यहोशू 8

आई शईरो खे नाश करना

1तेबे यहोवे यहोशूए खे बोलेया, “डर नि ओर ईम्मत नि आर, उठ! सबी सैनिका खे साथे लओ ओर आई शईरो पाँदे अमला कर, सुण, मैं आई शईरो रा राजा तेसरी प्रजा समेत, तेसरा शईर ओर सारा देश तेरे वशो रे करी ता रा। 2ओर जेड़ा तैं यरीहो शईर ओर तेसरे राजे साथे कित्तेया, तेड़ा ई आई शईर ओर तेसरे राजे साथे बी करना, बस तुसे डांगरा समेत तेतेरी लूट तो आपणियां तँईं लई सकणे, इजी री खातर तेस शईरो री पिछलिया तरफा खे आपणे सैनिक ताका दे लगाई देयो।”

3तेबे यहोशूए सबी योद्धा साथे आई शईरो पाँदे अमला करने री त्यारी कित्ती ओर यहोशूए 30,000 सैनिक जो शूरवीर थे चूणी की राती ई पेजे। 4ओर तिना खे ये आज्ञा दित्ती, “सुणो, तुसे तेस शईरो रे पिछले कनारे ताका दे बैठे दे रणा, शईरो ते बऊत दूर नि जाणा ओर सब के सब अमला करने खे त्यार रएयो, 5ओर मां आपणे सबी साथिया समेत तेस शईरो रे नेड़े जाणा ओर जेबे सेयो पईलके जेड़े म्हारा सामणा करने खे निकल़ो, तेबे आसा तिना रे सामणे ते नठी जाणा। 6तेबे तिना ये सोची की कि सेयो पईलके जेड़े आसा सामणे ते नठणे लगी रे, तिना म्हारा पीछा करना, ईंयाँ आसा नठी की सेयो शईरो ते दूर लई जाणे। 7तेबे तुसे तेथा ते उठी की आई शईर आपणे वशो दे करी लणा, कऊँकि तुसा रे परमेशर यहोवे से तुसा रे वशो दे करी देणा, 8ओर जेबे तुसे तेस शईरो खे लई लो, तेबे से आग लगाई की फूकी देणा, यहोवे जेड़ा बोली राखेया तेड़ा ई करना, सुणो आऊँ बी तुसा खे ए ई आज्ञा देऊँआ।” 9तेबे यहोशूए सेयो सिपाई पेजी ते ओर सेयो ताका दे बैठणे खे चली गे ओर बेतेल ओर आई शईरो रे बीचे ओर आई शईरो री पच्छमा री तरफा खे बैठे दे रये, पर यहोशू तेसा राती लोका बीचे रया।

10दूजे दिने प्यागा यहोशू तड़के उठेया ओर सैनिका री गिणती लई की इस्राएली परदाना समेत सेना ते आगे-आगे आई शईरो रिया तरफा खे चलेया। 11तेस साथले सारे सैनिक आगे चले ओर आई शईरो रे नेड़े पऊँची की तेस सामणे उत्तरो रिया तरफा खे डेरे लगाई ते ओर इस्राएली सेना ओर आई शईरो बीचे एक तराई थी। 12तेबे तिने कोई 5,000 सैनिक छाँटी की बेतेल ओर आई शईरो री पच्छमा रिया तरफा खे अमला करने खे बठाई ते। 13जेबे परदाने आई शईरो रे उत्तरो रे कनारे सारी सेना खे ओर तेथो री पच्छमा रे कनारे घात करने खे बैठे रे सिपाई बी ठकाणे पाँदे बठाई ते, तेबे यहोशू तेसा राती तराईया देई जाई की रया। 14जेबे आई शईरो रे राजे ये देखेया, तेबे सेयो चटचट प्यागा उठे ओर राजा आपणी सारी सेना खे लई की इस्राएली लोका सामणे तिना साथे लड़ने खे निकल़ी की खुलिया जगा दे यरदन नदिया रे सामणे अराबा दे पऊँचेया ओर से नि जाणो था कि शईरो री पिछलिया तरफा खे बी सैनिक घात लगाई की बैठी रे। 15तेबे यहोशू ओर सब इस्राएली सैनिक तिना ते मानो आर मानी की जंगल़ो रिया तरफा खे नठीगे। 16तेबे आई शईरो रे सारे लोक इस्राएली लोका रा पीछा करने खे आका पाई-पाई की बुलाणे लगे ओर सेयो तिना रा पीछा करदे ऊए शईरो ते दूर निकल़ी गे। 17आई ओर बेतेल शईरो दे एक बी माणूं नि रया, जो इस्राएली लोका रा पीछा करने खे नि गया ओ ओर तिने शईर खुला छाडी की इस्राएली लोका रा पीछा कित्तेया।

18तेबे यहोवे यहोशूए खे बोलेया, “आपणे आथो रा बड़छा आई शईरो रिया तरफा खे बढ़ा, कऊँकि मां से तेरे कब्जे दे देई देणा। तेबे यहोशूए आपणे आथो रा बड़छा आई शईरो री तरफा खे बढ़ाया। 19तेसरे आथ बढ़ांदे ई जो लोक ताका रे बैठी रे थे सेयो फटाफट आपणी जगा ते उठे ओर दौड़ी की शईरो दे चली गे ओर से लई ला ओर चटचट तिदे आग लगाईती।” 20जेबे आई शईरो रे लोके पिछलिया तरफा खे फिरी की देखेया, तो क्या देखेया कि शईरो रा तुआँ सर्गो रिया तरफा खे उठणे लगी रा ओर तिना रे ना तो ओरे नठणे री तागत रयी ओर ना पोरे नठणे री। तेबे जो इस्राएली सैनिक जंगल़ो रिया तरफा खे नठणे लगी रे थे, तिने फिरी की आपणे खदेड़नेवाल़ेया रा पीछा कित्तेया। 21जेबे यहोशू ओर सबी इस्राएलिये देखेया कि घात करने वाल़ेया शईर लई ला ओर तेथा ते तुआँ उठणे लगी रा, तेबे कूमी की आई शईरो रे मर्दा खे काणे लगे। 22तिना रा सामणा करने खे दूजे बी शईरो ते निकल़ी की आए, तेबे सेयो इस्राएली लोका बीचे पड़ी गे, कुछ इस्राएली तो तिना ते आगे ओर कुछ तिना पीछे थे, तेबे तिने सेयो एथो तक काये कि तिना बीचा ते कोई बी जिऊँदा नि बचेया। 23ओर आई शईरो रे राजे खे सेयो जिऊँदा पकड़ी की यहोशूए गे लई आए।

24जेबे इस्राएली आई शईरो रे सबी रणे वाल़ेया खे मैदानो रे, मतलब तेस जंगल़ो रे जेती तिने तिना रा पीछा कित्तेया था, काई चुके, तेबे सारे इस्राएली सैनिके आई शईरो खे वापस ऊई की तेतेरे सारे लोक तलवारी साथे काईते। 25तेबे जवाणस मर्द, सब मिलाई की जो तेस दिने काये सेयो 12,000 थे ओर आई शईरो रे सारे जवाणस मर्द इतणे ई थे। 26कऊँकि जदुओ तक यहोशूए आई शईरो रे सारे रणे वाल़े नाश नि करीते, तदुओ तक तिने आपणा आथ, जेते साथे बड़छा बढ़ाया था, फेर नि खींजेया। 27यहोवे री तेसा आज्ञा रे मुताबिक जो तिने यहोशूए खे दित्ती थी, इस्राएलिये डांगर बगैरा शईरो री लूट आपणी करी ती। 28तेबे यहोशूए आई शईर फूकवाई ता ओर से सदा खे खंडहर करी ता, से आज तक उजाड़ पड़ी रा। 29ओर आई शईरो रा राजा तिने साँजा तक डाल़ो रे लटकाई की राखेया ओर सूरज डूबदे-डूबदे यहोशूए री आज्ञा ते तेसरी लोथ डाल़ो ते थाले त्वारी की शईरो रे बड़े द्वारो सामणे राखी ती ओर तिजी पाँदे पात्थरा रा बड़ा टेर लगाई ता, जो आजो तक बणेया राए।

आशीर्वाद ओर स्रापो रा सुणाया जाणा

30तेबे यहोशूए इस्राएलो रे परमेशर यहोवे खे एबाल पाह्ड़ो पाँदे एक बेदी बणवाई, 31जिंयाँ यहोवे रे दास मूसे इस्राएली लोका खे आज्ञा दित्ती थी ओर जेड़ा मूसे रे बिधानो री कताबा दे लिखी राखेया था, तिने पूरी बेदी अन्न बलिया खे कड़े दे पात्थरा री बणवाई जिदे कोई ज्वार नि चलाई राखेया था। ओर तिदे तिने यहोवे रिया तँईं होमबलि चढ़ाए ओर मेलबलि कित्ते। 32तेते जगा रे यहोशूए इस्राएली लोका सामणे पात्थरा पाँदे मूसे रा बिधान, जो मूसे लिखी थी, तिजी री नकल करवाई। 33सेयो, क्या देसी, क्या परदेशी, सारे इस्राएली आपणे सबी स्याणे लोक, सरदार ओर न्यायिया समेत यहोवे रा सन्दूक चकणे वाल़े लेवी पुरोईता सामणे तेस सन्दूको रे ओरे-पोरे खड़े ऊए, मतलब आदे लोक तो गिरिज्जीम पाह्ड़ो रे ओर आदे एबाल पाह्ड़ो सामणे खड़े ऊए, जेड़ा कि यहोवे रे दास मूसे पईले आज्ञा दित्ती थी कि इस्राएली प्रजा खे आशीर्वाद दित्ते जाओ। 34तिजी ते बाद यहोशूए सारे वचन जिदे आशीष ओर स्रापो रे वचन थे पढ़े, जिंयाँ-जिंयाँ बिधानो री कताबा रे लिखी राखे थे, तिंयाँ-तिंयाँ पढ़ी की सुणाई ते। 35जितणी गल्ला री मूसे आज्ञा दित्ती थी, तिना बीचा ते कोई बी एड़ी गल्ल नि रयी, जो यहोशूए इस्राएली लोका री सारी सभा रे, ओर जवाणसा, बाल-बच्चे ओर तिना साथे रणे वाल़े परदेशी लोका सामणे पढ़ी की नि सुणाई।