Baghlayani Bible
पजन 123
परमेशरो री दया रिया तँईं प्रार्थना
यात्रा रा गाणा
ओ यहोवा, आऊँ प्रार्थना दे तेरिया ओर स्वर्गो रिया तरफा खे देखूँआ,
जेथा ते तूँ तरतिया पाँदे राज करेया।
देख, जिंयाँ दासो रिया आखी आपणे मालको रे आथो रिया तरफा खे
ओर जिंयाँ दासिया रिया आखी आपणियां मालकणिया रे आथो रिया तरफा खे लगी री रओईया,
तिंयाँ ई म्हारिया आखी म्हारे प्रभु परमेशरो रिया तरफा खे तेस बखतो तक लगी रिया रणियां,
जदुओ तक से आसा पाँदे दया नि करो।
आसा पाँदे दया कर, ओ प्रभु, आसा पाँदे दया कर,
कऊँकि आसा री बऊत ई बेज्जती ऊई गी री।
म्हारा जिऊ अमीर लोका रे मजाको ते
ओर कमण्डिया री बेज्जतिया ते बऊत ई परी गा रा।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.