Pengo Bible
ଆଦି 30
ଇଦାଂପାଚେ ଜାର୍ତାଂ ଜାକୁବତି ମେହିର୍ ଜଲମ୍ ଆୱାତାର୍, ଇଦାଂ ହୁଡ଼୍ଜି ରାହେଲ୍ ତା ତଣ୍ଦେହିଂ ଆକାର୍ ଆଜ଼ି ଜାକ୍ବଙ୍ଗ୍ ଇଚାତ୍, “ନାଂ ହିମ୍ଣାଙ୍ଗ୍ ହିଦାଟ୍, ନଇଲେ ଆନ୍ ହାନାଙ୍ଗ୍ ।”
ତାପାଚେ ରାହେଲ୍ କାଜିଂ ଜାକୁବ ରିସା ଆତାନ୍; ଆରେ, ହେୱାନ୍ ଇଚାନ୍, “ଆନ୍ ଇନାକା ପର୍ମେସ୍ୱର୍ ଆକାୟ୍ ? ହେୱାନ୍ ହିନା ନିଂ ହିମ୍ଣାୱାକ୍ଡ଼ା ହିଦ୍ୱାତାନ୍ନା ।”
ହେଏଚେକାଡ଼୍ଦ ରାହେଲ୍ ଇଚାତ୍, “ଇଦାଂ ହୁଡ଼ାଟ୍, ନା ଆଡ଼ିଏଣି (ବିଲ୍ହା) ଜିପୁଲି ମାନାତ୍, ହେଦେଲ୍ ଲାହାଂ ହୁଞ୍ଜା, ହେଦେଲ୍ ଗାଟାତିସ୍ ନା ୱାକ୍ତ ହିତ୍ତିସ୍ ହେଦେଲ୍ କାଜିଂ ଆନ୍ ପା ହିମ୍ଣା ଗାଟାନାଙ୍ଗ୍ ।” ଆରେ, ହେଦେଲ୍ ତା ଆଡ଼ିଏଣି ବିଲ୍ହାଂ ଜାକୁବ ଲାହାଂ ବିବା କିଜ଼ି ଆତାତ୍ । ତାପାଚେ ଜାକୁବ ହେଦେଲ୍ ଲାହାଂ ହୁଞ୍ଚିଲେ, ବିଲ୍ହା ଏସ୍ପିସ୍ତି ଜାକୁବ କାଜିଂ ର ହିମ୍ଣା ଗାଟାତାତ୍ । ହେଏଚେକାଡ଼୍ଦ ରାହେଲ୍ ଇଚାତ୍, “ଇସ୍ୱର୍ ନା ବିଚାର୍ କିତ୍ତାନ୍, ପା ନା କାକୁଲ୍ତି ୱେନ୍ଜି ନାଂ ମାଜ଼ି” ହିତ୍ତାନ୍, ଇଦାଂକାଜିଂ ହେଦେଲ୍ ତା ତର୍ ଦାନ୍1 ଇଡ଼୍ତାନ୍ । ଇଦାଂପାଚେ ରାହେଲ୍ତି ଆଡ଼ିଏଣି ବିଲ୍ହା ଆରେରଗ ଏସ୍ପିସ୍ତି ଜାକୁବ କାଜିଂ ଜେତି ହିମ୍ଣା ଗାଟାତାତ୍ । ହେଏଚେକାଡ଼୍ଦ ରାହେଲ୍ ଇଚାତ୍, “ଆନ୍ ତଣ୍ଦେଲ୍ ଲାହାଂ ଇସ୍ୱର୍ ବାର୍ତାକା କସ୍ଟଜୁଜ୍ କିଜ଼ି ଜିଣା ଆତାଂ”; ଇଦାଂକାଜିଂ ହେୱାନ୍ ତା ତର୍ ନପ୍ତାଲି କସ୍ଟଜୁଜ୍ ଇଡ଼୍ତାନ୍ । ଇଦାଂପାଚେ ଲେୟା ତାଦାଂ ଗରବ୍ ବନ୍ଦ୍ଆତାକା ପୁନ୍ଜି ଜାର୍ତି ସିଲ୍ପା ତର୍ନି ଆଡ଼ିଏଣିଂ ଅଜ଼ି ଜାକୁବ ଲାହାଂ ବିବା କିତାତ୍ । ପାଚେ ଲେୟାତି ଆଡ଼ିଏଣି ସିଲ୍ପାତାଂ ଜାକୁବତି ର କାଡ଼୍ଦେ ଜଲମ୍ ଆତାନ୍ । ପଚେ ଲେୟା ଇଚାତ୍, “ଇଦାଂ ଇନାକା କାରୁମ୍”; ଇଦାଂକାଜିଂ ତା ତର୍ ଗାଦ2 ଇଡ଼୍ତାନ୍ । ଇଦାଂପାଚେ ଲେୟାତି ଆଡ଼ିଏଣି ସିଲ୍ପା ଜାକୁବ କାଜିଂ ଜେତି ହିମ୍ଣା ଗାଟାତାତ୍ । ପାଚେ ଲେୟା ଇଚାତ୍, “ନାଦାଂ ବେସି ୱାରି ଜିପଲିକ୍ ନାଙ୍ଗେଙ୍ଗ୍ ୱାର୍ୟାସି ଇଞ୍ଜ୍ନିକ୍,” ଇଦାଂକାଜିଂ ହେଦେଲ୍ ତର୍ ଆସେର୍3 ଇଡ଼୍ତାନ୍ ।
ଇଦାଂପାଚେ ଗଁ ତ୍ରେସ୍ନିହିଂ ରୁବେନ୍ ବାର୍ତ ହାଲ୍ଜି ଜମିତାଂ (ଦୁଦାପାଡ଼୍)4 ଗାଟାଜ଼ି ତାସି ତା ତେହି ଲେୟାତିଂ ହିତାନ୍ । ପାଚେ ରାହେଲ୍ ଲେୟାତିଂ ଇଚାତ୍, “ନି ମାଜ଼ି ତାହିୱାଜ଼ିମାନି ଦୁଦାପାଡ଼୍ ଅଲପ୍ ନାଂ ହିଦାଟ୍ ।” ହେବେ ହେଦେଲ୍ ଇଚାତ୍, “ଏନ୍ ନା ଡକ୍ରାଂ ମ୍ଡାତାୟ୍ନା, ଇଦାଂ କି ଅଲପ୍ ବିସ୍ରେ ? ଏନ୍ ନା ମାଜ଼ିତି ଦୁଦାପାଡ଼୍ ପା କି ମ୍ଡାନାୟ୍ ?” ତେବେ ରାହେଲ୍ ଇଚାତ୍ “ନି ମାଜ଼ିତି ଦୁଦାପାଡ଼୍5 ବାଦୁଲ୍ତ ହେୱାନ୍ ନେଞ୍ଜେଙ୍ଗ୍ ନାଣା ନି ଲାହାଂ ହୁଞ୍ଜ୍ନାନ୍ ।” ଇଦାଂପାଚେ ମ୍ଡିକାହାରେସ୍ ଜମିତାଂ ଜାକୁବତି ୱାନି ୱେଡ଼ାଲିଂ ଲେୟା ତା ଲାହାଂ ବେଟା ଆଦେଂ ବାର୍ତ ହାଲ୍ଜି ଇଚାତ୍, “ନିଂ ନା ଲାଗାୟ୍ ୱାନାକା ଆନାତ୍; ଇନେକିଦେଂକି ଆନ୍ ମା ମାଜ଼ିତି ଦୁଦାପାଡ଼୍ ହିଜ଼ି ବାଡ଼ା ଅତାଂ ।” ଲାଗିଂ ହେୱାନ୍ ହେ ନାଣା ତା ଲାହାଂ ହୁନ୍ଞ୍ଚାନ୍ ।
ତାପାଚେ ଇସ୍ୱର୍ ଲେୟାତି ପାର୍ତନା ୱେଚିଲେ, ହେଦେଲ୍ ଏସ୍ପିସ୍ତି ଜାକୁବତି ପାଞ୍ଚ୍ ଲମର୍ ମାଜ଼ି ଜଲମ୍ କିତାତ୍ । ତେବେ ଲେୟା ଇଚାତ୍, “ଆନ୍ ଆଣ୍ଡ୍ରେନିଂ ନା ଆଡ଼ିୟାଣିଂ ହିଜ଼ି ମାଚାଙ୍ଗ୍, ଇସ୍ୱର୍ ତା ଦାନ୍ ନାଂ ହିତ୍ତାନ୍ନା”; ଇଦାଂକାଜିଂ ହେଦେଲ୍ ତା ତର୍ ଇସାକର ଇଡ଼୍ତାତ୍ । ଇଦାଂପଚେ ଲେୟା ଆରେରଗ ଏସ୍ପିସ୍ତି ଜାକୁବତି ଚଅନି ଲମର୍ ମାଜ଼ି ଜଲମ୍ କିତାତ୍ । ତାପାଚେ ଲେୟା ଇଚାତ୍, “ଇସ୍ୱର୍ ନାଂ ହାର୍ଦି ଜତୁକ୍ ହିତ୍ତାନ୍; ନଂ ନା ଆଣ୍ଡ୍ରେନ୍ ନା ଲାହାଂ ବାହା କିନାନ୍, ଇନେକିଦେଂକି ଆନ୍ ତାଦାଂ ଚଅନି ଲମର୍ ମାଜ଼ି ଜଲମ୍ କିତାଂନା”; ଇଦାଂକାଜିଂ ହେୱାନ୍ ତା ତର୍ ସବୁଲୁନ୍6 ଇଡ଼୍ତାତ୍ । ଇଦାଂପଚେ ହେଦେଲ୍ ର ଗାଡ଼୍ଚେ ଜଲମ୍ କିତିଲେ, ତା ତର୍ ଦିଣା ଇଡ଼୍ତାତ୍ ।
ଇଦାଂପାଚେ ଇସ୍ୱର୍ ରାହେଲ୍ତିଂ ଏତ୍ କିତାନ୍ ଆରି ଇସ୍ୱର୍ ତା ପାର୍ତନା ୱେନ୍ଞ୍ଜି ତାଙ୍ଗେଙ୍ଗ୍ ଏସ୍ପିସ୍ତେଙ୍ଗ୍ ସାକ୍ତି ହିତାନ୍ । ତାପାଚେ ହେଦେଲ୍ ଏସ୍ପିସ୍ତି ମାଜ଼ି ଗାଟାଇକିତାତ୍, “ଇସ୍ୱର୍ ନଂ ନା ଅପ୍ମାନ୍ ଦେହା କିତାନ୍ ।” ଲାଗିଂ ହେଦେଲ୍ ତା ତର୍ ଜସେପ୍ ହିଜ଼ି ଇଚାତ୍, “ନିତ୍ରେମାପ୍ରୁ ନାଙ୍ଗେଙ୍ଗ୍ ଆରେ ର ମାଜ଼ି ହିଦେନ୍ ।”
ଜାକୁବତି ଦାନ୍
ଆରେ ରାହେଲ୍ତାଂ ଜସେପ୍ ଜଲମ୍ ଆତି ପାଚେ ଜାକୁବ ଲାବନତିଂ ଇଚାନ୍, “ନାଙ୍ଗେଙ୍ଗ୍ ହେଲ ହିଦା, ଆନ୍ ନିଜ୍ ବାହାତ ଆରି ନିଜ୍ ଦେସ୍ତ ହାନାଙ୍ଗ୍ । ଆନ୍ ଇମ୍ଣାକାର୍ କାଜିଂ ନି ଆଡ଼ିଏନ୍ କାମାୟ୍ କିତାଂନା, ନା ହେ ଡକ୍ରିକାଂ ଆରି ମାଜ଼ିରିଙ୍ଗ୍ ଅଜ଼ି ହାଞ୍ଜେଙ୍ଗ୍ ହିଦା; ଇନେକିଦେଂକି ଇମ୍ଣି ବାନି ମି ଆଡ଼ିଏନ୍ କାମାୟ୍ କିତାଂନା, ହେଦାଂ ଏନେଙ୍ଗ୍ ପୁଚାୟ୍ନା ।”
“ହେଏଚେକାଡ଼୍ଦ ଲାବନ ତାଙ୍ଗେଙ୍ଗ୍ ଇଚାନ୍, ଗୱାରି କିଦ୍ନାଙ୍ଗା, ଏନ୍ ନା କାଜିଂ ଉପ୍କାର୍ କିଦା, ଇନେକିଦେଂକି ନି କାଜିଂ ନିତ୍ରେମାପ୍ରୁ ନାଂ ଆର୍ସିବାଦ୍ କିତ୍ତାନ୍ନା, ଇଦାଂ ଆନ୍ ମାନ୍ତାଙ୍ଗ୍ ପୁଚାଙ୍ଗ୍ନା । ଇଦାଂକାଜିଂ ଏନେଙ୍ଗ୍ ନିଜେ ନିଦାଂ ବୁତି ତିର୍ କିଆ, ଆନ୍ ହେଦାଂ ମିଙ୍ଗେଙ୍ଗ୍ ହିଦ୍ନାଙ୍ଗ୍ ।”
ପାଚେ ଜାକ୍ବ ହେୱାନିଙ୍ଗ୍ ଇଚାନ୍, “ଆନ୍ ମିଦାଂ ଇମ୍ଣି ବାନି ଆଡ଼ିଏନ୍ କାମାୟ୍ କିତାଂନା ଆରି ନା ଲାଗାୟ୍ ନି ପସୁଙ୍ଗ୍ ଇନେସ୍ ମାନିଙ୍ଗ୍, ହେଦାଂ ନିନେଙ୍ଗ୍ ୱେଚ୍ଚାତାଂନା । ଇନେକିଦେଂକି, ନା ୱାନି ଆଗେ ନିଦାଂ ଅଲପ୍ ସମ୍ପତି ମାଚାତ୍, ମତର୍ ନଂ ବାଡାଜ଼ି ବେସି ଆତାତ୍ନ୍ନା; ଆରେ, ଆନ୍ ଇମ୍ଣାକାପା ବାହାତାଂ ମି ମେଣ୍ଡା ମାନ୍ଦାତିଂ ହାରାୟ୍କିଦେଂ ଅତାଂ ନିତ୍ରେମାପ୍ରୁ ନିଦାଂ ଦନ୍ୟ କିତ୍ତାନ୍ନା; ମତର୍ ଆନ୍ ମି କୁଟୁମ୍ କାଜିଂ ଇନାୱେଡ଼ାଂ ରୁଣ୍ଡାୟ୍ କିନାଙ୍ଗ୍ ?”
ତାପାଚେ ଲାବନ ଇଚାନ୍, “ଆନ୍ ନିଙ୍ଗେଙ୍ଗ୍ ଇନାକା ହିଦ୍ନାଙ୍ଗ୍ ?” ଜାକୁବ ଇଚାନ୍, “ନିଙ୍ଗେଙ୍ଗ୍ ହିଦେଂ ଲାଗ୍ଦୁତ୍; ଜଦି ଏନ୍ ନା କାଜିଂ ରଞ୍ଜାଙ୍ଗ୍ କାମାୟ୍ କିନାୟ୍, ଲାଗିଂ ଆନ୍ ନି ପସୁକାଂ ଆରେରଗ ହାରାୟ୍କିଜ଼ି ପହାପାଲି କିନାଙ୍ଗ୍ । ନେଞ୍ଜେଙ୍ଗ୍ ଆନ୍ ନି ମାନ୍ଦା ବିତ୍ରେ ହାଲ୍ଜି ମେଣ୍ଡାଙ୍ଗ୍ ବିତ୍ରେତାଂ କାବ୍ରାଂ ଆରି ଟିକ୍ଲିଂ ଚିନ୍କିଜ଼ି ଆରି କାର୍ହାତି ମେଣ୍ଡାକାଂ, ଆରେ, ଅଡାଂ ବିତ୍ରେତାଂ ଟିକ୍ଲିଂ ଚିନ୍କିଜ଼ି ଆରି କାବ୍ରି ଅଡାକାଂ ବିନେ କିନାଙ୍ଗ୍; ହେ ସବୁ ନା ବୁତି ଲାକେ ଆନାତ୍ । ଇଦାଂପାଚେ ଏଚେକାଡ଼୍ଦ ନି ମୁମ୍ଦ ନା ବୁତି ବିସ୍ରେ ଏକାୱାନାତ୍, ହେଏଚେକାଡ଼୍ଦ ନା ଦାର୍ମି କାତା ନା ବିସ୍ରେ ସାକି ହିନାୟ୍, ଇଚିସ୍, ଅଡାକାଂ ବିତ୍ରେ କାବ୍ରି ଆରି ଟିକ୍ଲିଂ ଚିନ୍କିନି ଅଡାଂ ବିନେ ଆରି ମେଣ୍ଡାଙ୍ଗ୍ ବିତ୍ରେ କାର୍ହାତି ମେଣ୍ଡାଙ୍ଗ୍ ବିନେ ଏଚେକ୍ ମାନିକ୍, ହେଦାଂ ନା ମ୍ଡାକେନ୍ ଲାକେ ଗାଣା ଆନାତ୍ ।”
ତାପାଚେ ଲାବନ ଇଚାନ୍, “ହାର୍ଦାକା, ନି କାତା ଇସାବ୍ରେ ଆୟେତ୍ ।” ଇଦାଂପାଚେ ହେୱାନ୍ ହେ ନାଞ୍ଜିଙ୍ଗ୍ ଆମ୍କୁଗାରି ଆରି ଟିକା ଚିନ୍କିନି ଅଡାଂ ସବୁ ଆରି କାବ୍ରାକାବ୍ରି ପା ଡ଼ିଞ୍ଜ୍ନିବାନି ତେୟାଅଡାଂ, ଆରେ, କାର୍ହାତିବାନି ମେଣ୍ଡାଙ୍ଗ୍ ବିନେ ବିନେ କିଜ଼ି ତା ହିମ୍ଣାଙ୍ଗ୍ କେଇଦ ହେଲାୟ୍ କିତାନ୍; ଆରେ ହେୱାନ୍ ଜାର୍ତି ଆରି ଜାକୁବତି ବିତ୍ରେ ତିନ୍ ଦିନ୍ନି ହାଜ଼ିତାଂ ଦେହା ଇଡ଼୍ତାନ୍; ଆରେ, ଜାକୁବ ଲାବନତି ବାକି ପସୁମାନ୍ଦା ହାରାୟ୍କିଦେଂ ଲାଗାତାନ୍ ।
ଆରେ ଜାକୁବ ଲିବ୍ନି ଆରି ଲୁସ୍ ଆରି ଅର୍ମନ୍ ମାର୍ନି ପୁନି କେନ୍ଦାଙ୍ଗ୍ କାଦ୍ଦି ହେବେଣ୍ଡାଂ ପାଲାଙ୍ଗ୍ ଉନ୍ଦି ୱେସ୍କୁନି ଡ଼ିଞ୍ଜ୍ନିବାନା ହପ୍ତାନ୍ । ଇଦାଂପାଚେ ଇମ୍ଣି ବାହାତ ପସୁଙ୍ଗ୍ ଏସୁଙ୍ଗ୍ ଉଣ୍ଡେଙ୍ଗ୍ କାଜିଂ ୱାନିକ୍, ହେ ବାହାତ ହେୱାଙ୍ଗ୍ ମୁମ୍ଦି ଏସ୍କୁଣ୍ଡି ବିତ୍ରେ ହେ ପାଲାହିଲ୍ୱି କେନ୍ଦାଙ୍ଗ୍ ସବୁ ଉଚା କିଜ଼ି ଇଡ଼୍ତାତ୍; ତାପାଚେ ଏଜ଼ୁଙ୍ଗ୍ ଉଣି ୱେଡ଼ାଲିଂ ହେୱାଙ୍ଗ୍ ପାଡ଼ାହାଚିକ୍ । ଆରେ, ହେ କେନ୍ଦା ଲାଗାୟ୍ ହେୱାଙ୍ଗ୍ ମେହାନାକା ଆତିଲେ ପସୁଙ୍ଗ୍ ଗାରିଙ୍ଗ୍ଆଜ଼ି ଆରି କାବ୍ରାଚିତ୍ରା ଆରି ଟିକା ଚିନ୍କିଜ଼ି ହିମ୍ଣାଙ୍ଗ୍ ଦାଡ଼ିତିକ୍ । ତାପାଚେ ଜାକୁବ ହେ ହିମ୍ଣାକାଂ ବିନେ ବିନେ କିତାନ୍, ଆରେ, ଲାବନତି ଗାରିଇଡ଼୍ତାକା ଆରି କାର୍ହାତିବାନି ସବୁ ମେଣ୍ଡାଙ୍ଗ୍ କାଜିଂ ମେଣ୍ଡିକାଂ କାଣ୍କୁ ଇଟିକିତାନ୍; ଇ ବାନି ହେୱାନ୍ ଲାବନତି ମାନ୍ଦା ଲାହାଂ ତା ମାନ୍ଦା ଇଟ୍ୱାଦାଂ ବିନେ କିତାନ୍ ।
ଆରେ, ବାଡ଼୍କାସ୍ ପସୁଙ୍ଗ୍ ଇନେସ୍ କେନ୍ଦାଙ୍ଗ୍ ଲାଗାୟ୍ ପାଡ଼ାହାନିକ୍, ଇଦାଂକାଜିଂ ଏସ୍କୁଣ୍ଡି ବିତ୍ରେ ପସୁଙ୍ଗ୍ ମୁମ୍ଦ ହେ ବେଡ୍ଗା ଇଡ଼୍ତାନ୍; ମତର୍ ଜାକୁବ ନାଦାର୍ ପସୁଙ୍ଗ୍ ମୁମ୍ଦ ଇଟ୍ୱାତାନ୍; ତାପାଚେ ନାଦାର୍ ପସୁଙ୍ଗ୍ ଲାବନତି ଆରି ବାଡ଼୍କାସ୍ ପସୁଙ୍ଗ୍ ଜାକୁବତି ଆତିକ୍ । ଇଦାଂକାଜିଂ ଜାକୁବତିଂ ବେସି ବାଡାତିକ୍, ଆରେ, ତା ପସୁ, ଆଡ଼ିଏନ୍ ଆଡ଼ିୟାଣି, ଉଟ୍ ଆରି ଗଦଂ ବେସି ଆତିକ୍ ।
Source notes (6)
- Footnote ବିଚାର୍
- Footnote କାରୁମ୍
- Footnote ୱାରି
- Footnote ଇଦିଲିଂ ଚିଚି ପାଚେ ଇଦାଂ ଜିଉନନାକାଦିଂ ବାଡାୟ୍ କିନାତ୍ ଆରେ ଇଦାଂ କଗ୍ଲେକାଂ ଏସ୍ପିହ୍ନି କାଜିଂ ଅହ ଲାକେ ବେବାର୍ କିୟାନାତ୍
- Footnote ଇଦାଂ ଇମ୍ଣା ଗାଟାୱି କଗ୍ଲେକ୍ ଚିନ୍ଞ୍ଜି ଏସ୍ପିସ୍ତି ହିମ୍ଣା ଗାଟାସି ମାଚିକ୍
- Footnote ସନ୍ମାନ୍
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.