Baghlayani Bible
पजन 148
सारी सृष्टि परमेशरो री स्तुति करो
प्रभुए री स्तुति करो!
प्रभुए री स्तुति स्वर्गो ते करो,
ऊच्चिया जगा रे तेसरी स्तुति करो!
ओ यहोवे रे स्वर्गदूतो, तेसरी स्तुति करो;
ओ प्रभुए री सेनाओं, तेसरी स्तुति करो!
ओ सूरज ओर चाँद, तेसरी स्तुति करो,
ओ सब चमकणे वाल़े तारेयो, तेसरी स्तुति करो!
ओ सबी ते ऊच्चे सर्ग ओर ओ सर्गो ते पाँदले पाणी,
तुसे दोनो तेसरी स्तुति करो!
यो सारे प्रभुए रे नाओं री स्तुति करो;
कऊँकि प्रभुए आज्ञा दित्ती ओर यो बणाए गये।
ओर प्रभुए जुगो-जुगो तक सेयो स्थिर करी राखे;
ओर प्रभुए एड़ी बिधि ठराई राखी, जो कदी टल़ी नि सकदी।
तरतिया पाँदे प्रभुए री स्तुति करो,
ओ अजगर ओर डूगे समुद्र,
ओ आग ओर ओल़े, ओ बर्फ ओर पाल़ा,
ओ प्रभुए रा वचन मानणे वाल़ी प्रचण्ड पऊण!
ओ पाह्ड़ो ओर सारे टिलेयो,
ओ फल देणे वाल़े डाल़ो ओर देवदारो!
ओ बणो रे ओर सब करेलू डांगरो,
ओ लूरने वाल़े जन्तुओ ओर पंछियो!
ओ तरतिया रे राजेओ ओर राज्य-राज्य रे सारे लोको,
ओ परदानो ओर तरतिया रे न्याय करने वाल़ेयो!
ओ जवानो ओर कुआँरियो,
ओ बुजुर्गो ओर बाल़को!
प्रभुए रे नाओं री स्तुति करो, कऊँकि तेसरा ई नाओं महान् ए;
तेसरी महिमा तरती ओर सर्गो पाँदे ए।
प्रभुए आपणे निज लोक तागतबर बणाई राखे; ये तेसरे सबी पग्ता खे,
मतलब इस्राएलो री ल्वादा खे ओर प्रभुए रे नेड़े रणे वाल़ी प्रजा रिया तँईं स्तुति करने रा विषय ए।
प्रभुए री स्तुति करो!
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.