Baghlayani Bible
लेवी बिधान 5
दोषबलिया री बिधि
जे कोई माणूं केसी गल्ला रा गवाह् ऊई की एड़ा पाप करो कि कसम खुल़ाई की पूछणे पाँदे बी कि क्या तैं ये देखेया या तूँ जाणोआ ओर से गल्ल बताओ नि, तो तेसखे एस दोषो री जिम्मेबारी लणी पड़नी।
या जे कोई केसी अशुद्ध चीजा खे अणजाणे रे छुँईं लो, तो चाए से अशुद्ध बणो रे डांगरो री, चाए अशुद्ध करेलू डांगरो री, चाए अशुद्ध लूरने वाल़े जीव-जन्तुआ री लोथ ओ, ओर से नि जाणो कि अशुद्ध ए तो से अशुद्ध ऊई की दोषी ठईरना।
या जे कोई माणूं केसी अशुद्ध चीजा खे अणजाणे रे छुँईं लो, चाए से अशुद्ध चीज केड़ी कऊँ नि ओ जेते की लोक अशुद्ध ऊई जाओए, तो जेबे से एसा गल्ला खे जाणी लओगा, तेबे से दोषी ठईरना।
या जे कोई माणूं बुरा या पला करने खे बिना सोचे समजे कसम खाओ, चाए केड़ी बी गल्ल से बिना सोचे-समजे कसम खाई-खाई की बोलो, तो एड़ी गल्ला रे से तेस बखते दोषी ठईरना जेबे तेसखे पता लगी जाणा। ओर जेबे से इना गल्ला बीचा ते केसी बी गल्ला रे दोषी ओ, मतलब जेतेरे बारे दे तिने पाप करी राखेया ओ, से तिजी खे मानी लओ,
आपणे पापो रा प्राश्चित करने खे से यहोवे रे सामणे आपणा दोषबलि ली आओ, तिजी खे से एक मिन्टू या बाकरिया रा बच्चा पापबलि करने खे ली आओ; तेबे पुरोईत तेस पापो रे बारे दे तेसरिया तँईं प्राश्चित करो।
पर जे तेसरे पेड या बाकरी देणे री सामर्थ नि ओ, तो आपणे पापो रिया तँईं कूगी या कबूतरिया रे दो बच्चे दोषबलि चढ़ाणे खे यहोवे गे ल्यायो, तिना बीचा ते एक पापबलिया खे ओर दूजा होमबलिया खे ओ। से तिना खे पुरोईतो गे ली आओ, तेबे पुरोईत पापबलिया वाल़े खे पईले चढ़ाओ ओर तेसरा सिर गल़े ते मरोड़ी देओ, पर लग नि करो, ओर से पापबलिया रे डांगरो रा कुछ खून लई की बेदिया रे कनारे पाँदे छिड़को ओर जो खून बाकि रणा से बेदिया रे पावे पाँदे लटेया जाओ, से तो पापबलि ठईरना।
तेबे से दूजे पंछिये खे नियमो रे मुताबिक होमबलि करो ओर पुरोईत तेसरे पापो रिया तँईं प्राश्चित करो ओर तेबे से माफ करेया जाणा।
जे से दो कूगी या कबूतरिया रे दो बच्चे पनि देई सको, तो से आपणे पापो रिया बजअ ते आपणा चढ़ावा दो किलो मैदा पापबलि करी की लई आओ; तिजी पाँदे ना तो से जैतूनो रा तेल पाओ ओर ना लोबान राखो, कऊँकि से पापबलि ए।1 से तेस मैदे खे पुरोईतो गे लई जाओ ओर पुरोईत तिजी बीचा ते मुट्ठी परी की याद दलाणे वाल़ा इस्सा जाणी की बेदिया पाँदे यहोवे रिया तँईं आगी रे फूको; से तो पापबलि ठईरना। ओर इना गल्ला बीचा ते केसी बी गल्ला रे बारे दे जो कोई पाप करोगा, पुरोईत तेसरा प्राश्चित करो ओर तेबे यहोवे तेसरा पाप माफ करना ओर एसा पापबलिया रा बाकि बचेया रा ओर नज्जो री बलिया रा बाकि बचेया रा पुरोईतो रा ठईरना।
दोषबलि
तेबे यहोवे मूसे खे बोलेया, “जे कोई यहोवे खे देणे री पवित्र कित्ती रिया चीजा रे बारे दे अणजाणे रे तोखा करो ओर पापी ठईरो, तो से यहोवे गे चूण्डो बीचा ते एक बिना नुक्शो रा खाडू दोषबलिया खे लई आओ; तेसरी कीमत पवित्र जगा रे शेकेल रे मुताबिक तिथणे ई शेकेल चाँदिए रा ओ, जितणा पुरोईत ठराओ। जेसा पवित्र चीजा रे बारे दे तिने पाप करी राखेया ओ, तिदे से पाँजुआ इस्सा ओर बढ़ाई की पुरोईतो खे देओ; तेबे पुरोईत दोषबलिया रा खाडू चढ़ाई की तेसरिया तँईं प्राश्चित करो, तेबे तेसरा पाप माफ करेया जाणा।”
जे कोई एड़ा पाप करो कि तिना कामा बीचा ते जिना खे यहोवे ना करी राखी, केसी कामो खे करो, तो चाए से तेसरे अणजाणे रे ऊईरा ओ, तेबे बी से दोषी ठईरना; इजी खे से तेस पापो रा जिम्मेबार ठईरना। से चूण्डो बीचा ते एक बिना नुक्शो रा खाडू दोषबलि करी की पुरोईतो गे लई आओ, तेसरी कीमत तिथणी ओ जितणी पुरोईत ठराओ ओर पुरोईत तेसरिया तँईं तेसरी पूला ते कित्ते रे पापो खे जो तिने अणजाणे रे कित्तेया था प्राश्चित करो ओर से माफ करेया जाणा। ये दोषबलि ठईरो, कऊँकि से माणूं यहोवे रे खलाफ गल़त काम करी की दोषी ठईरना।
Source notes (1)
- Footnote लूक 2:24
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.