Pengo Bible
ଏଜ୍ରା 1
କରସ୍ତି ୱେଚ୍ନାକା
ଜିରିମିୟତି ୱେଇ ହୁକେ ସବୁ ନିତ୍ରେମାପ୍ରୁତି ବଚନ୍ ସପଲ୍ଆତି ପାରସ୍ୟନି ରାଜା କରସ୍ନି ଆଦିକାର୍ନି ପର୍ତୁମ୍ ବାର୍ହୁତ ନିତ୍ରେମାପ୍ରୁ ପାରସ୍ୟନି ରାଜା କରସ୍ନି ମାନ୍ତିଂ ହପ୍ତିଲେ, ହେୱାନ୍ ଜାର୍ ରାଜିନି ସବୁ ସୁଣାୟ୍ କିଜ଼ି, ପା ଲେକାୟ୍କିଜ଼ି ଇ କାତା ପର୍ଚାର୍ କିୟ୍କିତାନ୍, ଇଚିସ୍, “ପାରସ୍ୟନି ରାଜା କରସ୍ ଇଦାଂ ଇନାନ୍, ନିତ୍ରେମାପ୍ରୁ ସାର୍ଗେନି ପର୍ମେସ୍ୱର୍, ପୁର୍ତିନି ୱିଜ଼ୁ ରାଜି ମାଙ୍ଗେଙ୍ଗ୍ ହିତ୍ତାନ୍ନା; ଆରେ, ହେୱାନ୍ ଜିହୁଦା ଦେସ୍ନି ଜିରୁସାଲମ୍ତ ତା କାଜିଂ ର ପାର୍ତାନା ଇଲ୍ ରଚ୍ଚେଙ୍ଗ୍ ମାଙ୍ଗେଙ୍ଗ୍ ବଲ୍ ହିତ୍ତାନ୍ନା । ତା ସବୁ ମାନାୟାର୍ ବିତ୍ରେ ମି ଇନେର୍କି ଆଏର୍, ତା ପର୍ମେସ୍ୱର୍ ତା ଲାହାଂ ଆଏନ୍ ଆରି ହେୱାନ୍ ଜିହୁଦା ଦେସ୍ନି ଜିରୁସାଲମ୍ତ ହାଲ୍ଜି ନିତ୍ରେମାପ୍ରୁ ଇସ୍ରାଏଲ୍ନି ପର୍ମେସ୍ୱର୍ତି ଜିରୁସାଲମ୍ନି ପାର୍ତାନା ଇଲ୍ ରଚ୍ନାସ୍; ହେୱାନ୍ ପର୍ମେସ୍ୱର୍ ଆନାନ୍ । ଆରେ, ଇନେର୍କି ଇମ୍ଣି ବାହାତ ବାକି ମାନ୍ଜି ମାନାରା, ତା ହେ ବାହାନି ମାନାୟାର୍ ପର୍ମେସ୍ୱର୍ତି ଜିରୁସାଲମ୍ନି ଇଲ୍ କାଜିଂ ନିଜାର୍ ଆକାତ୍ ପିସ୍ତି ରୁପା ଆରି ହନା, ବାରବିନି ଜିନିସ୍ ଆରି ପସୁ ହିଜ଼ି ତା ସାଇଜ କିଏନ୍ ।”
ହେପାଦ୍ନା ଜିହୁଦାନି ଆରି ବିନ୍ୟାମିନ୍ନି ଆକର୍ଲାତ୍ରା ମୁଡ଼୍ଦାକାର୍, ଆରେ ମାପ୍ରୁହେବାକିନାକାର୍ ଆରି ଲେବିୟର୍, ଇଚିସ୍, ନିତ୍ରେମାପ୍ରୁତି ଜିରୁସାଲମ୍ନି ପାର୍ତାନା ଇଲ୍ ରଚ୍ଚେଂ ହାନି କାଜିଂ ପର୍ମେସ୍ୱର୍ ଇମ୍ଣି ୱିଜ଼ାର୍ ମାନ୍ତିଂ ୱେଚ୍ଚାନ୍, ହେୱାର୍ ନିଙ୍ଗ୍ତାର୍ । ଆରେ, ନିଜାର୍ ଇଚାତାଂ ହିଜ଼ିମାନି ଜିନିସ୍ ପିସ୍ତି ହେୱାର୍ତି ଚାର୍ବେଣ୍ତାଂ ମାନାୟ୍ ୱିଜ଼ାର୍ ରୁପାବାର୍ତି ବାହା, ହନା, ବାରବିନି ଜିନିସ୍ ଆରି ପସୁ ଆରି ବେସିମଲ୍ ଜିନିସ୍ ହିଜ଼ି ହେୱାର୍ତି କେଇ ବାପୁ କିତାର୍ ।
ଆରେ, ନବୁକଦ୍ନିତ୍ସର ନିତ୍ରେମାପ୍ରୁତି ଇଲ୍ନି ଜେ ସବୁ ବାହା ଜିରୁସାଲମ୍ତାଂ ତାସି ଜାର୍ ପେନ୍ ମନ୍ଦିର୍ତ ଇଡ଼୍ଜି ମାଚାନ୍, କରସ୍ ରାଜା ହେଦାଂ ସବୁ ହପି କିଜ଼ି ତାସିୱାତାନ୍ । ପାରସ୍ୟନି ରାଜା କରସ୍ ମୁଡ଼୍ଦାକାନ୍ ମିତ୍ରଦାତନି କେଇ ହୁକେ ହେଦାଂ ସବୁ ହପ୍ଚି ତାସି ଜିହୁଦାନି ଆଦିକାରି ସେବସରତିଂ ଗାଣା କିସି ହିତାନ୍ । ହେ ଜିନିସ୍ନି ଲମର୍ ଇଦାଂ; ତିରିସ୍ ହନା ତାଡ଼ିୟା, ଏକ୍ ହାଜାର୍ ରୁପା ତାଡ଼ିୟା, କଡ଼଼େ ନ ଗଟା ଚାକୁ; ତିରିସ୍ ହନା ଉଣିବାହା, ଚାରି ସହ ଦସ୍ ରୁପା ମାଦିନି ଉଣିବାହା, ଆରେ ଏକ୍ ହାଜାର୍ ବିନ୍ବିନ୍ ବାହା, ସବୁ ପା ପାଞ୍ଚ୍ ହାଜାର୍ ଚାରି ସହ ହନା ଆରି ରୁପା ବାହା ମାଚାତ୍; ବନ୍ଦି ମାନାୟାର୍ ବାବିଲ୍ତାଂ ଜିରୁସାଲମ୍ତ ତାସିୱାନି ସମୁତ ସେବସର ଇ ସବୁ ଜିନିସ୍ ତାସିୱାତାନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.