Baghlayani Bible
लेवी बिधान 9
हारूण ओर तेसरे पाऊआ री पईली बलिया री चड़त
आठुए दिने मूसे हारूण ओर तेसरे पाऊ ओर इस्राएली स्याणे माणूंआ खे बुलाई की तिना रे सामणे हारूणो खे बोलेया, “पापबलिया खे एक बिना नुक्शो रा बाच्छू ओर होमबलिया खे एक बिना नुक्शो रा खाडू लई की यहोवे री मौजुदगिया रे पेंट चढ़ा। ओर इस्राएलिया खे ईंयाँ बोल, ‘तुसे पापबलिया खे एक बाकरा ओर होमबलिया खे एक बाच्छू ओर एक पेडा रा बच्चा लओ, ये दोनो एकी-एकी सालो रे ओ ओर बिना नुक्शो रे ओ, ओर यहोवे रे सामणे मेलबलि चढ़ाणे खे एक बल़द ओर एक खाडू ओर तेलो साथे मिले रे मैदे री नज्जो री बलि बी लई लो; कऊँकि आज यहोवे तुसा खे आपणे दर्शण देणे।’ ” जिना-जिना चीजा री आज्ञा मूसे दित्ती तिना सबी खे सेयो मिलणे वाल़े तम्बूए सामणे ली आए ओर तेबे सारी मण्डल़ी नेड़े आई की यहोवे रे सामणे खड़ी ऊईगी। तेबे मूसे बोलेया, “ये से काम ए जेतेखे करने खे यहोवे आज्ञा देई राखी ओर यहोवे री महिमा रा तेज तुसा खे दिशणा।” तेबे मूसे हारूणो खे बोलेया, “यहोवे री आज्ञा रे मुताबिक बेदिया रे नेड़े जाई की आपणे पापबलि ओर होमबलि चढ़ाई की आपू खे ओर सबी जनता खे प्राश्चित कर ओर जनता रा चढ़ावा बी चढ़ाई की तिना खे प्राश्चित कर।” 1
इजी री खातर हारूणे बेदिया रे नेड़े जाई की आपू खे पापबलिया रा बाच्छू बलिदान कित्तेया। ओर हारूणो रे पाऊ खूनो खे मूसे गे लईगे, तेबे तिने आपणी गूठी खूनो रे डबोई की बेदिया रे सींगा पाँदे खून लगाया ओर बाकि बचेया रा खून बेदिया रे पावे पाँदे लटी ता; ओर पापबलिया री चर्बी ओर दोनो गुर्दे ओर कल़ेजे पाँदली झिल्ली तिने बेदिया पाँदे फूकी, जेड़ी यहोवे मूसे खे आज्ञा दित्ती थी। ओर तेसरा मास ओर खाल तिने डेरे ते बारे आगी रे फूकी ते।
तेबे हारूणे होमबलिया रा डांगर बलिदान कित्तेया ओर तेसरे पाऊए खून मूसे रे आथो रे दित्तेया, तेबे तिने बेदिया रे चऊँ कनारे से खून छिड़की ता। तेबे तिने होमबलिया रे डांगरो रे टुकड़े-टुकड़े करी की सिरो समेत तेसरे आथो रे देईता ओर तिने से बेदिया पाँदे फूकी ता। ओर तिने आंजा ओर पैर तोई की बेदिया पाँदे होमबलिया पाँदे राखी की फूके।
तेबे हारूण लोका रा चढ़ावा आगे लई आया ओर से पापबलिया रा बाकरा जो तिना खे था लई की तेसरा बलिदान कित्तेया ओर पईलके जेड़ा से बी पापबलि करी की चढ़ाया। फेर तिने होमबलि बी सामणे ल्याई की रवाजा रे मुताबिक चढ़ाई। ओर तिने नज्जो री बलि बी नेड़े ल्याई की तिजी बीचा ते मुट्ठी परी की बेदिया पाँदे फूकी, ये हर रोज की प्यागा री होमबलिया ते अलावा चढ़ाया।
बल़द ओर खाडू, मतलब जो मेलबलि डांगर लोका रिया तँईं थे, सेयो बी बलि कित्ते; फेर हारूणो रे पाऊए खून तेसरे आथो रे दित्तेया ओर तिने से बेदिया रे चऊँ कनारे छिड़की ता। ओर तिने बल़दो ओर खाडूए री चर्बी, तिना री चर्बिया वाल़ी मोटी पूँछ ओर जेते चर्बिया साथे आंजा टखी रिया रओईया से ओर गुर्देया साथे कल़ेजे पाँदली झिल्ली बी तेसरे आथो रे दित्ती; तिने चर्बी छातिया पाँदे राखी ओर फेर हारूणे से चर्बी बेदिया पाँदे फूकी, हारूणे मूसे री आज्ञा रे मुताबिक ईलाणे री पेंटा खे छातिया ओर दाँणी खुटी यहोवे रे सामणे ईलाई।
फेर हारूणे लोका रिया तरफा खे आथ बढ़ाई की तिना खे आशीर्वाद दित्तेया ओर पापबलि, होमबलि ओर मेलबलिया खे चढ़ाणे ते बाद से थाले उतरी की आईगा। तेबे मूसा ओर हारूण मिलणे वाल़े तम्बूए रे गये ओर निकल़ी की लोका खे आशीर्वाद दित्तेया, तेबे यहोवे री मौजुदगिया री महिमा सबी लोका खे दिशी। तेबे यहोवे रे सामणे ते आग निकल़ी ओर चर्बिया समेत होमबलिया खे बेदिया पाँदे फूकी कि स्वा करी ती; जेबे लोके ये देखेया सेयो खुशिया साथे जय-जयकारो रा नारा लगाणे लगे ओर तिने आपणे मुंओ रे पारे रूड़ी की यहोवे गे माथा तेकेया।
Source notes (1)
- Footnote इब्रानी 5:3
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.