Pengo Bible
୨ ତିମତି 1:7
Verse 7 is marked below, with the whole chapter around it. Read from the start
ଆନ୍ ପାଉଲ୍, ଜିସୁ କ୍ରିସ୍ଟତି ଲାହାଂ ମେହାଆନି ହୁକେ ଇସ୍ୱର୍ତି ପାର୍ମାଣ୍ ଇସାବ୍ରେ ଆପେଂ ଇମ୍ଣି ଜିବୁନ୍ ଲାବ୍ କିତାପ୍ନା, ହେଦାଂ ସୁଣାୟ୍ କିଦେଙ୍ଗ୍ ଇସ୍ୱର୍ତି ଇଚା ହୁଦାଂ କ୍ରିସ୍ଟ ଜିସୁତି ରୱାନ୍ ପକ୍ୟାତାକାନ୍ ଆତାଙ୍ଗ୍ନା । 1 ନା ୱାରିନି ମାଜ଼ି ତିମତିଂ ଆନ୍ ଆକି ଲେକିକିନାଙ୍ଗା, ଆବା ଇସ୍ୱର୍ ଆରି ମା ମାପ୍ରୁ କ୍ରିସ୍ଟ ଜିସୁତାକେ ଉପ୍କାର୍, ଦୟା ଆରି ସୁସ୍ତା ମି କାଜିଙ୍ଗ୍ ଆୟେତ୍ ।
ଦନ୍ୟବାଦ୍ ଆରି ୱାରିକିନି କାତା
ନା ଆଗେ ଆବା ଲାତ୍ରାର୍ତି ଲାକେ ହାର୍ଦି ବାବ୍ନାତାଂ ଆନେଙ୍ଗ୍ ଇମ୍ଣି ଇସ୍ୱର୍ତି ହେବା କିନାଂ, ୱେଡ଼ାନାଣା ନା ପାର୍ତାନାତ ନିତ୍ରେ ନି ତର୍ ଅଜ଼ି ଆନେଙ୍ଗ୍ ଇସ୍ୱର୍ତିଂ ଜୁୱାର୍ କିଜ଼ିମାନାଙ୍ଗା; ଆନେଙ୍ଗ୍ ଇନେସ୍ ୱାରିତାଂ ପୁରା ଆନାଙ୍ଗ୍, ଇଦାଂ କାଜିଂ ନି କାଣେଲିଂ ହୁକେ ଏତ୍ କିଜ଼ି ନିଙ୍ଗେଙ୍ଗ୍ ହୁଡ଼୍ନି କାଜିଂ ବେସି ଇଚା କିନାଙ୍ଗା; 2ମି ବୁଡିନାନା ଲୟି ଆରି ମି ଆୟା ଇଉନିକିତି ଇନେସ୍ ଲାକେ ପାର୍ତି କିଜ଼ି ମାଚାତ୍, ମିଦାଂ ପା ହେ କାପ୍ଟିହିଲ୍ୱି ପାର୍ତି ମାନାତ୍ । ଇ କାତା ଆନ୍ ଏତୁ କିନାଙ୍ଗା । ମିଦାଂ ହେ ପାର୍ତି ମାନାତ୍ ଇଞ୍ଜି ହାତ୍ପା ବାବ୍ରେ ଆନ୍ ପୁନାଙ୍ଗ୍ । ଆନ୍ ମି ଜପି କେଇ ଲାମାୟ୍ କିନିହିଂ ଏପେଙ୍ଗ୍ ଇସ୍ୱର୍ତାଂ ଇମ୍ଣି ଉପ୍କାର୍ ଦାନ୍ ସାକ୍ତି ପାୟାଜ଼ି ମାଚାଦେର୍, ତାଙ୍ଗ୍ ଜିବୁନ୍ ଇଡ଼୍ଦେଂ ଆନ୍ ମିଙ୍ଗେଙ୍ଗ୍ ଏତୁକିୟ୍ କିଦ୍ନାଙ୍ଗା । ଇସ୍ୱର୍ ମାଙ୍ଗେଙ୍ଗ୍ ଇମ୍ଣି ଜିବୁନ୍ ହିତାନ୍ନା, ହେଦାଂ ମାଙ୍ଗେଙ୍ଗ୍ ପାଣ୍ଡ୍ରାନି ଜିବୁନ୍ ହିଦ୍ୱାତାତ୍ନା, ମତର୍ ସାକ୍ତି, ଜିଉନନାକା ଆରି ହାର୍ଦିବୁଦିନି ଜିବୁନ୍ ହିତ୍ତାନ୍ନା ।
ଲାଗିଂ, ମାପ୍ରୁ ଜିସୁତି ବିସ୍ରେ ସାକି ହିନି କାଜିଂ ଲାଜା ଆମାଟ୍; ତା କାଜିଂ ଆନ୍ ଜଇଲ୍ କାଟିକିନାଙ୍ଗା ନା କାଜିଂ ପା ଲାଜା ଆମାଟ୍ । ଇଚିସ୍ ଇସ୍ୱର୍ ମିଙ୍ଗେଙ୍ଗ୍ ହିଜ଼ିମାଞ୍ଜ୍ନି ସାକ୍ତି ଇସାପ୍ରେ ଏପେଙ୍ଗ୍ କ୍ରିସ୍ଟ ଜିସୁତି ନେକ୍ରିକାବୁର୍ କାଜିଂ ଦୁକ୍ବଗ୍ କିଦେଙ୍ଗ୍ ଜାଗ୍ରତ୍ ଆଡ । ହେୱାନ୍ ମାଙ୍ଗେଙ୍ଗ୍ ମୁକ୍ତି କିତ୍ତାନ୍ନା ଆରି ପୁଇପୁୟା କୁକ୍ତିତ କୁକ୍ତାତାନ୍ନା; ମା କାମାୟ୍ ଇସାପ୍ରେ ହେୱାନ୍ ହେଦାଂ କିୱାତାନ୍ନା; ମତର୍ ହେୱାନ୍ତି ଜାର୍ ଇଚା ଆରି ଦୟା ହୁଦାଂ କିତାନ୍ନା, ହେ ଦୟା ଆଗେ ପୁର୍ବେତାଂ କ୍ରିସ୍ଟ ଜିସୁ ତାକେ ୱିଜ଼୍ୱିକାଡ଼୍ତାଂ ଇସ୍ୱର୍ ମାଙ୍ଗେଙ୍ଗ୍ ଉପ୍କାର୍ ହିଆ ଆଜ଼ି ମାଚାତ୍, ମାତର୍ ନଂ ମା ମୁକ୍ତି କାରିୟା କ୍ରିସ୍ଟ ଜିସୁତି ଜଲମ୍ ହୁଦାଂ ହତ୍ତାତ୍ନା; ହେୱାନ୍ ହାତାକାଦିଲିଂ ବୁଡାୟ୍ କିତାନ୍ନା; ଆରେ ନେକ୍ରିକାବୁର୍ ହୁଦାଂ ୱିଜ଼୍ୱି ଜିବୁନ୍ ଅଜଡ଼୍ତ ହପ୍ତାନ୍ନା ।
ହେ ନେକ୍ରିକାବୁର୍ନି ଆନେଙ୍ଗ୍ ରୱାଙ୍ଗ୍ ସୁଣାୟ୍ କିନାକାଙ୍ଗ୍, ପକ୍ୟାତାକାନ୍ ଚେଲା ଆରି ଗୁରୁ ଲାକେ ବାଚି କିୟାତାଂନା । ଇଦାଂ କାଜିଂ ପା ଆନ୍ ଇ ୱିଜ଼ୁ ଦୁକ୍ ପାୟାନାଙ୍ଗା; ଆତିସ୍ପା ଆନେଙ୍ଗ୍ ଲାଜା ଆଉଙ୍ଗା, ଇନେକିଦେଂକି ଆନେଙ୍ଗ୍ ଇନେର୍ ତାକେ ପାର୍ତି କିନାଙ୍ଗା, ତାଙ୍ଗେଙ୍ଗ୍ ପୁନାଙ୍ଗ୍, ଆରେ ଆନ୍ ତା କେଇଦ ଇନାକା ହେଲାୟ୍ କିତାଂନା, ହେଦାଂ ଗାଜା ଦିନ୍ ପାତେକ୍ ବାଡୁଙ୍ଗ୍ ଇଡ୍ନି କାଜିଂ ହେୱାନ୍ ଜେ ଆଡ୍ନାକାନ୍, ଇଦାଂ ହାର୍କିଜ଼ି ପାର୍ତି କିନାଙ୍ଗା । ନା ତାଂ ଇମ୍ଣି ୱିଜ଼ୁ ହାର୍ଦାକା କାତା ୱେଚାଦେର୍ଣ୍ଣା, କ୍ରିସ୍ଟ ଜିସୁତି ପାର୍ତି ବିସ୍ରେ ଆରି ଜିଉନନିତ ହେଦାଂ ୱାରି ବାବ୍ରେ ଆସ୍ତି ଇଟାଟ୍ । ଇମ୍ଣି ଗାଜା ବିସ୍ରେ ଦାୟିତ୍ ମି ଜପି ପିହ୍ୟା ଆତାତ୍ନ୍ନା, ମା ବିତ୍ରେ ବାହା କିଜ଼ିମାନି ପୁଇପୁୟା ଜିବୁନ୍ନି ସାକ୍ତିତ ହେ ସବୁତିଂ ରାକ୍ୟା କିୟାଟ୍ ।
ଆସିଆନି ୱିଜ଼ାର୍ ଲକୁ ଜେ ନା କାଜିଂ ପିସ୍ତାର୍ଣ୍ଣା ଇଦାଂ ଏପେଙ୍ଗ୍ ପୁନାଦେର୍, ପୁଗେଲ ଆରି ହର୍ମଗେନା ହେୱାର୍ ବିତ୍ରେ ପିସ୍ତାର୍ଣ୍ଣା । ଅନିସିପର୍ତି କୁଟୁମ୍ତାଂ ମାପ୍ରୁ ଦୟା କିଏନ୍, ଇନେକିଦେଂକି ହେୱାନ୍ ତାଇନାତ୍ ନାଂ ଦୁକ୍ ପଚିକିତ୍ତାନ୍ନା, ଆରେ ନା ବନ୍ଦି ଅବସ୍ତା ବିସ୍ରେ ଲାଜ୍ ଆୱାତାନ୍ନା, ମାତର୍ ହେୱାନ୍ ରମ୍ତ ମାନି ୱେଡ଼ାଲିଂ ନାଂ ଜାତୁନ୍ତାଂ ଡେକ୍ଚି ନା ଲାହାଂ ବେଟା ଆତାର୍, ଗାଜାଦିନ୍ତ ହେୱାନ୍ ଇନେସ୍ ମାପ୍ରୁତି ତାକେ ଦୟା ଗାଟାନାନ୍, ଇଦାଂ ମାପ୍ରୁ ହେୱାନ୍ କାଜିଂ ଦୟା କିଏନ୍, ଆରେ ଏପିସ୍ତ ହେୱାନ୍ ଇନେସ୍ ହେବା କିତାନ୍ନା, ହେଦାଂ ଏପେଙ୍ଗ୍ ହାର୍ କିଜ଼ି ପୁଚାଦେର୍ଣ୍ଣା ।
Source notes (2)
- Cross-reference ପକ୍ୟାତାକା ୧୬:୧.
- Cross-reference ପକ୍ୟାତାକା ୧୬:୧.
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.