ସତ୍ ବଚନ୍
୧ କରନ୍ତିୟ 16:14
Verse 14 is marked below, with the whole chapter around it. Read from the start
ଜିସୁ ମାନାୟାର୍ କାଜିଂ ଡାବୁଙ୍ଗ୍ ସାଇଜ
ପୁଇପୁୟାର୍ କାଜିଂ ଦାନ୍ ରୁଣ୍ଡାଇକିନି ବିସ୍ରେ ଇନେସ୍କି ଆନ୍ ଗାଲାତିଆନି ବାଟାତ ମାନି ମଣ୍ଡ୍ଲିଂ ବଲ୍ ହିନାଙ୍ଗା, ଏପେଙ୍ଗ୍ ପା ହେ ଲାକେ କିୟାଟ୍ । ଆନ୍ ହାଚିସ୍ ଇନେସ୍ ଦାନ୍ ରୁଣ୍ଡାୟ୍ କିଦେଙ୍ଗ୍ ଲାଗ୍ଦୁତ୍, ଇଦାଂ କାଜିଂ ସାତ୍ ଦିନ୍ନି ପର୍ତୁମ୍ ରଇବାର୍ ଦିନା ଏପେଙ୍ଗ୍ ୱିଜ଼ାକାଦେର୍ ଜାର୍ ଜାର୍ ସୁବିଦା ଇସାପ୍ତାଂ ନିଜେ ନିଜେ ତାକେ ଇନା ଇନାକା ରୁଣ୍ଡାୟ୍ କିଜ଼ି ବିନେ ଇଟାଟ୍ । ଆରେ, ଆନ୍ ଏକିତିସ୍ ଏପେଙ୍ଗ୍ ଇମ୍ଣାକାରିଂ ଜଗ୍ ମାନେ କିନାଦେର୍, ଆନ୍ ହେୱାରିଂ ଗଜା ହିଜ଼ି ଜିରୁସାଲମ୍ତ ମିଙ୍ଗେଙ୍ଗ୍ ଦାନ୍ ଅନି କାଜିଂ ପକ୍ତାନାଂ; ଆରେ, ଜଦି ନାଦାଂ ପା ହାନାକା ସମାନ୍ ଆନାତ୍, ଲାଗିଂ ହେୱାର୍ ନା ଲାହାଙ୍ଗ୍ ହାନାର୍ ।
ପାଉଲ୍ତି ହାନି ଜଜ୍ନା
ମତର୍ ଆନ୍ ମାକିଦନିଆ ହିଜ଼ି ହାଚି ପାଚେ ମି ଲାଗାଂ ହାନାଙ୍ଗ୍; ଲାଗିଂ ଆନ୍ ମାକିଦନିଆ ହିଜ଼ି ହାନାଙ୍ଗ୍; ଆରେ, କାତେ ହିନା ମି ଲାହାଙ୍ଗ୍ କେତେକ୍ ଦିନା ମାନାଙ୍ଗ୍, କି ପିନିମାସ୍ ପା ଜିଉଣା କିନାଙ୍ଗ୍, ଇନେସ୍କି ଆନ୍ ଇମ୍ଣି ବାହାତ ହାନାଙ୍ଗ୍, ହେ ବାହାତ ହାନି କାଜିଂ ଏପେଙ୍ଗ୍ ନାଙ୍ଗ୍ ହାଜ଼ି ଚଚ୍ଚାନାଦେର୍ । ଇନାକିଦେଂକି ନଙ୍ଗ୍ ହାଜ଼ିତ ହାନି ସମୁତ ମି ଲାହାଙ୍ଗ୍ ବେଟ୍ଆଦ୍ଦେଂ ଆନ୍ ଇଚା କିଉଙ୍ଗା, ଲାଗିଂ ମାପ୍ରୁ ପିସ୍ତି ହିତିସ୍ ମି ଲାହାଙ୍ଗ୍ ବେସି ଦିନା ମାଞ୍ଜେଙ୍ଗ୍ ଆହା କିନାଙ୍ଗା । 2
ମତର୍ ଆନ୍ ପେଣ୍ଟିକସ୍ଟ ପାର୍ବୁ ପାତେକ୍ ଏପିସତ ମାନାଙ୍ଗ୍; ଇନାକିଦେଂକି ପାଡ଼୍ ଆହ୍ନି କାମାୟ୍ କାଜିଂ ନା କାଜିଂ ଅହାର୍ ଦୁୱେର୍ ଜେୟାତାତ୍ନା, ପାକ୍ୟା ହିଲ୍ୱାକାର୍ ପା ହେନି ମାନାର୍ । 3
ଜଦି ତିମତି ହାନାନ୍, ତେବେ ଇନେସ୍ ପାଣ୍ଡ୍ରାୱାଦାଂ ମି ବିତ୍ରେ ମାନାନ୍, ହେ ବିସ୍ରେ ମାନ୍କିୟାଟ୍, ଇନାକିଦେଂକି ଆନ୍ ଇନେସ୍, ହେୱାନ୍ ପା ହେ ଲାକେ ମାପ୍ରୁତି କାମାୟ୍ କିନାନ୍, ଲାଗିଂ ଇନେର୍ ତାଙ୍ଗେଙ୍ଗ୍ ଅଲ୍ଗା ହୁଡ଼୍ମେନ୍ । ମତର୍ ହେୱାନ୍ ଇନେସ୍ ନା ଲାଗାଂ ୱାଦେଙ୍ଗ୍ ଆଡ୍ନାନ୍, ଇଦାଂ କାଜିଂ ତାଙ୍ଗ୍ ସୁସ୍ତାତାଂ ହାଜ଼ି ଚଚାଟ୍; ଇନାକିଦେଂକି ହେୱାନ୍ ଟଣ୍ଡାର୍ ଲାହାଙ୍ଗ୍ ୱାନାନ୍ ଇଞ୍ଜି ଆନ୍ କାନାଙ୍ଗା ।
ମତର୍ ଟଣ୍ଡେନ୍ ଆପଲ୍ଲତି ବିସ୍ରେ ଇନାଙ୍ଗା, ଟଣ୍ଡାର୍ ଲାହାଙ୍ଗ୍ ମି ଲାଗାଂ ହାନି କାଜିଂ ଆନ୍ ତାଙ୍ଗ୍ ବେସି ଗୱାରି କିତାଙ୍ଗ୍, ମତର୍ ନଙ୍ଗ୍ ହାଞ୍ଜେଙ୍ଗ୍ ହେୱାନିଂ ମୁଡ଼େ ଇଚା ହିଲୁତ୍, ମତର୍ ଉପାୟ୍ ଆତିସ୍ ହେୱାନ୍ ହାନାନ୍ ।
ହାରିହାରାନି କାତା
ଏପେଙ୍ଗ୍ ଜାଗ୍ରତ୍ ମାନ୍ଞ୍ଜି ପାର୍ତିତ ତିର୍ ଆଜ଼ି ମାନାଟ୍, ସାସ୍ନିକାନ୍ ଆଜ଼ି ସାକ୍ତି ଆଡୁ । ମିଦାଙ୍ଗ୍ ସବୁ କାମାୟ୍ ଜିଉନନିତ ସମାନ୍ ଆୟେତ୍ ।
ଏ ଟଣ୍ଡାର୍, ଆରି ତଣ୍ଦେକ୍ ଆନ୍ ଗୱାରି କିଦ୍ନାଙ୍ଗା ସ୍ତିପାନ୍ତି ଜାର୍ଲଗୁ ଜେ ଆକାୟାନି ପୁଇପୁୟାତ ପାର୍ତି କିନାକାନ୍ ଲାକେ; ଆରେ, ସାଦୁର୍ତି ହେବାତ ବାର୍ତି ଆତାର୍ଣ୍ଣା, ଇଦାଂ ଏପେଙ୍ଗ୍ ପୁନାଟ୍; ଏଲେଙ୍ଗ୍ବାନି ମାନାୟ୍ତିଙ୍ଗ୍, ଆରେ, ୱିଜ଼ାର୍ ହାଙ୍ଗ୍ଦାକାର୍ ଆରି କସ୍ଟକିନି ମାନାୟାର୍ ମେହା ଆଡୁ, ମିଙ୍ଗେଙ୍ଗ୍ ଇ ଗୱାରି କିଦ୍ନାଙ୍ଗା ।
ସ୍ତିପାନ୍, ପର୍ତୁନାତ ଆରି ଆକାୟାତି ଜୁଦ୍ନିତ ଆନ୍ ୱାରି କିନାଙ୍ଗା, ଇନାକିଦେଂକି ମି ୱାୱିତି କାଜିଂ ନା ଇମ୍ଣି ଅବାବ୍ ମାଚାତ୍, ହେଦାଂ ହେୱାର୍ ବାର୍ତି କିତାର୍ଣ୍ଣା, ଲାଗିଂ ହେୱାର୍ ନାଦାଂ ଆରି ମି ଜିବୁନ୍ତିଙ୍ଗ୍ ଜଡ଼ାୟ୍ କିତାର୍ଣ୍ଣା; ଲାଗିଂ ଏପେଙ୍ଗ୍ ଏଲେଙ୍ଗ୍ବାନି ମାନାୟାରିଂ ଜଗ୍ ପୁଞ୍ଜି ମାନି କିୟାଟ୍ । 4
ଆସିଆନି ରାଜିନି ମଣ୍ଡ୍ଲିଂ ଲାଗାଂ ମିଙ୍ଗେଙ୍ଗ୍ ଜୱାର୍ କିଦ୍ନାରା । ଆକ୍ୱିଲା ଆରି ପ୍ରିସ୍କା ହେୱାର୍ ଇଲ୍ ଲାଗେ ମଣ୍ଡ୍ଲି ଲାହାଙ୍ଗ୍ ମାପ୍ରୁତାକେ ମିଙ୍ଗେଙ୍ଗ୍ ବେସି ବେସି ଜୱାର୍ କିଦ୍ନାରା । ଇବେନି ଟଣ୍ଡାର୍ ଆରି ତଣ୍ଦେକ୍ ପାର୍ତି କିନାକାଦେର୍ ।
ୱିଜ଼ାଦେର୍ ମିଙ୍ଗେଙ୍ଗ୍ ଜୱାର୍ କିଦ୍ନାରା । ପୁଇପୁୟାତାଂ ଡଞ୍ଜ୍ନି କାଜିଂ ହାରି ଜୁୱାର୍ ଜାଣାୟ୍ କିୟାଟ୍ ।
ଆନ୍ ପାଉଲ୍ ନିଜେ କେଇଦ ଲେକିକିଜ଼ି ଜୱାର୍ କିଦ୍ନାଙ୍ଗା ।
ଜଦି ଇନେର୍ ମାପ୍ରୁଙ୍ଗ୍ ଜିଉନଉନ୍, ତେବେ ହେୱାନ୍ ରାଚ୍ଲାକେ ଆଏନ୍ । ମାପ୍ରୁ ଜିସୁତି ଉପ୍କାର୍ ମି ଲାହାଙ୍ଗ୍ ଆଏତ୍ ।
କ୍ରିସ୍ଟ ଜିସୁତି ତାକେ ନା ଜିଉନନାକା ମି ୱିଜ଼ାଦେରିଂ ଆଏତ୍ ।
Source notes (4)
- Cross-reference ପକ୍ୟାତାକା ୧୯:୨୧.
- Cross-reference ପକ୍ୟାତାକା ୧୯:୮-୧୦.
- Cross-reference ୧ କରନ୍ତିୟ ୪:୧୭.
- Cross-reference ପକ୍ୟାତାକା ୧୮:୨.
ସତ୍ ବଚନ୍. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.