Baghlayani Bible
पजन 78
परमेशर ओर तेसरे लोक
आसापो रा मश्कील
ओ मेरे लोको, मेरी शिक्षा सुणो;
मेरे मुंए ते निकल़े रे वचना रिया तरफा खे त्यान देओ!
मां तुसा खे बुद्धिया रिया गल्ला बताणिया,
साथे मां पुराणे बखतो रिया गुप्त गल्ला रा पेत बताणा।1
जो गल्ला आसे सुणिया, ओर समजिया
ओर म्हारे बुजुर्गे आसा गे बताईया।
प्रभुए रा गुणगाण ओर तेसरी सामर्थ ओर अचम्बे रे काम जो तिने कित्ते,
सेयो आसा तिना री ल्वादा ते गुप्त नि राखणे
बल्कि आऊणे वाल़िया पीढ़िया रे लोका गे तिजी रा बखाण करना।2
प्रभुए याकूबो गे एक चतौणी ठराई ओर इस्राएलो रे एक बिधान ठराई,
जेतेरे बारे दे तिने आसा रे पितरा खे आज्ञा दित्ती
कि सेयो आपणी ल्वादा खे इना गल्ला खे सिखाओ;
ताकि आऊणे वाल़ी पीढ़ी तिना खे सीखो,
ओर बदले दे आपणे बच्चेया खे सिखाओ।
जेते कि सेयो यहोवे पाँदे परोसा राखो
ओर यहोवे रे बड़े-बड़े कामो खे पूली नि जाओ
बल्कि तेसरी आज्ञा खे मानदे रओ;
ओर सेयो आपणे पितरा जेड़े नि ऊणे,
सेयो बगावत ओर आज्ञा खे नि मानणे वाल़े लोक ए,
जिना रा परमेशरो पाँदे परोसा कदी पक्का नि था
ओर जो तेसरे प्रति वफादार नि रये।3
एप्रैमो रे वंशो रे लोक तो शस्त्रधारी ओर धनुर्धारी ऊई की बी,
युद्धो रे बखते नठीगे थे।
तिने परमेशरो री वाचा पूरी नि कित्ती
ओर तेसरे बिधि-बिधानो पाँदे चलणे ते मुकरीगे।
तिने तेसरे बड़े-बड़े काम ओर जो अचम्बे रे काम
तिने तिना सामणे कित्ते थे, सेयो पुलाई ते।
तिना रे बुजुर्गा रे सामणे मिस्र देशो रे सोअनो री जमीना दे
परमेशरे नौखे काम कित्ते थे।
परमेशरे समुद्रो रे दो इस्से करी की सेयो पार टपाईते,
ओर पाणी टेरो जेड़ा एकी जगा खड़ा करिता।
तिने दिनो रे बखते बादल़े की
ओर पूरी रात आगी रे प्रयासे रे जरिए सेयो चलाए।
तिने सुनसाण जगा रे चट्टानी फाड़ी की
मानो डूगिया बांई ते तिना खे मनमाना पाणी, पल़्याया।4
परमेशरे चट्टानी ते बी पाणिए री तारा निकयाल़िया
ओर नदिया जेड़ा पाणी बाह्या।
तेबे बी इब्री लोक फेर परमेशरो रे खलाफ ओर जादा पाप करदे गये
ओर बिना पाणिए रे प्रदेशो रे परमपरदानो रा बरोद करदे रये।
तिने आपणी मर्जिया रे मुताबिक रोटी मांगी की
मन ई मनो रे परमेशरो री परीक्षा कित्ती।
सेयो परमेशरो रे खलाफ ये बोलणे लगे, “क्या परमेशर सुनसाण जगा रे रोटिया रा इन्तजाम करी सकोआ?
तिने चट्टानी पाँदे बाई की पाणी बाह्यी तो दित्तेया
ओर पाणिए रिया तारा उमड़ने लगिया, पर क्या से रोटी बी देई सकोआ?
क्या से आपणी प्रजा रे लोका खे मासो रा इन्तजाम करी सकोआ?”
तिना रिया एड़िया गल्ला सुणी की यहोवे खे बऊत जादा गुस्सा आया,
तिने आपणी प्रजा इस्राएलिया रे खलाफ आग बरसाई
कऊँकि तिने परमेशरो पाँदे परोसा नि राखेया था
ओर ना ई तेसरे उद्धार करने रिया शक्तिया पाँदे परोसा कित्तेया।
तेबे बी तिने ऊच्चे सर्गो खे आज्ञा दित्ती
ओर तिने सर्गो रे द्वार खोले;
ओर तिना खे खाणे रिया तँईं मन्ना बरसाया
ओर परमेशरे तिना खे स्वर्गो रा नज्ज दित्तेया।5
माणूंए स्वर्गदूता री रोटी खाई;
परमेशरे तिना खे पेट परी की रोटी दित्ती।
यहोवे पुर्बो री तरफा ते पऊण चलाई
ओर आपणी शक्तिया साथे दक्खणा री पऊण चलाई;
ओर तिने तिना पाँदे तूड़ा रे कणा जेड़ा मासो री बरखा कित्ती
ओर समुद्रो रे कनारे बालूए जेड़े अणगिणत पंछी पेजे;
ओर तिना री छावणिया बीचे,
तिना रे रणे रिया जगा रे चऊँ कनारे सेटे।
ओर सेयो खाई की बऊत रज्जी गे;
ईंयाँ परमेशरे तिना खे तिना री इच्छा रे मुताबिक खाणे खे दित्तेया।
एबु तिने आपणी खाणे री इच्छा पुरिया तरअ ते पूरी पनि करी राखी थी
ओर तिना री रोटी तिना रे मुंए रेई थी,
कि परमेशरो रा गुस्सा तिना पाँदे पड़केया,
ओर तिने तिना रे अट्टे-कट्टे मर्द काईते ओर इस्राएलो रे जवान बी काईते।6
इतणा ऊणे रे बावजूद बी सेयो बऊत जादा पाप करदे गये;
ओर परमेशरो रे अचम्बे रे कामा पाँदे परोसा नि कित्तेया।
इजी खे तिने तिना रे दिन बेकारो री मईणती रे
ओर तिना रे साल कबराई की कटवाए।
जेबे परमेशर तिना खे मारने लगो था,
तेबे सेयो तेसखे पूछो थे;
ओर पश्चाताप करी की परमेशरो खे टोल़ो थे।
एबे तिना खे याद आओ था कि परमेशर म्हारी चट्टान ए
ओर परमपरदान परमेशर आसा खे छुड़ाणे वाल़ा ए।
पर तेबे बी तिने तेसखे तोखा दित्तेया;
तिने तेसगे चूठ बोलेया।
कऊँकि तिना रा मन परमेशरो रिया तरफा खे मजबूत नि था;
ना ई सेयो तेसरी वाचा रे बारे दे सच्चे थे।7
पर परमेशर दयालु ए, से नाश नि करदा बल्कि से पापो खे टखोआ,
से बार-बार आपणे गुस्से खे शान्त करदा रओआ,
ओर आपणे गुस्से री जल़ना खे पुरिया तरअ ते पड़कणे नि देंदा।
तेसखे याद था कि यो तो नाशवान ए, सेयो पऊणी जेड़े ए,
जो चली जाओई ओर वापस नि आऊँदी।
कितणी ई बार तिने सुनसाण जगा रे परमेशरो रे खलाफ बगावत कित्ती
ओर तेते सुनसाण जगा दे से उदास कित्तेया।
सेयो बार-बार परमेशरो री परीक्षा करो थे
ओर इस्राएलो रे पवित्र परमेशरो खे दु:खी करो थे।
तिने ना तो तेसरी शक्ति याद कित्ती,
ना से दिन जेबे परमेशरे सेयो तिना रे बैरिया रे वशो ते छुड़ाए थे;
जेबे तिने मिस्र देशो रे आपणे चिह्न दखाए थे
ओर सोअनो रे मैदानो रे अचम्बे रे काम कित्ते थे।
परमेशरे मिस्रो रिया नदिया रा पाणी खूनो रे बदली ता
ओर मिस्रो रे रणे वाल़े आपणी नदिया रा पाणी पी नि सके।8
परमेशरे तिना बीचे माखा रे चूण्ड पेजे, जिने सेयो खाए
ओर मिनके बी पेजे, जिने सेयो बऊत सताए।
तिने तिना री जमीना री फसल कीड़ेया खे,
ओर तिना री खेतीबाड़ी टिड्डिया खे खुल़ाई ती।
तिने तिना री अंगूरा री बेला ओल़ेया साथे
तिना रे गूलरो रे डाल़ बड़े-बड़े पात्थर बरसाई की नाश करीते।
तिने तिना रे डांगर ओल़ेया साथे
ओर तिना रिया पेड़ा-बाकरिया पाँदे बिजल़ी सेटी सेयो मटयाई तिया।
तिने तिना पाँदे आपणा प्रचण्ड गुस्सा ओर कोप पड़काया
ओर सेयो बिपदा रे पाईते ओर दु:ख देणे वाल़े दूता रा दल पेजेया।
तिने आपणे गुस्से पाँदे लगाम नि लगाई, ओर ना तिना रे प्राण छाडे,
बल्कि सेयो महामारिया ते काईते।
तिने मिस्र देशो रे सब जेठे बच्चे काईते,
हामो रे वंशो रे सबी ते तागतबर माणूं मरी गे।
तिजी ते बाद परमेशर आपणी प्रजा रे लोका खे पेडा-बाकरिया जेड़ी एकी जगा ते दूजी जगा खे लई चलेया
ओर सुनसाण जगा रे तिना री अगुवाई डांगरा रे चूण्डा जेड़ी कित्ती।
से तिना खे सई-सलामत लई चलेया ओर तिना खे कोई डर नि लगेया,
पर तिना रे दुश्मण समुद्रो रे डूबी गे।
ओर तिने सेयो आपणे पवित्र देशो रे बन्ने तक,
तेसी पाह्ड़ी देशो रे पऊँचाए, जो तिने आपणी सामर्था साथे जीतेया था।
परमेशरे तिना सामणे ते दूजी जातिया नठाई तिया;
ओर तिना री जमीन डोरिया साथे नापी-नापी की बांडी ती;
ओर इस्राएलो रे गोत्र तिना रे डेरेया रे बसाए।
तेबे बी तिने परमपरदान परमेशरो री परीक्षा कित्ती
ओर तेस साथे बगावत कित्ती ओर तेसरी चतौणिया नि मानियां
ओर तिने तेसते मूँ फेरी की आपणे बुजुर्गा जेड़ा विश्वासघात कित्तेया;
सेयो तोखा देणे वाल़े धनुषो जेड़े दूजिया तरफा खे मुड़ी गे।
कऊँकि तिने ऊच्ची जगा पाँदे बेदिया बणाई की परमेशर नराज कित्तेया
ओर मूर्तिया बणाई की तेसरे जल़न पैदा कित्ती।
ये देखी कि यहोवे खे गुस्सा आया,
ओर तिने इस्राएल बिल्कुल छाडीता।
तिने शीलोह शईर आपणे रणे री जगा
जो तिने माणूंआ बीचे खड़ा कित्तेया था, छाडीता।
ओर आपणा सन्दूक बंदुआईया रे जाणे दित्तेया
ओर आपणी सामर्थ ओर महिमा रा चिह्न दुश्मणा रे आथो रे करिता।
तिने आपणी प्रजा तलवारी साथे मरवाई ती
ओर आपणे निज पाअगो रे लोका पाँदे तेसरा गुस्सा पड़की गा।
तिना रे जवान आगी रे पस्म ऊईगे
ओर तिना री कुआँरिया रे ब्याओ रे गीत नि गाए गये।
तिना रे पुरोईत तलवारी की मारे गये
ओर तिना रिया बिदुआ खे शोग करने री आज्ञा नि थी।
तेबे प्रभु मानो नींजा रे छल़ी की उठेया
ओर एड़े वीरो जेड़ा उठेया जो शराब पी की ललकारोआ।
तिने आपणे बरोदी मारी की पीछे टाई ते;
ओर तिना री सदा खे बेज्जती कराई।
पर तिने यूसुफो रा वंश छाडीता;
ओर तिने एप्रैमो रा गोत्र नि चुणेया;
पर यहूदा रा ई गोत्र ओर सिय्योन पाह्ड़ चूणी ला,
जेतेते से प्यार करो था।
तिने आपणा मन्दर बऊत ऊच्चा बणाईता,
ओर तरतिया जेड़ा से मजबूत बणाईता, जेतेरी निऊँ तिने सदा खे पाई राखी।
फेर तिने आपणा दास दाऊद चूणी ला
ओर पेडा रिया गवाईणी ते से निकयाल़ी ला;
से तेसखे बच्चे वाल़िया पेडा पीछे-पीछे फिरने ते लई आया
ताकि से तेसरी प्रजा याकूबो रा मतलब तेसरे निज पाअग इस्राएलो रा चरवाह बणो।
दाऊदे खरे मनो ते तिना री रखवाल़ी कित्ती
ओर आपणे आथो री कुशलता साथे तिना री अगुवाई कित्ती।
Source notes (8)
- Footnote मत्ती 13:35
- Footnote बिध. 4:9, यहोशू 4:6,7, इफिसि 6:4
- Footnote 2 राजा 17:14,15
- Footnote निर्ग. 17:6, गिण 20:11, 1 कुरिन्थ 10:4
- Footnote निर्ग. 16:4, यूह. 6:31
- Footnote 1 कुरिन्थ 10:5
- Footnote प्रेरित 8:21
- Footnote प्रकाशित 16:4
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.