Biblica® Open Punjabi Contemporary Version 2025
ਅੱਯੋਬ 28
ਅੰਤਰਾਲ: ਜਿੱਥੇ ਬੁੱਧ ਮਿਲਦੀ ਹੈ
ਚਾਂਦੀ ਲਈ ਇੱਕ ਖਾਨ ਹੈ
ਅਤੇ ਇੱਕ ਜਗ੍ਹਾ ਜਿੱਥੇ ਸੋਨਾ ਸ਼ੁੱਧ ਕੀਤਾ ਜਾਂਦਾ ਹੈ।
ਲੋਹਾ ਧਰਤੀ ਵਿੱਚੋਂ ਕੱਢਿਆ ਜਾਂਦਾ ਹੈ,
ਅਤੇ ਚੱਟਾਨ ਤੋਂ ਪਿੱਤਲ ਨੂੰ ਕਿਵੇਂ ਪਿਘਲਾਇਆ ਜਾਂਦਾ ਹੈ।
ਮਨੁੱਖ ਨੇ ਹਨੇਰੇ ਦਾ ਅੰਤ ਕੀਤਾ;
ਉਹ ਦੂਰ-ਦੂਰ ਤੱਕ ਖਾਲੀ ਥਾਵਾਂ ਤੇ ਜਾਂਦੇ ਰਹੇ,
ਤਾਂ ਜੋ ਕਾਲੇ ਹਨੇਰੇ ਵਿੱਚ ਪਿੱਤਲ ਦੀ ਖੋਜ ਕਰਨ।
ਮਨੁੱਖੀ ਨਿਵਾਸਾਂ ਤੋਂ ਦੂਰ ਉਹਨਾਂ ਨੇ ਇੱਕ ਸੁਰੰਗ ਖੋਦੀ,
ਉਹਨਾਂ ਥਾਵਾਂ ਤੇ ਜਿੱਥੇ ਮਨੁੱਖਾਂ ਦੇ ਪੈਰਾਂ ਵੀ ਨਹੀਂ ਪੈਂਦੇ;
ਦੂਜੇ ਲੋਕਾਂ ਤੋਂ ਦੂਰ ਉਹ ਲਟਕਦੇ ਅਤੇ ਝੂਲਦੇ ਹਨ।
ਧਰਤੀ, ਜਿਸ ਤੋਂ ਭੋਜਨ ਆਉਂਦਾ ਹੈ,
ਪਰ ਉਸਦਾ ਹੇਠਲਾਂ ਹਿੱਸਾ ਅੱਗ ਵਰਗਾ ਬਣ ਜਾਂਦਾ ਹੈ;
ਇਸ ਦੀਆਂ ਚੱਟਾਨਾਂ ਤੋਂ ਨੀਲਮ ਨਿਕਲਦਾ ਹੈ,
ਅਤੇ ਇਸਦੀ ਧੂੜ ਵਿੱਚ ਸੋਨੇ ਦੇ ਸ੍ਰੋਤ ਹੁੰਦੇ ਹਨ।
ਕੋਈ ਸ਼ਿਕਾਰੀ ਪੰਛੀ ਉਸ ਲੁਕੇ ਹੋਏ ਰਸਤੇ ਨੂੰ ਨਹੀਂ ਜਾਣਦਾ,
ਕਿਸੇ ਬਾਜ਼ ਦੀ ਅੱਖ ਨੇ ਨਹੀਂ ਦੇਖਿਆ ਹੈ।
ਹੰਕਾਰੀ ਜਾਨਵਰ ਉਸ ਉੱਤੇ ਪੈਰ ਨਹੀਂ ਰੱਖਦੇ,
ਉੱਥੇ ਕੋਈ ਸ਼ੇਰ ਨਹੀਂ ਘੁੰਮਦਾ।
ਲੋਕ ਆਪਣੇ ਹੱਥਾਂ ਨਾਲ ਚੱਟਾਨ ਉੱਤੇ ਹਮਲਾ ਕਰਦੇ ਹਨ
ਅਤੇ ਪਹਾੜਾਂ ਦੀਆਂ ਜੜ੍ਹਾਂ ਨੂੰ ਮੁੱਢੋ ਉੱਲਟਾ ਕਰ ਦਿੰਦੇ ਹਨ।
ਉਹ ਚਟਾਨਾਂ ਵਿੱਚ ਸੁਰੰਗ ਖੋਦ ਲੈਂਦੇ ਹਨ;
ਉਹਨਾਂ ਦੀਆਂ ਅੱਖਾਂ ਇਸ ਦੇ ਸਾਰੇ ਖ਼ਜ਼ਾਨੇ ਨੂੰ ਵੇਖਦੀਆਂ ਹਨ।
ਉਹ ਦਰਿਆਵਾਂ ਦੇ ਸਰੋਤਾਂ ਦੀ ਖੋਜ ਕਰਦੇ ਹਨ
ਅਤੇ ਲੁਕੀਆਂ ਹੋਈਆਂ ਚੀਜ਼ਾਂ ਨੂੰ ਪ੍ਰਕਾਸ਼ ਵਿੱਚ ਲਿਆਉਂਦੇ ਹਨ।
ਪਰ ਬੁੱਧ ਕਿੱਥੋਂ ਮਿਲ ਸਕਦੀ ਹੈ?
ਸਮਝ ਕਿੱਥੇ ਵੱਸਦੀ ਹੈ?
ਕੋਈ ਪ੍ਰਾਣੀ ਇਸ ਦੇ ਮੁੱਲ ਨੂੰ ਨਹੀਂ ਸਮਝਦਾ;
ਇਹ ਜੀਉਂਦਿਆਂ ਦੀ ਧਰਤੀ ਵਿੱਚੋਂ ਨਹੀਂ ਲੱਭਦੀ।
ਡੂੰਘਾਈ ਕਹਿੰਦੀ ਹੈ, “ਇਹ ਮੇਰੇ ਵਿੱਚ ਨਹੀਂ ਹੈ”;
ਸਮੁੰਦਰ ਆਖਦਾ ਹੈ, “ਇਹ ਮੇਰੇ ਨਾਲ ਨਹੀਂ ਹੈ।”
ਇਹ ਸਭ ਤੋਂ ਵਧੀਆ ਸੋਨੇ ਨਾਲ ਖਰੀਦੀ ਨਹੀਂ ਜਾ ਸਕਦੀ,
ਨਾ ਹੀ ਇਸ ਦੀ ਕੀਮਤ ਚਾਂਦੀ ਵਿੱਚ ਤੋਲੀ ਜਾ ਸਕਦੀ ਹੈ।
ਇਹ ਓਫੀਰ ਦੇ ਸੋਨੇ ਦੀ ਕੀਮਤ ਨਾਲ ਖਰੀਦੀ ਨਹੀਂ ਜਾ ਸਕਦੀ,
ਨਾ ਹੀ ਨੀਲਮ ਦੇ ਬਹੁਮੁੱਲੇ ਪੱਥਰ ਨਾਲ।
ਨਾ ਤਾਂ ਸੋਨਾ ਅਤੇ ਨਾ ਹੀ ਬਲੌਰ ਦੀ ਤੁਲਨਾ ਇਸ ਨਾਲ ਕੀਤੀ ਜਾ ਸਕਦੀ ਹੈ,
ਨਾ ਹੀ ਇਹ ਕੁੰਦਨ ਸੋਨੇ ਦੇ ਗਹਿਣਿਆਂ ਦੇ ਬਦਲੇ ਮਿਲ ਸਕਦੀ ਹੈ।
ਮੂੰਗੇ ਅਤੇ ਕੱਚ ਇਸਦੇ ਯੋਗ ਨਹੀਂ ਹਨ;
ਬੁੱਧ ਦਾ ਮੁੱਲ ਮੋਤੀਆਂ ਨਾਲੋਂ ਵੀ ਜ਼ਿਆਦਾ ਹੈ।
ਕੂਸ਼ ਦਾ ਪੁਖਰਾਜ ਇਸ ਨਾਲ ਤੁਲਨਾ ਨਹੀਂ ਕਰ ਸਕਦਾ;
ਇਸ ਨੂੰ ਸ਼ੁੱਧ ਸੋਨੇ ਨਾਲ ਨਹੀਂ ਖਰੀਦਿਆ ਜਾ ਸਕਦਾ।
ਫਿਰ ਬੁੱਧ ਕਿੱਥੋਂ ਆਉਂਦੀ ਹੈ?
ਸਮਝ ਕਿੱਥੇ ਵੱਸਦੀ ਹੈ?
ਇਹ ਹਰ ਜੀਵਤ ਵਸਤੂ ਦੀਆਂ ਅੱਖਾਂ ਤੋਂ ਲੁਕੀ ਹੋਈ ਹੈ,
ਅਕਾਸ਼ ਦੇ ਪੰਛੀਆਂ ਤੋਂ ਵੀ ਛੁਪੀ ਹੋਈ ਹੈ।
ਤਬਾਹੀ ਅਤੇ ਮੌਤ ਆਖਦੀ ਹੈ,
“ਸਾਡੇ ਕੰਨਾਂ ਤੱਕ ਇਸ ਦੀ ਸਿਰਫ ਇੱਕ ਅਫਵਾਹ ਹੀ ਪਹੁੰਚੀ ਹੈ।”
ਪਰਮੇਸ਼ਵਰ ਉਸਦੇ ਰਸਤੇ ਨੂੰ ਸਮਝਦਾ ਹੈ
ਅਤੇ ਉਹ ਉਸਦਾ ਥਾਂ ਜਾਣਦਾ ਹੈ,
ਕਿਉਂਕਿ ਉਹ ਧਰਤੀ ਦੇ ਸਿਰੇ ਤੱਕ ਨਿਗਾਹ ਕਰਦਾ ਹੈ,
ਅਤੇ ਅਕਾਸ਼ ਦੇ ਹੇਠਾਂ ਸਭ ਕੁਝ ਵੇਖਦਾ ਹੈ।
ਜਦੋਂ ਉਸ ਨੇ ਹਵਾ ਦਾ ਬਲ ਸਥਾਪਿਤ ਕੀਤਾ
ਅਤੇ ਪਾਣੀਆਂ ਨੂੰ ਮਿਣਿਆ,
ਜਦੋਂ ਉਸ ਨੇ ਮੀਂਹ ਲਈ ਬਿਧੀ ਠਹਿਰਾਈ
ਅਤੇ ਤੂਫ਼ਾਨ ਲਈ ਇੱਕ ਰਸਤਾ,
ਫਿਰ ਉਸਨੇ ਬੁੱਧ ਵੱਲ ਵੇਖਿਆ ਅਤੇ ਇਸਦਾ ਮੁਲਾਂਕਣ ਕੀਤਾ;
ਉਸਨੇ ਇਸਦੀ ਪੁਸ਼ਟੀ ਕੀਤੀ ਅਤੇ ਇਸਦੀ ਜਾਂਚ ਕੀਤੀ।
ਅਤੇ ਉਸ ਨੇ ਮਨੁੱਖ ਜਾਤੀ ਨੂੰ ਕਿਹਾ,
“ਯਾਹਵੇਹ ਦਾ ਡਰ, ਉਸਦੀ ਬੁੱਧ ਹੈ,
ਅਤੇ ਬੁਰਿਆਈ ਤੋਂ ਦੂਰ ਰਹਿਣਾ ਸਮਝ ਹੈ।”
Biblica® Open Punjabi Contemporary Version 2025. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.