पजन 72

तर्मी राजे रा राज्य

सुलैमानो रा गीत

1ओ परमेशर, राजे खे आपणे न्याय रे नियम बता,

राजे रे पाऊए खे आपणा तार्मिकता देई दे!

2ताकि से तेरी प्रजा रा न्याय तार्मिकता साथे

ओर तेरे दु:खी लोका रा न्याय बिना पक्षपातो ते करो।1

3पाह्ड़ ओर पाह्ड़िया ते प्रजा रे लोका खे तर्मो रे शान्ति मिलणी।

4तेस राजे प्रजा रे दु:खी लोका रा न्याय करना

ओर गरीब लोक बचाणे ओर अन्देर करने वाल़े चूर करने।2

5जदुए तक सूरज ओर चाँद बणे रे रणे,

तदुए तक पीढ़िया-पीढ़िया रे तेरेया लोका तेरा डर मानदे रणा।

6राजा डोरूआ दे बर्खा जेड़ा आशीषा री बजा ओ,

जमीना दे पड़ने वाल़ी बर्खा जेड़ा ओ जो जमीना खे सिंजोई।

7म्हारे राजे रे दिना रे तार्मिक माणूं फल़णे-फूलणे

ओर जदुए तक चाँद बणेया रा रणा तदुए तक बऊत शान्ति रणी।

8तेसरा राज्य एकी समुद्रो ते लई कि दूजे समुद्रो तक

ओर फरात नदिया ते लई की तरतिया रे दूजे कनारे तक ऊणा।

9सुनसाण जगा रे रणे वाल़े लोक तेस सामणे जानूआ रे पारे चुकणे

ओर तेसरे दुश्मणा माट्टी चाटणी।

10तर्शीश ओर टापूआ-टापूआ रे राजेया पेंट ल्याऊणी,

शेबा ओर सबा दुँईं जगा रे राजेया तोफे पऊँचाणे।

11सबी राजेया तेसगे माथा टेकणा,

देशो-देशो रे लोका तेरी सेवा करनी।3

12कऊँकि राजे दुहाई देणे वाल़े गरीब लोक

ओर दु:खी ओर बिना साअरे माणूं बचाणे।

13तेस कंगाल़ ओर गरीबो पाँदे तरस खाणी

ओर गरीबा री जिन्दगी बचाणी।

14तेस तिना रे प्राण अन्देर ओर उपद्रव करने वाल़ेया ते छुड़ाई लणे

ओर तिना रा जीवन तेसरी नजरा रे कीमती ए।4

15से तो जिऊँदा रणा ओर शेबा रे सूईने बीचा ते तेसखे देणा।

लोका तेसरिया तँईं हर रोज प्रार्थना करनी

ओर पूरा दिन तेसरिया तँईं आशीष मांगणी।

16देशो रे बऊत सारा नज्ज ऊणा

ओर पाह्ड़ा रिया चूँडिया पाँदे फसला रे डोरू लईराणे।

जेतेरे सिल्ले लबानोनो रे देवदारा रे डाल़ा जेड़े

ओर शईरो रे रणे वाल़े लोक काओ जेड़े लईराणे।

17राजे रा नाओं सदा-सर्वदा बणेया रा रणा;

जदुए तक सूरज बणेया रा रणा, तदुए तक तेसरे वंशो रे लोका राज करना

ओर लोका आपू खे तेसरी बजा ते तन्य मानणा।

सारे देशो रे लोका तेसखे तन्य बोलणा।

18इस्राएलो रा प्रभु परमेशर तन्य ए;

तिने ई अचम्बे रे काम कित्ते।5

19राजे रा महिमा ते परेया रा नाओं सदा तन्य रणा

ओर सारी तरती तेसरी महिमा साथे परी जाणी। आमीन् फेर आमीन्।

20यिशै रे पाऊ दाऊदो री प्रार्थना खत्म ऊई गी।