1 ਇਤ

1 ਇਤਿਹਾਸ

ਲੇਖਕ

1 ਇਤਿਹਾਸ ਦੀ ਪੁਸਤਕ ਆਪਣੇ ਲੇਖਕ ਦਾ ਨਾਮ ਸਪੱਸ਼ਟ ਰੂਪ ਵਿੱਚ ਨਹੀਂ ਦੱਸਦੀ, ਪਰ ਯਹੂਦੀ ਪਰੰਪਰਾ ਦੇ ਅਨੁਸਾਰ ਅਜ਼ਰਾ ਸ਼ਾਸਤਰੀ ਨੂੰ ਇਸ ਦਾ ਲੇਖਕ ਨੂੰ ਮੰਨਿਆ ਜਾਂਦਾ ਹੈ। 1 ਇਤਿਹਾਸ ਦੀ ਪੁਸਤਕ ਦੀ ਸ਼ੁਰੂਆਤ ਇਸਰਾਏਲ ਦੇ ਪਰਿਵਾਰਾਂ ਦੀ ਸੂਚੀ ਤੋਂ ਹੁੰਦੀ ਹੈ। ਫਿਰ ਇਹ ਦਾਊਦ ਦੇ ਸੰਯੁਕਤ ਰਾਜ ਉੱਤੇ ਸ਼ਾਸਨ ਦੀ ਜਾਣਕਾਰੀ ਨੂੰ ਜ਼ਾਰੀ ਰੱਖਦੀ ਹੈ, ਜਿਸ ਨੂੰ ਇਸਰਾਏਲ ਕਿਹਾ ਜਾਂਦਾ ਸੀ। ਇਹ ਪੁਸਤਕ ਦਾਊਦ ਦੀ ਕਹਾਣੀ ਨੂੰ ਬਹੁਤ ਨਜ਼ਦੀਕੀ ਨਾਲ ਦਰਸਾਉਂਦੀ ਹੈ, ਜੋ ਕਿ ਪੁਰਾਣੇ ਨੇਮ ਦੀਆਂ ਉੱਚੀਆਂ ਸ਼ਖ਼ਸੀਅਤਾਂ ਵਿੱਚੋਂ ਇੱਕ ਸੀ। ਇਸ ਪੁਸਤਕ ਦੀ ਵਿਆਪਕ ਝਲਕ ਵਿੱਚ ਪ੍ਰਾਚੀਨ ਇਸਰਾਏਲ ਦਾ ਰਾਜਨੀਤਿਕ ਅਤੇ ਧਾਰਮਿਕ ਇਤਿਹਾਸ ਸ਼ਾਮਿਲ ਕੀਤਾ ਗਿਆ ਹੈ।

ਤਾਰੀਖ਼ ਅਤੇ ਲਿਖਣ ਦਾ ਸਥਾਨ

ਇਹ ਪੁਸਤਕ ਲਗਭਗ 450-400 ਈ. ਪੂ. ਦੇ ਵਿਚਕਾਰ ਲਿਖੀ ਗਈ।

ਇਹ ਸਪੱਸ਼ਟ ਹੈ ਕਿ ਇਸਰਾਏਲ ਦੀ ਬਾਬਲ ਦੀ ਗੁਲਾਮੀ ਤੋਂ ਵਾਪਸੀ ਦੇ ਬਾਅਦ ਇਹ ਪੁਸਤਕ ਲਿਖੀ ਗਈ। ਕਿਉਂਕਿ 1 ਇਤਿਹਾਸ 3:19-24 ਤੱਕ ਦਿੱਤੀ ਗਈ ਸੂਚੀ ਜ਼ਰੂੱਬਾਬਲ ਤੋਂ ਬਾਅਦ ਦਾਊਦ ਦੀ ਛੇਵੀਂ ਪੀੜ੍ਹੀ ਤੱਕ ਫੈਲੀ ਹੋਈ ਹੈ।

ਪ੍ਰਾਪਤ ਕਰਤਾ

ਪ੍ਰਾਚੀਨ ਯਹੂਦੀ ਲੋਕ ਅਤੇ ਬਾਅਦ ਦੇ ਬਾਈਬਲ ਦੇ ਸਾਰੇ ਪਾਠਕ।

ਉਦੇਸ਼

1 ਇਤਿਹਾਸ ਦੀ ਪੁਸਤਕ ਗੁਲਾਮੀ ਤੋਂ ਇਸਰਾਏਲ ਵਾਪਸ ਆਏ ਲੋਕਾਂ ਦੀ ਸਹਾਇਤਾ ਕਰਨ ਲਈ ਲਿਖੀ ਗਈ ਕਿ ਉਹ ਸਮਝ ਸਕਣ ਕਿ ਪਰਮੇਸ਼ੁਰ ਦੀ ਆਰਧਨਾ ਕਿਵੇਂ ਕਰਨੀ ਹੈ। ਇਸ ਦਾ ਇਤਿਹਾਸ ਦੱਖਣੀ ਰਾਜ, ਯਹੂਦਾਹ ਦੇ ਗੋਤਰ, ਬਿਨਯਾਮੀਨ ਅਤੇ ਲੇਵੀ ਤੇ ਕੇਂਦਰਿਤ ਹੈ। ਇਹ ਗੋਤਰ ਪਰਮੇਸ਼ੁਰ ਦੇ ਪ੍ਰਤੀ ਜ਼ਿਆਦਾ ਵਫ਼ਾਦਾਰ ਸਨ। ਪਰਮੇਸ਼ੁਰ ਨੇ ਦਾਊਦ ਨਾਲ ਨੇਮ ਬੰਨ੍ਹਿਆ ਕਿ ਉਹ ਦਾਊਦ ਦੇ ਘਰਾਣੇ, ਜਾਂ ਰਾਜ ਨੂੰ ਹਮੇਸ਼ਾ-ਹਮੇਸ਼ਾ ਲਈ ਸਥਾਪਿਤ ਕਰੇਗਾ। ਸੰਸਾਰਿਕ ਰਾਜੇ ਅਜਿਹਾ ਨਹੀਂ ਕਰ ਸਕਦੇ ਸਨ, ਇਸ ਲਈ ਦਾਊਦ ਅਤੇ ਸੁਲੇਮਾਨ ਦੁਆਰਾ ਪਰਮੇਸ਼ੁਰ ਨੇ ਆਪਣਾ ਮੰਦਰ ਸਥਾਪਿਤ ਕੀਤਾ, ਜਿੱਥੇ ਲੋਕ ਅਰਾਧਨਾ ਕਰਨ ਲਈ ਆ ਸਕਦੇ ਸਨ। ਸੁਲੇਮਾਨ ਦੁਆਰਾ ਬਣਾਇਆ ਗਿਆ ਮੰਦਰ ਬਾਬਲ ਦੇ ਹਮਲਾਵਾਰਾਂ ਦੁਆਰਾ ਨਸ਼ਟ ਕਰ ਦਿੱਤਾ ਗਿਆ।

ਵਿਸ਼ਾ-ਵਸਤੂ

ਇਸਰਾਏਲ ਦਾ ਆਤਮਿਕ ਇਤਿਹਾਸ

ਰੂਪ-ਰੇਖਾ

1. ਵੰਸ਼ਾਵਲੀਆਂ — 1:1-9:44

2. ਸ਼ਾਊਲ ਦੀ ਮੌਤ — 10:1-14

3. ਦਾਊਦ ਦਾ ਮਸਹ ਅਤੇ ਰਾਜ — 11:1-29:30