Baghlayani Bible
जकर्याह 12
यहूदा रा आऊणे वाल़ा उद्धार
इस्राएलो रे बारे दे परमेशरो रा बोलेया दा सन्देस ये आ; यहोवा जिने सर्ग फैलाया, तरती बणाई ओर माणूंए दे जीवन पाया, से बोलोआ, “मां यरूशलेम शईर शराबो रे कटोरे जेड़ा बणाई देणा; तेसरे नेड़े-तेड़े री जातिया पी की नशेड़िया जेड़े लड़खड़ाणियां। ओर जेबे तिना यरूशलेम केरी देणा, तेबे यहूदा रे ओर शईर बी केरी लणे। तेस बखते तरतिया रिया सब जातिया यरूशलेमो रे खलाफ लड़ने खे कट्ठिया ऊणिया, मां यरूशलेम शईर एक पारी पात्थर बणाई देणा, जेस केसी बी देशो तेसखे चकणे री कोशिश करनी, से काईल ऊई जाणा। दुनिया रे सबी देशा मिली की तेस पाँदे अमला करना।” परमेशरो री ये बाणी ए, तेस दिने मां दुश्मणा रे कोड़े डराई देणे ओर तिना रे सवार जख़्मी करी देणे। पर मां यहूदा रे लोका पाँदे आपणी नजर राखणी। ओर मां दूजी जातिया रे सारे कोड़े अन्दे करी देणे। तेबे यहूदा रे कुला आपू बीचे बोलणा, “यरूशलेम शईरो रे लोक तागतबर ए। एड़ा इजी री खातर ए कऊँकि तिना रा परमेशर यहोवा ए जो सबी पाँदे राज करोआ।”
तेस दिने मां यहूदा रे कुल एड़े करी देणे, जेड़ी लकड़िया रे टेरो दे आग लगाणे वाल़ी लूपी, या नज्जो रे पूल़ेया बीचे जल़ी दी मशाल। तिना सब पड़ोसी जातिया दाणे खूँजे पस्म करी देणियां। पर यरूशलेम शईरो दे रणे वाल़े लोक बचे दे रणे। यहोवे सबी ते पईले यहूदा रे तम्बूआ दे रणे वाल़े लोक बचाणे, दाऊदो रे वंशो री इज्जत महान ए। यरूशलेम शईरो रे लोका री बी तितणी ई इज्जत ए। पर तिना री इज्जत बाकी यहूदा री इज्जता ते जादा नि ऊणी। तेस बखते परमेशरो यरूशलेम शईरो रे रणे वाल़े मानो ढाली ते बचायी लणे ओर तेबे तिना बीचा ते सबी ते कमजोर बी दाऊदो बराबर महान योद्धा बणने। ओर दाऊदो रा वंश यहोवे रे तेस दूतो जेड़ा ऊणा जो तिना ते आगे-आगे चलोआ। तेस बखते मां तिना सबी जातिया रा नाश करूँगा, जो यरूशलेमो रे खलाफ लड़ने खे आऊणे। तेबे मां दाऊदो रे कराने ओर यरूशलेमो दे रणे वाल़ेया पाँदे दया करने वाल़ी ओर प्रार्थना करने वाल़ी आत्मा लटणी। तिना मां पाँदे, जो तिने भाल़े की ऊजेया था, नजर करनी ओर मेरिया तँईं एड़ा रोणा-तोणा करना जेड़ा कोई आपणे एकलौते पाऊए रिया तँईं ओआ। तिना मेरिया तँईं एड़ा रोणा-तोणा करना जेड़ा कोई मरे दे जेठे रिया तँईं ओआ।
तेस बखते यरूशलेम शईरो रे लोका दे इतणा रोणा-पीटणा ऊणा जेड़ा मगिद्दोन री तराईया रे हदद्रिम्मोनो दे ऊआ था। सारे इस्राएल देशो दे शोग ऊणा, हर एकी कुलो दे लग-लग, मतलब दाऊदो रे कराने रे लोका लग ओर तिना री जवाणसा लग, नातानो रे कराने रे लोका लग, तिना री जवाणसा आपणियां-आपणियां जगा दे रोणियां। लेविया रे कराने रे लोका लग ओर तिना री जवाणसा लग, शिमिया रे कुलो लग ओर तिना री जवाणसा आपणियां-आपणियां जगा दे रोणियां। ओर जितणे कुल रयी गे दे ओ हर एक कुलो लग-लग शोग मनाणा ओर तिना री जवाणसा आपणियां-आपणियां जगा दे रोणियां।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.