Baghlayani Bible
मीका 3
तेबे मैं बोलेया, “ओ याकूबो रे परदानो, ओ इस्राएलो रे कराने रे न्यायियो, सुणो! तुसा खे पता ऊणा चाईयो कि क्या सई ओर क्या गल़त ए। तुसे तो खराईया साथे बैर ओर बुराईया साथे प्यार राखोए, मानो, तूँ मेरे लोका री खाल चवाड़ने वाल़े जेड़ा ए। तूँ तिना री आड्डिया ते मास तेड़ी लओआ।” तुसे मेरे लोका खे खाई जाओए। तुसे तिना री खाल तेड़ी देओए, तिना रिया आड्डिया तोड़ी देओए, ओर तिना खे मासो जेड़े बाडी की पांडे दे पाई देओए। फेर तुसा मुसीबता रे बखते यहोवे ते मतादा रिया तँईं बोलणा। पर तेस तुसा री नि सुणनी, ओर तुसा रे बुरे कामा रिया बजा ते तेस आपणा मूँ तुसा रिया तरफा ते लकोई लणा।
यहोवा ईंयांँ बोलोआ, “ओ चूठे भविष्यबक्ताओं, तुसे मेरे लोका खे बईकाणे लगी रे! तुसे तिना लोका ते शान्तिया रा वादा करोए, जो तुसा खे खाणा देओए, पर जो तुसा खे खाणा देणे ते ना करोए, तुसे तिना लोका साथे चगड़ा करने खे त्यार ऊई जाओए। इजी बजा ते तुसा पाँदे एड़ी रात आऊणी कि तुसा खे दर्शण नि मिलणा ओर तुसे एड़े न्हेरे दे पड़ने कि भविष्यबाणी नि बोली सकणे। चूठे भविष्यबक्तेया खे सूरज डूबी जाणा ओर दिने-दपईरे तिना पाँदे न्हेरा छायी जाणा।” दर्शी शर्मिंदा ऊणे ओर चूठी भविष्यबाणी करने वाल़ेया रे मूँ काल़े ऊणे ओर तिना सबी आपणे ओठ इजी री खातर टखणे कि परमेशरो रिया तरफा ते ज्वाब नि मिलदा। पर आऊँ तो परमेशरो री आत्मा ते शक्ति, न्याय ओर पराक्रम पायी की परिपूर्ण ए, ताकि आऊँ याकूबो खे तेसरा पाप ओर इस्राएलो खे तेसरा पाप बिना डरे बताई सकूँ।
ओ याकूबो रे कराने रे परदानो, ओ इस्राएलो रे कराने रे न्यायियो, तुसे न्याय वाल़े काम करने ते नफरत करोए। तुसे हर सीदी गल्ला खे तोड़ी-मरोड़ी देयो ए। तुसे सिय्योन अत्या करी की ओर यरूशलेम पापो रे जरीये बणाया था! तुसा रे परदान सई फैंसला तेबे लओए, जेबे तिना खे रिश्वत मिलोई। तुसा रे पुरोईत लोका खे तेबे शिक्षा देओए जेबे सेयो तिना खे अच्छा पैसा देओए। तुसा रे चूठे भविष्यबक्ता लोका ते पैसे माँगोए, ताकि सेयो लोका खे बताई सको कि आऊणे वाल़े बखतो दे तिना साथे क्या ऊणा। सेयो भविष्यबक्ता बोलोए, “यहोवा आसा खे बताओआ कि आसा क्या बोलणा चाईयो, यहोवा आसा साथे रओआ इजी री खातर आसा साथे कुछ बी बुरा नि ऊणा।” इजी री खातर जो कुछ तुसे करी राखेया ए, तेतेरिया बजा ते सिय्योनो दे अल़ जोड़ी की डोरू बणाई देणा। यरूशलेम कूड़े रे टेरो दे बदली देणा। मन्दरो रिया पाह्ड़िया जाड़ो ओर बणो रे कांडेया ते टकी जाणिया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.