ଼ାଟ୍ ।” ତାପାଚେ ଜିହୁଦା ହେ ୱିଜ଼ୁ କାମାୟ୍ତିଂ ତାଦି ଇଞ୍ଜି ମାନି କିତାନ୍, “ହେୱାନ୍ ନା ତାଂ ଆଦିକ୍ ଦାର୍ମିନିକା, ଇନେକିଦେଂକି ଆନ୍ ତାଂ ନା ମାଜ଼ି ସେଲାତିଂ ହିୱାତାଂ ।” ମତର୍ ଜିହୁଦା ଆରେ ତା ଲାଗାୟ୍ ହାଲ୍ୱାତାତ୍ ।
ଆରେ, ତାମରତି ଜଲମ୍କିନି ଦିନ୍ ଏକାୱାତିଲେ, ତା ପଟତ ଜାଉଁଣା ହିମ୍ଣାଙ୍ଗ୍ ମାନାକା ଚଞ୍ଚାତ୍ । ଆରେ ତା ହିମ୍ଣାଗାଟାନି ଦିନ୍ତ ର କାଡ଼୍ଦେତି କେଇ ହତ୍ତାତ୍; ହେବେ ପୁଣେଲ୍ବୁଡିୟା ତା ହେ କେଇଦ ହେନ୍ଦୁର୍ବାନି ଡରି ଗାଚ୍ଚି ଇଚାତ୍, “ଇୱାନ୍ ପାଣ୍ୱାଁ ।” ମତର୍ ହେୱାନ୍ ତା କେଇ ଜେଲ୍ଜି ଅତିଲେ, ହୁଡ଼ାଟ୍, ତା ଟଣ୍ଡେନ୍ ଜଲମ୍ଆତାନ୍: ହେବେ ପୁଣେଲ୍ବୁଡିୟା ଇଚାତ୍, “ଏନ୍ ଇନେସ୍ ଜାର୍ କାଜିଂ ହସି ୱାତାୟ୍ ?” ନିତାକେ ଇ କସ୍ଟ ଆୟେତ୍ । ଲାଗିଂ ତା ତର୍ ପେରସ୍1 ଆତାତ୍ । ଇଦାଂପାଚେ କେଇଦ ଗେରୁବାନି ନୁଲ୍ଗାଚ୍ୟାତି ତା ଟଣ୍ଡାହି ଜଲମ୍ ଆତିଲେ, ତା ତର୍ ସେରହ2 ଆତାନ୍ ।
Source notes (2)
- Footnote ଇଚିସ୍ କସ୍ଟ
- Footnote ଇଚିସ୍ ଅଜଡ଼୍
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.