Pengo Bible
ଏଜ୍ରା 5
ପାର୍ତାନା ଇଲ୍ କାମାୟ୍ ଆରେରଗ ଆରମ୍
ଇଦାଂପାଚେ ହାଗୟ ବେଣ୍ବାକ୍ଣାୟ୍କିନାକାନ୍ ଆରି ଇଦର ମାଜ଼ି ଜିକରିୟ, ଇ ବେଣ୍ବାକ୍ଣାୟ୍କିନାକାର୍ ଜିହୁଦା ଆରି ଜିରୁସାଲମ୍ନି ଜିହୁଦିର୍ତି ଲାଗାଂ ବେଣ୍ବାକ୍ଣାୟ୍କିନି ବଚନ୍ ସୁଣାୟ୍ କିତାର୍; ହେୱାର୍ ଇସ୍ରାଏଲ୍ନି ପର୍ମେସ୍ୱର୍ତି ତର୍ଦ ହେୱାର୍ତି ଲାଗାଂ ବେଣ୍ବାକ୍ଣାୟ୍କିନି ବଚନ୍ ସୁଣାୟ୍ କିତାର୍ । ହେବେ ସଲ୍ଟିୟେଲନି ମାଜ଼ି ଜିରୁବାବିଲ ଆରି ଜସାଦକନି ମାଜ଼ି ଜେସୁୟ ନିଙ୍ଗ୍ଜି ଜିରୁସାଲମ୍ତ ପର୍ମେସ୍ୱର୍ତି ଇଲ୍ ରଚ୍ଚେଙ୍ଗ୍ ଲାଗାତାର୍; ଆରେ, ପର୍ମେସ୍ୱର୍ତି ବେଣ୍ବାକ୍ଣାୟ୍କିନାକାର୍ ହେୱାର୍ ଲାହାଂ ମାନ୍ଜି ହେୱାର୍ତି ସାଇଜ କିତାର୍ । ହେ ସମୁତ ତତନୟ, ନାଗୁଡ଼୍ ହେପାଡ଼୍କା ଆଦିକାରି ଆରି ସତର-ବସଣୟ ଆରି ହେୱାର୍ ହାଙ୍ଗ୍ଦାକାର୍ ୱାଜ଼ି ହେୱାରିଂ ୱେନ୍ବାତାର୍, “ଇ ଇଲ୍ ରଚ୍ନି କାଜିଂ ଆରି ଇ ଇଲ୍ ୱିହ୍ନି କାଜିଂ ଇନେର୍ ମିଙ୍ଗେଙ୍ଗ୍ ବଲ୍ ହିତ୍ତାର୍ ?” ଲାଗିଂ ଆପେଙ୍ଗ୍ ହେୱାରିଂ ଇଦାଂ ୱେଚ୍ଚି ହିତାପ୍; ହେୱାର୍ ୱେନ୍ବାତାର୍, “ଇଦାଂ ରଚ୍ଚାକାର୍ ତର୍ ଇନାକା ?” ମତର୍ ଜିହୁଦିୟ ପାର୍ଚିନାର୍ କାଜିଂ ହେୱାର୍ତି ପର୍ମେସ୍ୱର୍ତି କାଣ୍କୁ ମାଚିଲେ ଦାରିୟାବସ ଲାଗାଂ ଇ କାତା ଇନ୍ୱିତିଲେ ଆରି ଆକି ହୁକେ ହେ ବିସ୍ରେନି ଉତର୍ ଆରେରଗ ୱାୱି ପାତେକ୍ ସାତ୍ରୁର୍ ହେୱାରିଂ ବନ୍ଦ୍ କିୱାତାନ୍ ।
ଦାରିୟାବସ ରାଜା ଲାଗାଂ ତତନୟତି ଆକି
ତତନୟ, ନାଗୁଡ଼୍ ହେପାଡ଼୍କା ଆଦିକାରି ଆରି ସତର-ବସଣୟ ଆରି ନାଗୁଡ଼୍ ହେପାଡ଼୍କା ତା ହାଙ୍ଗ୍ଦାକାର୍ ଅପର୍ସକିୟର୍ତି ଦାରିୟାବସ ରାଜା ଲାଗାଂ ପକ୍ୟାତି ଆକିନି ୱିଜ଼ୁଲେକା; ହେୱାର୍ ରାଜା ଲାଗାଂ ଇମ୍ଣି ଆକି ପକ୍ଚି ମାଚାର୍, ହେବେ ଇ ଲାକେ ଲେକା ମାଚାତ୍; “ମୁଡ଼୍ରାଜା ଦାରିୟାବସ୍ନି ସବୁ ସୁସ୍ତା ଆଏତ୍ । ମୁଡ଼୍ ରାଜା ଲାଗାଂ ଜାଣାୟ୍କିନାକା ଇଦାଂ ଜେ, ‘ଆପେଙ୍ଗ୍ ଜିହୁଦା ରାଜିନି ଗାଜା ପର୍ମେସ୍ୱର୍ତି ଇଞ୍ଜ ହାଲ୍ଜି ମାଚାପ୍, ହେଦାଂ ଗାଜା ଗାଜା କାଲ୍କୁତାଂ ରଚ୍ନାରା ଆରି କାତିତ ଦୁଲାମ୍ କୁଚିକିତାର୍ଣ୍ଣା, ଆରେ ଇ କାମାୟ୍ ଜାତୁନ୍ ତାଂ ଆନାତା ଆରି ହେୱାର୍ କେଇଦ ସପଲ୍ ଆନାତା ।’ ଲାଗିଂ ଆପେଙ୍ଗ୍ ହେ ପାର୍ଚିନାରିଂ ୱେନ୍ବିସ୍ ଇ ଲାକେ ଇଚାପ୍, ‘ଇ ପାର୍ତାନା ଇଲ୍ ରଚ୍ଚେଙ୍ଗ୍ ଆରି ଇ ଡାଣ୍ଡ୍କାତି ୱିସ୍ତେଙ୍ଗ୍ ଇନେର୍ ମିଙ୍ଗେଙ୍ଗ୍ ବଲ୍ ହିତ୍ତାର୍ ?’ ଆରେ ଆପେଙ୍ଗ୍ ନିଙ୍ଗେଙ୍ଗ୍ ୱେଚ୍ନି କାଜିଂ ହେୱାର୍ତି ମୁଡ଼୍ଦାକାର୍ତି ତର୍ ଲେକି କିଜ଼ି ଅଦେଂ ହେୱାର୍ତି ତର୍ ୱେନ୍ବାତାପ୍ । ପାଚେ ହେୱାର୍ ମାଙ୍ଗେଙ୍ଗ୍ ଇ ଉତର୍ ହିତ୍ତାର୍, ‘ଆପେଙ୍ଗ୍ ସାର୍ଗେ ଆରି ପୁର୍ତିନି ପର୍ମେସ୍ୱର୍ତି ଆଡ଼ିୟା, ଆରେ ଇ ଇମ୍ଣି ଇଲ୍ ରଚ୍ଚାପ୍ନା, ଇଦାଂ ବେସି ବାର୍ହୁ ଆଗେ ରଚ୍ୟାଜ଼ି ମାଚାତ୍, ଇସ୍ରାଏଲ୍ନି ର ମୁଡ଼୍ ରାଜା ହେଦାଂ ରଚ୍ଚି ୱିସ୍ତି ମାଚାନ୍ । ମତର୍ ମା ଆକର୍ଦାଦିର୍ ସାର୍ଗେନି ପର୍ମେସ୍ୱର୍ତିଂ ରିସା କିତି ପାଚେ ହେୱାନ୍ ହେୱାରିଂ ବାବିଲ୍ନି ରାଜା କଲଦିୟ ନବୁକଦ୍ନିତ୍ସର କେଇଦ ହେଲାୟ୍ କିତିଲେ, ହେୱାନ୍ ଇ ପାର୍ତାନା ଇଲ୍ ନାସ୍ କିଜ଼ି ମାନାୟାରିଂ ବାବିଲ୍ତ ଅସି ହାଚାନ୍ । ମତର୍ ବାବିଲ୍ନି ରାଜା କରସ୍ତି ଆଦିକାର୍ନି ପର୍ତୁମ୍ ବାର୍ହୁତ ପର୍ମେସ୍ୱର୍ତି ଇ ପାର୍ତାନା ଇଲ୍ ରଚ୍ନି କାଜିଂ କରସ୍ ରାଜା ବଲ୍ ହିତାନ୍ ।’ ଆରେ, ନବୁକଦ୍ନିତ୍ସର ପର୍ମେସ୍ୱର୍ତି ପାର୍ତାନା ଇଲ୍ନି ଜେସବୁ ହନା ଆରି ରୁପା କଣ୍ଡି ଜିରୁସାଲମ୍ତ ମନ୍ଦିର୍ତାଂ ଅଜ଼ି ବାବିଲ୍ନି ମନ୍ଦିର୍ତ ତାସି ମାଚାନ୍, ହେଦାଂ ସବୁ କରସ୍ ରାଜା ବାବିଲ୍ନି ମନ୍ଦିର୍ତାଂ ହପ୍ଚି ହିତାନ୍, ଆରେ ହେଦାଂ ସବୁ ସେସବସର ତର୍ନି ତା ବାଚିକିତି ସାସନ୍କାରିୟା କେଇଦ ହେଲାୟ୍ କିତାର୍; ଆରେ, ହେୱାନ୍ ହେୱାନିଂ ଇଚାନ୍, ‘ଇସବୁ କଣ୍ଡି ଅସି ହାଲ୍ଜି ଜିରୁସାଲମ୍ନି ମନ୍ଦିର୍ତ ଇଟାଟ୍ ଆରି ପର୍ମେସ୍ୱର୍ତି ପାର୍ତାନା ଇଲ୍ ଜାର୍ ବାହାତ ରଚ୍ୟା ଆଏତ୍ ।’ ହେବେ ହେ ସେସବସର ୱାଜ଼ି ଜିରୁସାଲମ୍ତ ପର୍ମେସ୍ୱର୍ତି ପାର୍ତାନା ଇଲ୍ନି କୁନାଦି ରଚ୍ଚାନ୍; ଆରେ, ହେ ସମୁତାଂ ନଙ୍ଗ୍ ପାତେକ୍ ହେଦାଂ ରଚ୍ୟା ଆନାତା, ଆତିସ୍ପା ହେଦାଂ ପୁରା ଆଉତେ ।
ଇଦାଂକାଜିଂ ଏଚେକାଡ଼୍ଦ ମୁଡ଼୍ ରାଜାଙ୍ଗ୍ ହାର୍ ଡିହାତାତ୍, ଲାଗିଂ କରସ୍ ରାଜା ଜିରୁସାଲମ୍ତ ପର୍ମେସ୍ୱର୍ତି ଇ ପାର୍ତାନା ଇଲ୍ ରଚ୍ନାକା ବଲ୍ ହିଜ଼ି ମାଚାନ୍ କି ଆକାୟ୍, ହେଦାଂ ବାବିଲ୍ନି ମୁଡ଼୍ ରାଜାଙ୍ଗ୍ ବିତ୍ରି ଇଞ୍ଜ ଦାହ୍ୟା ଆନାତ୍, ଆରେ ଇ ବିସ୍ରେ ମୁଡ଼୍ ରାଜା ମା ଲାଗାଂ ଜାର୍ତି ଇଚା ୱେଚ୍ଚେନ୍ ।”
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.