Pengo Bible
ପକ୍ୟାତାକା 11
ଜିରୁସାଲମ୍ ମଣ୍ଡ୍ଲିତ ପିତର୍ତି କାବୁର୍ ୱେଚ୍ନାକା
ପାର୍ତିକିୱି ଜିହୁଦିର୍ ପା ଜେ ଇସ୍ୱର୍ତି ବଚନ୍ ଇଡ୍ତାର୍ନା, ଇଦାଂ ପକ୍ୟାତାକାର୍ ଆରି ଜିହୁଦା ରାଜିତ ମାନି ପାର୍ତି କିନି ଟଣ୍ଡାର୍ ୱେଚାର୍ । ଆରେ, ଏଚେକାଡ଼୍ଦ ପିତର୍ ଜିରୁସାଲମ୍ତ ୱାତାନ୍, ହେ ଏଚେକାଡ଼୍ଦ ସୁନ୍ନତ୍ ଆତି ଚେଲାର୍ ହେୱାନ୍ ହୁଦାଂ ବିଚାର୍ କିଜ଼ି ଇଚାର୍, “ଏନ୍ ପାର୍ତିକିୱି ଜିହୁଦି ଲକାରିଂ ଇଞ୍ଜ ହଟ୍ପିସ୍ ହେୱାର୍ ହୁକେ ଚିଚାୟ୍ନା ।” ମାତର୍ ପିତର୍ ସବୁ କାତାତିଂ ବୁଜାୟ୍ କିଦେଙ୍ଗ୍ ଆରମ୍ କିଜ଼ି ଇଚାନ୍,
“ଆନ୍ ଜାପ ଗାଡ଼୍ଦ ପାର୍ତାନା କିଜ଼ି ମାଚାଙ୍ଗ୍ ଆରି ଦର୍ସନ୍ ଗାଟାତାଂ, ର ପାଡ଼୍କାତାଙ୍ଗ୍ ୱାନାତା, ଇନେସ୍ ର ଗାଜା ହେନ୍ଦ୍ରା ଚାରି କନାତ ଆସ୍ତି ବାଦାଡ଼୍ତାଂ ହେଦାଂ ହୁଡ଼୍ତାଂ, ହେଦାଂ ନା” ଲାଗାଂ ଟେବାତାତ୍, ଆରେ ବାଦାଡ଼୍ତାଂ ହେଦାଂ ନା ପାତେକ୍ ୱାତାତ୍; ଆନ୍ ହେଦାଂ ହୁଡ଼୍ଜି ଚିନ୍ତା କିଦେଙ୍ଗ୍ ଲାଗାତାଂ ଆରି ହେବେ ପୁର୍ତିନି ଚାରିଗଡ଼ିୟା ଜାତ୍, ରାନ୍ତି ପସୁ, ରାଚ୍କୁ ପାଣା ଆରି ପ୍ରୁତିନି ପଟିଙ୍ଗ୍ ସବୁ ହୁଡ଼୍ତାଂ, ଆରେ, ନାଙ୍ଗ୍ ଇଞ୍ଜିମାଞ୍ଚି ର କାତା ପା ଆନ୍ ୱେଚାଙ୍ଗ୍, ଏ ପିତର୍, “ନିଙ୍ଗା, ପାଗ୍ଜି ତିନା ।” ମାତର୍ ଆନ୍ ଇଚାଙ୍ଗ୍, ଆକାୟ୍, ମାପ୍ରୁ, ରାଡ଼ା କି ସକଟ୍ ହିଲ୍ୱି ଜିନିସ୍ ନା ମୁମ୍ଦ ଇନାୱାଡ଼ାଂ ହଟ୍ପି କିୱାତାଂନା । ମାତର୍ ରିହା ବାଦାଡ଼୍ତାଂ ର କାଟ୍ ଉତର୍ ହିତ୍ତାତ୍, “ଇସ୍ୱର୍ ଇନାକା ସକଟ୍ କିତାନ୍ନ୍ନା, ଏନ୍ ହେଦାଂ ବିଟାଡ଼୍ ଇଞ୍ଜି ଇନ୍ମା ।” ଇ ବାନି ତିନି ହଟ୍ ଆତାତ୍, ପାଚେ ୱିଜ଼ୁ ଆରେରଗ ବାଦାଡ଼୍ତ ଅୟାତାତ୍ । ଆରେ ହୁଡ଼ାଟ୍, ଦାପ୍ରେ ତିନ୍ ଜାଣ୍ ମାନାୟ୍, ଆପେଂ ଇମ୍ଣି ଇଞ୍ଜ ମାଚାପ୍, ହେବେନି ମୁମ୍ଦ ୱାଜ଼ି ନିଲ୍ତାର୍, ହେୱାର୍ କାଇସରିୟାତାଂ ନା ତାକେ ପକ୍ୟାଜ଼ି ମାଚାର୍ । ଆରେ, ମୁଡ଼େ ଆନ୍ମାନ୍ କିୱାଦାଂ ହେୱାର୍ ହୁଦାଂ ହାଞ୍ଜେଙ୍ଗ୍ କାଜିଂ ପୁଇପୁୟା ଜିବୁନ୍ ନାଙ୍ଗ୍ ୱେଚ୍ଚାତାତ୍ । ଆରେ, ଇ ଚଅ ଜାଣ୍ ପାର୍ତି କିନି ଟଣ୍ଡାର୍ ପାନା ହୁଦାଂ ତାରେନ୍ ହାଚାର୍, ଆରେ ଆପେଂ ହେ କର୍ଣ୍ଣଲିୟା ଇଲ୍ ହଟାପ୍ । ହେୱାନ୍ ଇନେସ୍ ରୱାନ୍ ଦୁତ୍ ତାକେ ଦର୍ସନ୍ ପାୟାଜ଼ି ମାଚାନ୍, ହେଦାଂ ମାଙ୍ଗେଙ୍ଗ୍ ୱେଚ୍ଚାତାନ୍, ହେ ଦୁତ୍ ଇନେସ୍ ହେୱାନ୍ତି ଇଞ୍ଜ ଇଚାନ୍, ଜାପତ ଲକୁ ପକ୍ଚି ପିତର୍ କୁକ୍ନି ତର୍ ସିମନ୍ତିଂ କୁକ୍ଚି ତାହିୱାଡୁ; ଇନେର୍ ୱିଜ଼ାର୍ ବଚନ୍ ହୁଦାଂ ଏପେଙ୍ଗ୍ ଆରି ମି ୱିଜ଼ାର୍ ଇଲ୍ନିକାର୍ ରାକ୍ୟା ଆନାର୍, ହେୱାନ୍ ମିଙ୍ଗେଙ୍ଗ୍ ହେ ସବୁ ୱେଚ୍ଚାନାନ୍ । ପାଚେ ଆନ୍ କାତା ଇଞ୍ଜେଙ୍ଗ୍ ଆରମ୍ ୱେଡ଼ାଲିଂ ପୁଇପୁୟା ଜିବୁନ୍ ଆଗ୍ଦ ମା ଜପି ଜୁତ୍ତି ଲାକେ ହେୱାର୍ ଜପି ପା ଜୁତ୍ତାତ୍ । 1 ହେପାଦ୍ନା ମାପ୍ରୁତି ଇ ବଚନ୍ ନା ଏତୁ ୱାତାତ୍, ଜହନ୍ ୱିଜ଼ାକାରିଂ ଉତର୍ ହିତାନ୍, “ଜହନ୍ ହିନା ଏସ୍ଉଙ୍ଗ୍ତାଂ ବାପ୍ତିସିମ୍ ହିତାନ୍ ହାତ୍ପା ମତର୍ ଏପେଙ୍ଗ୍ ପୁଇପୁୟା ଜିବୁନ୍ତାଂ ବାପ୍ତିସିମ୍ ଆନାଦେର୍ ।” ଲାଗିଂ, ଆସେଙ୍ଗ୍ ମାପ୍ରୁ ଜିସୁ କ୍ରିସ୍ଟତି ତାକେ ପାର୍ତି କିନି ୱେଡ଼ାଲିଂ ଇସ୍ୱର୍ ଇନେସ୍ ଦାନ୍ ହିିଜ଼ି ମାଞ୍ଚାନ୍, ହେ ଲାକେ ଏଚେକାଡ଼୍ଦ ହେୱାରିଂ ପା ହାରି ଦାନ୍ ହିତାନ୍, ଆନ୍ ଇନେର୍ ଜେ ଇସ୍ୱର୍ତିଂ ବାଦା ହିଦେଂ ଆଡ଼୍ତାଂମା ?
ଇ ସବୁ କାତା ୱେଚିଲେ ହେୱାର୍ ଚିମ୍ରା ଆତାର୍ ଆରି ଇସ୍ୱର୍ତିଂ ଜାଜ୍ମାଲ୍ କିଜ଼ି ଇଚାର୍, “ୱାଟିଙ୍ଗ୍” ଇସ୍ୱର୍ ପାର୍ତିକିୱି ଜିହୁଦିର୍ ପା ପୁଇପୁୟା ଜିବୁନ୍ ପାୟାନି କାଜିଂ ମାନ୍ବାଦ୍ଲାୟ୍ ଦାନ୍ କିତାନ୍ନ୍ନା ।
ଆନ୍ତିୟକିଆ ମଣ୍ଡ୍ଲି
ୱିସ୍ତି ବିତ୍ରେ ସ୍ତିପାନ୍ କାଜିଂ ଗିଟାଜ଼ି ମାଚି ଦୁକ୍ କାଜିଂ ଇମ୍ଣାକାର୍ ଜେଡ଼େକେତ୍ ଆଜ଼ି ମାଚାର୍, ହେୱାର୍ ପୈନିକିଆ, କୁପ୍ର ଆରି ଆନ୍ତିୟକିଆ ପାତେକ୍ ବୁଲା ଆଜ଼ି ଆପ୍କା ଜିହୁଦିରିଂ ପିସ୍ତି ଆରେ ଇନେର୍ ତାକେ ବଚନ୍ ପରଚାର୍ କିୱାଦାଂ ମାଚାର୍ । ମାତର୍ ହେୱାର୍ତି ବିତ୍ରେ କେତେକ୍ ସାଇପ୍ରସ୍ ଆରି କୁରିଣିୟ ଲକୁ ଆନ୍ତିୟକିଆତାଂ ୱାଜ଼ି ଗ୍ରିକ୍ ତାକେ ପା କାତା ଇଞ୍ଜି ମାପ୍ରୁ ଜିସୁତି ନେକ୍ରିକାବୁର୍ ପରଚାର୍ କିଦେଙ୍ଗ୍ ଲାଗାତାର୍ । ଆରେ, ହେୱାର୍ ଲାହାଂ ମାପ୍ରୁତି କେଇ ମାଚାତ୍, ଆରେ ବେସି ମାନାୟ୍ ପାର୍ତି କିଜ଼ି ମାପ୍ରୁନିପ ମାସ୍ଦି ୱାତାର୍ ।
ହେୱାର୍ତି ବିସ୍ରେତି କାବୁର୍ ଜିରୁସାଲମ୍ ମଣ୍ଡ୍ଲିତ ୱେନ୍ୟାତାତ୍, ହେବେ ହେୱାର୍ ଆନ୍ତିୟକିଆ ପାତେକ୍ ବର୍ଣ୍ଣବାଙ୍ଗ୍ ପକ୍ତାର୍ । ହେୱାନ୍ ଏକିସ୍ ଇସ୍ୱର୍ତି ଦୟା ହୁଡ଼୍ଜି ୱାର୍ୟା ଆତାନ୍, ଆରେ ଇନେସ୍ ହେୱାର୍ ମାନ୍ନି ର ମାନ୍ତ ମାପ୍ରୁତି କାଜିଂ ଜେଲ୍ୟା ଆଜ଼ି ମାନାର୍, ହେଦାଂ କାଜିଂ ୱିଜ଼ାରିଂ ୱାରିକିୟ୍ କିତାର୍; ଇନାକିଦେଂକି ବର୍ଣ୍ଣବା ରୱାନ୍ ହାର୍ଦି ମୁଣିକା, ଆରେ ପୁଇପୁୟା ଜିବୁନ୍ ଆରି ପାର୍ତିତ ବାର୍ତି ମାଚାନ୍ । ଇ ବାନି ବେସି ବେସି ମାନାୟ୍ ମାପ୍ରୁ ତାକେ ମେହା ଆତାର୍ ।
। ପାଚେ ହେୱାନ୍ ସାଉଲ୍ତିଂ ଡେକ୍ନି କାଜିଂ ତାର୍ସତ ହସି ହାଚାନ୍, ଆରେ, ହେୱାନ୍ ହେୱାନିଂ ଗାଟାଜ଼ି ଆନ୍ତିୟକିଆତ ତାହିୱାତାନ୍ । ହେୱାର୍ ବାର୍ତି ର ବାର୍ହୁ ପାତେକ୍ ମଣ୍ଡ୍ଲି ହୁଦାଂ ମାନ୍ଞ୍ଜି ବେସି ଲୁଗାଙ୍ଗ୍ ହିକ୍ୟା ହିତାନ୍, ଆରେ ଆନ୍ତିୟକିଆତ ଚେଲାର୍ ପର୍ତୁମ୍ କ୍ରିସ୍ଟିୟାନ୍ ଇଞ୍ଜି ଇନ୍ୟା ଆତାର୍ ।
ହେ ୱେଡ଼ାଲିଂ କେତେକ୍ ଜାଣ୍ ବେଣ୍ବାକ୍ଣାୟ୍କିନାକାର୍ ଜିରୁସାଲମ୍ତାଂ ଆନ୍ତିୟକିଆତ ୱାତାର୍ । 3ହେୱାର୍ ବିତ୍ରେ ଆଗାବ ତର୍ନି ରୱାନ୍ ମୁଣିକା ନିଂଜି ସବୁ ପୁର୍ତିତ ବେସି କାତାର୍ ଆର୍ଣ୍ଣାତ୍ ଇଞ୍ଜି ଜିବୁନ୍ ହୁଦାଂ ୱେଚ୍ଚାନ୍; ହେଦାଂ କ୍ଲାଉଦିଅତି ସମୁ ମାନି ୱେଡ଼ାଲିଂ ଗିଟାତାତ୍ । ହେବେ ଚେଲାର୍ ସବୁ ଜାଣ୍ ଜାର୍ ସାକ୍ତି ହୁଦାଂ ଜିହୁଦା ରାଜି ନିକାର୍ ପାର୍ତି କିନି ଟଣ୍ଡାର୍ କାଜିଂ ହେବା ପକ୍ତେଙ୍ଗ୍ ତିର୍ କିତାର୍, ଆରେ ହେୱାର୍ ପା ହେଦାଂ କିଜ଼ି ବର୍ଣ୍ଣବା ଆରି ସାଉଲ୍ତି କେଇଦ ପ୍ରାଚିନାର୍ତି ଲାଗେ ପକ୍ତାର୍ ।
Source notes (3)
- Cross-reference ପକ୍ୟାତାକା ୧:୫.
- Cross-reference ପକ୍ୟାତାକା ୮:୧-୪.
- Cross-reference ପକ୍ୟାତାକା ୨୧:୧୦.
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.