Baghlayani Bible
लेवी बिधान 25
सातुआ साल राम करने रा साल
जेबे मूसा सीनै पाह्ड़ो पाँदे था तेबे यहोवे तेसखे ये बोलेया, “इस्राएलिया खे बोल कि जेबे तुसे तेते जमीना रे जाओ जो आँऊ तुसा खे देऊँआ, तेबे तेते जमीना खे यहोवे री महिमा खे राम मिलेया करो। इजी खे छे सालो तक तो आपणे-आपणे डोरू बाया करने ओर छे साला तक आपणे-आपणे अंगूरा रे बगीचे छाँटी-छाँटी की डोरूआ री फसल कट्ठी करेया करनी; पर सातुए साले जमीना खे यहोवे री महिमा रिया तँईं परम राम मिलेया करो; तिदे ना तो आपणे डोरू बाणे ओर ना ई आपणे अंगूरा रे बगीचे री कांट-छाँट करनी। जो कुछ बाडे रे डोरूआ रे आपणे आपू ई जम्मो से नि बाडणा ओर आपणे बिना छाँटे रे बगीचे रे अंगूर नि तोड़ने; कऊँकि से जमीना खे बऊत ई रामो रा साल ऊणा। पर जमीना रे रामो रे सालो री ई फसला ते तुसा खे, तुसा रे दास-दासिया खे ओर तुसा साथे रणे वाल़े मजदूरा खे ओर परदेशिया खे बी रोटी मिलणी; ओर तुसा रे डांगरा रा ओर प्रदेशो रे जितणे जंगल़ी डांगर ओ तिना री रोटी बी जमीना री सारी फसला ते ऊणी।”
मनाणे रा त्योआर
सात रामो रे साल, मतलब सातगुणा सात साल गिणी लणे, सातो रामो रे सालो रा ये बखत ऊणूँजा साल ऊणे। तेबे सातुए मीन्ने रे दसुए दिने, मतलब प्राश्चितो रे दिने, जयजयकारो रे महाशब्दो रा रड़सिंगा आपणे सारे प्रदेशो रे सारी जगा रे बजवाणा। ओर से पँजाऊआ साल पवित्र करी की मानणा ओर सारे प्रदेशो रे सबी रणे वाल़ेया खे छुटकारे रा प्रचार करना; तेते सालो खे तुसा बीचे जुबलिया रा साल बोलेया जाओ; तिदे तुसे आपणी-आपणी जमीना रे ओर आपणे-आपणे कराने खे वापस ऊणे। तुसा बीचे पँजाऊए सालो खे जुबलिया रा साल बोलेया जाणा; तिदे ना तो तुसे बिऊ बाणा ओर जो आपणे आपू ई जम्मो से पनि बाडणा ओर ना ई बिना छाँटी री अंगूरा री बेला रे अंगूर तोड़ने। कऊँकि से जो जुबलिया रा साल ऊणा; से तुसा खे पवित्र ऊणा; जो डोरूआ रे आपू जमणी तुसे तेतेरी फसल डोरूआ तेई लई-लई की खाणी।
एसा जुबलिया रे सालो रे तुसे आपणी-आपणी जमीना रे वापस ऊणे। ओर जे तुसे आपणे पाई-बन्दुआ खे कुछ बेचो या तिना ते कुछ खरीदो, तो तुसे एकी-दूजे रे फाईदे खे एकी-दूजे रा नुकशाण नि करना। जुबलिया ते बाद जितणे साल बीते ओ तिना री गिणतिया रे मुताबिक दाम करी की एकी-दूजे ते खरीदणा ओर बाकि सालो री फसला रे मुताबिक से ताखे बेचो। जितणे साल ओर रओ तिथणा ई दाम बढ़ाणा ओर जितणे साल कम रओ तिथणा ई दाम कटाणा, कऊँकि सालो री जितणी फसल ऊणी तिथणा ई तेस ताखे बेचणा। तुसे आपणे-आपणे पाई-बन्दुआ पाँदे अन्देर नि करना, आपणे परमेशरो रा डर मानणा, आऊँ तुसा रा परमेशर यहोवा ए।
सातुए सालो री मुश्किल
इजी री खातर तुसे मेरी रवाजा मानणियां ओर मेरे नियमा पाँदे सोची-समजी की चलणा; कऊँकि एड़ा करने ते तुसे तेते प्रदेशो दे बिना डरे दे बसे दे रणे। तेबे जमीना आपणी फसल ऊगाया करनी ओर तुसा पेट परी की खाया करना ओर तेते प्रदेशो दे बिना डरे दे बसे दे रणे। तुसे एड़ा सवाल करी सकोए कि आसे सातुए साले आपणे डोरूआ रे ना तो कुछ बिऊ बाऊँगे ओर ना डोरूआ री फसल कट्ठी करूँगे तो आसा क्या खाणा? तो जाणी लओ कि मां यहोवे तुसा खे छठे साले एड़ी आशीष देणी, कि जमीना री फसल तीऊँ साला तक कामे आऊणी। जेबे तुसा आठुए साले बिऊ बाणा तेबे तुसा पुराणी फसला बीचा ते खांदे रणा ओर नऊए सालो री फसल जदुए तक नि मिलोगी, तदुए तक तुसा पुराणी फसला बीचा ते खांदे रणा।
जमीन-जायदात छुड़ाणे री बिधि
जमीन सदा खे नि बेचणी, कऊँकि जमीन मेरी ए; ओर तिदे तुसे परदेशी ओर बारले लोका जेड़े ऊणे। पर तुसे आपणे इस्से री सारे प्रदेशो री जमीन छुड़ाणे देणी।
जे तेरा कोई पाई-बन्दु गरीब ऊई की आपणी जमीना बीचा ते कुछ बेची देओ, तो तेसरे टब्बरो वाल़ेया बीचा ते जो सबी ते नेड़े ओ, से आई की आपणे पाई-बन्दुए री बेची री जमीन छुड़ाई लओ। जे केसी माणूंए खे छुड़ाणे वाल़ा कोई पाई-बन्दु नि ओ ओर तेसगे इतणा पैसा ओ कि से आपू ई आपणे इस्से खे छुड़ाई सकोआ, तो से माणूं तिजी रे बिकणे रे बखतो ते सालो री गिणती करी की बाकि सालो री फसला रा दाम, तेसखे जिने से खरीदी राखी, वापस देई देओ, तेबे से आपणी जमीना रा अक्कदार ऊई जाणा। पर जे तेसगे इतणे पैसे नि ओ कि तिजी खे फेर आपणी करी सको, तो तेसरी बेची री जमीन जुबलिया रे सालो तक खरीदणे वाल़ेया रे आथो रे रओ; ओर जुबलिया रे सालो रे छूटी जाओ तेबे से माणूं फेर आपणी जमीना रा अक्कदार ऊई जाओ।
फेर जे कोई माणूं दवाला वाल़े शईरो रे रणे वाल़ा कअर बेचो, तो से बेचणे ते बाद सालो ते पीतरे तिजी खे छुड़ाई सकोआ, मतलब पूरे साल तेस माणूंए खे छुड़ाणे रा अक्क रणा। पर जे से पूरे सालो तक नि छुड़ाई सकोगा, तो से कअर जो दवाला वाल़े शईरो रे ए मोले लणे वाल़े रा ऊई जाणा ओर पीढ़िया-पीढ़िया तक तेसरे ई वंशो रा बणेया रा रणा ओर जुबलिया रे सालो रे पनि छूटणा। पर बिना दवाला वाल़े गाँवो रे कअर तो प्रदेशो रे डोरूआ जेड़े गिणे जाणे; तिना खे छुड़ाई बी सकोए ओर सेयो जुबलिया रे सालो रे छूटी जाओ। लेविया खे एड़ा नियम ये सेयो आपणे शईरो रे आपणे कअरो खे कदी बी छुड़ाई सकोए। ओर जे कोई लेवी आपणा इस्सा नि छुड़ाओ, तेबे से बेचेया रा कअर जो तेसरे इस्से रे शईरो रे ओ, जुबलिया रे सालो रे छूटी जाओ; कऊँकि इस्राएलिया बीचे लेविया रा इस्सा तिना रे शईरो रे सेयो कअर ईए। पर तिना रे शईरो रे चऊँ तरफा री चराईया री जमीन नि बेचणी; कऊँकि से तिना रा सदा रा इस्सा ऊणा।
गरीबा री मताद करना
फेर जे तेरा कोई इस्राएली पाई कंगाल़ ऊई जाओ ओर तेसरी दशा तां सामणे तरस खाणे जोगी ऊई जाओ, तो तैं से सम्बाल़ना; से परदेशी या यात्री ऊई की तांगे रओ। तेसा मतादा खे तेसते ब्याज या फालतू नि लणा; पर आपणे परमेशरो रा डर मानणा; ताकि से तुसा बीचे तां साथे जिन्दगी बिताई सको।1 तेसखे ब्याजो पाँदे पैसा नि देणा ओर ना ई तेसखे खाणे री चीज फायदे रे लाल़चो ते देणी। आऊँ तुसा रा परमेशर यहोवा ए; आऊँ तुसा खे कनान देश देणे खे ओर तुसा रा परमेशर ऊणे री इच्छा ते तुसा खे मिस्र प्रदेशो ते निकयाल़ी की ल्याई राखेया।
गुलामा खे छुड़ाणे री बिधि
फेर जे तेरा कोई इस्राएली पाई कंगाल़ ऊई की आपणे आपू खे ताखे बेची देओ, तो तैं तेसते दासो जेड़ी सेवा नि कराणी। से तां साथे मजदूर या परदेशिए जेड़ा रओ ओर जुबलिया रे सालो तक तां साथे रई की तेरी सेवा करदा रओ। तेबे से बाल-बच्चेया समेत तांगा ते निकल़ी जाओ ओर सेयो आपणे टब्बरो बीचे ओर आपणे पितरा री जमीना रे वापस ऊई जाओ। कऊँकि इस्राएलो रे लोक सेयो मेरे ई दास ए, जिना खे आऊँ मिस्र प्रदेशो ते निकयाल़ी की ल्याई राखेया; इजी री खातर सेयो दासो जेड़े नि बेचे जाओ। तिना पाँदे सख्तिया साथे अक्क नि करना; बल्कि तिजी रे बदले आसा रे परमेशरो रा डर मानदे ऊए तेस साथे बर्ताव करना। तेरे जो बी दास-दासिया ओ सेयो तुसा री चऊँ कनारो रे प्रदेशो री जातिया बीचा ते ओ ओर दास ओर दासिया तिना बीचा तेई खरीदणे। जो मुसाफर लोक तुसा बीचे परदेशी ऊई की रणे, तिना बीचा ते ओर तिना रे करानेया बीचा ते तुसे दास-दासिया खरीदी सकोए; ओर सेयो तुसा री जायदात ठईरो। तुसे तिना दासा खे आपू ते बाद आपणे पाऊआ री सेवा करने खे बसीता रे तौरो पाँदे सम्बाल़ी सकोए कि सेयो तिना रा अक्क ठईरो; पर तुसा रे पाई-बन्दु जो इस्राएली ओ तिना पाँदे आपणा अक्क सख्ताईया रे नि जताणा।
फेर जे कोई परदेशी या मुसाफर तां सामणे अमीर ऊई जाओ ओर तेस सामणे तेरा इस्राएली पाई कंगाल़ ऊई की आपणे आपू खे तां सामणे तेस परदेशी या मुसाफर या तेसरे कुलो खे बेची देओ, तेस इस्राएली पाईए खे बिकणे ते बाद तेसखे फेर छुड़ाई सकोए; तेसरे पाईया बीचा ते कोई तेसखे छुड़ाई सकोआ, या तेसरा चाचा, या चाचे रा पाऊ या तेसरे कुलो रा कोई बी तेसरे नेड़ो रे टब्बरो रा तेसखे छुड़ाई सकोआ या जे से अमीर ऊई जाओ, तो से आपू ई आपू खे छुड़ाई सकोआ। से आपू खे खरीदणे वाल़े साथे आपणे बिकणे रे सालो ते जुबलिया रे सालो तक साब करी लो ओर तेसरे बिकणे रा पैसा साला री गिणतिया रे मुताबिक ओ, मतलब से पैसा मजदूरा रे दिनो जेड़ा तेस साथे ओ। जे जुबलिया रे बऊत साल रई जाओ, तो जितणे पैसेया साथे से खरीदी राखेया ओ तिना बीचा ते से आपणे छुड़ाणे रा दाम तितणे साला रे मुताबिक वापस करी देओ। जे जुबलिया रे थोड़े जे साल रईगे ओ, तेबे बी से आपणे मालको साथे साब करी की आपणे छुड़ाणे रा दाम तितणे ई साला रे मुताबिक वापस करी देओ। से आपणे मालको साथे तेस मजदूरो जेड़ा रओ, जेसरी सालो री मजदूरी ठराई जाओई ओर तेसरा मालक तेस पाँदे तां सामणे सख्तिया साथे अक्क नि जमाओ।2 ओर जे से इना रीतिया साथे छुड़ाया नि जाओ, तो से जुबलिया रे सालो रे आपणे बाल-बच्चेया समेत छूटी जाओ। कऊँकि इस्राएली लोक मेरे ई दास ए; सेयो मिस्र प्रदेशो ते मेरे ई निकयाल़े रे दास ए; आऊँ तुसा रा परमेशर यहोवा ए।
Source notes (2)
- Footnote लूक 6:35
- Footnote कुलु. 4:1
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.